 |
| ဒဂုံမြို့သစ်မြောက်ပိုင်းတွင် အကောင်အထည်ဖော်နေသော ဗိုလ်ဗထူး တန်ဖိုးမျှတအိမ်ရာ စီမံကိန်းကို ၂၀၁၄ ခုနှစ် ဇန်န၀ါရီလဆန်းက တွေ့ရစဉ် (ဓာတ်ပုံ- ကျော်ထင်) |
ရန်ကုန်မြို့တွင်းနှင့် မြို့စွန်နေရာများ၊ ပြည်နယ်နှင့် တိုင်းအသီးသီးရှိ ဒေသအများအပြားတွင် ပြည်သူများအတွက် တန်ဖိုးနည်းအိမ်ရာ စီမံကိန်းများ စီမံဆောင်ရွက်ပေးလျက် ရှိသော်လည်း အမှန်တကယ် လိုအပ်ချက်ရှိနေသည့် ပြည်သူလူထုအတွက် ထိရောက်မှု မရှိသေးသည့်အပြင် ယင်းစီမံကိန်းများမှာ အိမ်ရာလိုအပ်ချက် များစွာရှိနေသော လက်ရှိအနေအထားတွင် ပြည်သူအပေါ် ဖိစီးမှု ထပ်မံဖြစ်စေသည့် ပုံစံမျိုး ဖြစ်နေကြောင်း သိရသည်။
မြန်မာနိုင်ငံ၏ စီးပွားရေး အခြေအနေအရ ပြည်သူတို့ အိမ်ရာပိုင်ဆိုင်မှု လိုအပ်ချက် မြင့်မားနေခြင်း၊ ရှိရင်းစွဲ အိမ်ရာတန်ဖိုးများ မြင့်တက်ခြင်းကြောင့် အခြေခံ လူတန်းစားများအနေဖြင့် ကိုယ်ပိုင်အိမ်ရာ ပိုင်ဆိုင်ခွင့် ရရှိရေးအတွက် များစွာအလှမ်းဝေးနေဆဲ အခြေအနေတွင် ရှိနေကြောင်း ပြည်သူများ၏ ပြောဆိုဝေဖန်မှုများအရ သိရသည်။
အထူးသဖြင့် မြန်မာနိုင်ငံ၏ စီးပွားရေးမြို့တော်ဖြစ်သည့် ရန်ကုန်မြို့တွင် ကိုယ်ပိုင်အိမ်ရာ ပိုင်ဆိုင်မှုမရှိသည့် လူဦးရေ များပြားနေပြီး နှစ်စဉ်တိုးပွားလာသည့် မြို့ပြလူဦးရေနှင့် နယ်မြို့များမှ ရွှေ့ပြောင်းရောက်ရှိလာသူများ တိုးပွားလာခြင်းကြောင့်လည်း နှစ်စဉ်အိမ်ရာလိုအပ်ချက် မြင့်မားလာခဲ့သည်။ ရန်ကုန်မြို့၌ အိမ်ထောင်စုဦးရေ နှစ်သောင်းကျော် နှစ်စဉ်တိုးပွားနေကြောင်း သိရပြီး အမှန်တကယ် အိမ်ရာဆောက်လုပ် ဖန်တီးပေးနိုင်မှုမှာ တစ်နှစ်တွင် အခန်းပေါင်း ခုနစ်ထောင်ခန့်သာ ရှိသည့်အတွက် အိမ်ရာလိုအပ်ချက်နှင့် ဖြည့်ဆည်းပေးနိုင်မှု အပိုင်းတွင် များစွာလိုအပ်လျက်ရှိကြောင်း သိရသည်။
“ရန်ကုန်မှာ အိမ်ငှားရမ်းခ ဈေးနှုန်းတွေက တဖြည်းဖြည်း မြင့်တက်လာတယ်။ ဒါကြောင့် နယ်ကတက်လာတဲ့ သူတွေအဖို့ ရန်ကုန်မှာ အိမ်တောင်ငှားမနေနိုင်တဲ့ အခြေအနေတွေဖြစ်ပြီး ရရာနေရာမှာ ကျူးကျော်နေထိုင်ရမှုတွေ ရှိလာတယ်။ ရန်ကုန်မြို့မှာ ကျူးကျော်နေထိုင်သူတွေ များလာလို့လည်း ကျူးကျော်ပြဿနာ ဖြေရှင်းလို့မနိုင်တဲ့ အခြေအနေမျိုးလည်း ဖြစ်လာပြီး ကျူးကျော်ကိစ္စကလည်း အစိုးရအတွက် ပြဿနာတစ်ရပ် ဖြစ်လာပါတယ်။ ဒါတွေဟာ အစိုးရရဲ့ အိမ်ရာစီမံကိန်းတွေ၊ တန်ဖိုးမျှတတို့၊ တန်ဖိုးနည်းတို့ ဆိုတာတွေ ဒီလိုစီမံကိန်းတွေ အောင်မြင်တာ၊ မအောင်မြင်တာကို ပြနေတာပါပဲ” ဟု ရန်ကုန်တက္ကသိုလ်မှ ဌာနမှူးရာထူးဖြင့် အငြိမ်းစားယူခဲ့သည့် ဦးအောင်မြင့်က ပြောကြားသည်။
အစိုးရ တာဝန်ရှိသူများ အနေဖြင့် အခြေခံ လူတန်းစားများအတွက် လူနေမှုအဆင့်အတန်း အတိုင်းအတာ တစ်ခုအထိ မြင့်မားအောင် ရည်ရွယ်ချက်ဖြင့် လုပ်ဆောင်ခဲ့သည့် တန်ဖိုးနည်းအိမ်ရာ စီမံကိန်းများနှင့် တန်ဖိုးနည်းအိမ်ရာများမှာ အမှန်တကယ် လိုအပ်သည့် ဆင်းရဲသားပြည်သူတို့၏လက်သို့ ရောက်ရှိခြင်း ရှိမရှိနှင့် အခြေခံလူတန်းစားတို့အတွက် ထိရောက်မှုရှိမရှိ အပေါ်တွင် အစိုးရအနေဖြင့် သေချာစွာသုံးသပ်ရန် လိုအပ်မည်ဖြစ်ကြောင်းလည်း အစိုးရ၀န်ထမ်း အသိုင်းအ၀ိုင်းမှ သုံးသပ်မှုများ ရှိနေသည်။
“အိမ်ရာတွေက တကယ်ဆင်းရဲတဲ့ အခြေခံလူတန်းစားတွေလက်ထဲ၊ အိမ်တစ်လုံးပိုင်ဖို့ အိပ်မက်မက်နေကြရတဲ့ လူတွေလက်ထဲ၊ တစ်သက်လုံး အစိုးရ၀န်ထမ်းဘ၀နဲ့ နိုင်ငံအတွက် တာဝန်ထမ်းဆောင်ပေးခဲ့ပြီး အငြိမ်းစားယူခဲ့ရတဲ့ သူတွေလက်ထဲ အမှန်တကယ် ရောက်နိုင်ပါ့မလားဆိုတာ စောင့်ကြည့်ရမယ့် အနေအထားပါပဲ။ ဒီအတွက်လည်း အိမ်ရာစီမံကိန်းနဲ့ ပတ်သက်ပြီး ကျွန်တော်တို့ ဘာမှအခွင့်အလမ်းမရှိတဲ့ ၀န်ထမ်းအသိုင်းအ၀ိုင်းမှာ ပြောနေတာတွေ အများကြီးရှိပါတယ်” ဟု လက်ရှိတာဝန်ထမ်းဆောင်နေဆဲဖြစ်သော ပညာရေးဝန်ကြီးဌာနမှ ၀န်ထမ်းတစ်ဦးကဆိုသည်။
လက်ရှိအချိန်တွင် ရန်ကုန်မြို့ ဒဂုံဆိပ်ကမ်းမြို့နယ်၌ ရတနာနှင့် ဧရာဝဏ် တန်ဖိုးမျှတအိမ်ရာ စီမံကိန်းများ ဆောက်လုပ်လျက်ရှိပြီး ၂၀၁၅ ခုနှစ်မတိုင်မီ ပြီးစီးရန် ဆောင်ရွက်နေပြီး အခန်းတစ်ခန်းဈေးနှုန်းမှာ ကျပ်သိန်း ၂၀၀ ကျော်အထိ ပေါက်ဈေးရှိနေကြောင်း သိရသည်။ ထို့ပြင် အချို့တန်ဖိုးနည်း၊ တန်ဖိုးမျှတအိမ်ရာ စီမံကိန်းများမှာ ကျပ်သိန်း ၃၀၀ ၀န်းကျင်အထိ ရှိနေကြောင်းလည်း သိရသည်။
သို့ဖြစ်ရာ ယုဇနဥယျာဉ်မြို့တော်ရှိ တိုက်ခန်းများ၏ ပေါက်ဈေးမှာ ကျပ်သိန်း ၁၀၀ ကျော်ဝန်းကျင်တွင် ရှိသော်လည်း ယခုအသစ်ဆောက်လုပ်လျက်ရှိသည့် တန်ဖိုးနည်းအိမ်ရာ စီမံကိန်းများ၏ ဈေးနှုန်းများမှာ ကျပ်သိန်း ၂၀၀ ကျော် ၃၀၀ အထိ ရှိနေမှုအပေါ် ပြည်သူများအနေဖြင့် မေးခွန်းထုတ်ဝေဖန်မှုများ ရှိနေခဲ့ကြသည်။
“ဒဂုံဆိပ်ကမ်းလို နေရာမျိုးဟာ မြို့တွင်းနဲ့ တော်တော်အလှမ်းဝေးလို့ အဲဒီမှာရှိတဲ့ အိမ်ခန်းဈေးနှုန်းတွေက မြို့တွင်းနဲ့နီးတဲ့ နေရာတွေထက် ပိုပြီးသက်သာသင့်ပါတယ်။ လူနေထူထပ်ပြီး အသွားအလာအဆင်ပြေတဲ့ နေရာတွေမှာ အကွက်အကွင်းကောင်းရင် ကျပ်သိန်း ၂၀၀ လောက်သာ ဖြစ်သင့်ပေမယ့် အခုမှစပြီး ဆောက်လုပ်နေတဲ့နေရာတွေ မြို့နဲ့ဝေးတဲ့ နေရာတွေမှာ သိန်း ၂၀၀ ကျော် ၃၀၀ ဖြစ်နေတာကတော့ မဖြစ်သင့်ပါဘူးဗျာ။ အဲဒီပတ်ဝန်းကျင်မှာ ကျောင်း၊ ဈေး၊ ဆေးခန်းမရှိ၊ ကားဂိတ်နဲ့ကလည်း အလှမ်းဝေး၊ ကားလမ်းဘေး လယ်ကွက်လိုဖြစ်နေတဲ့ နေရာတွေမှာ ဆောက်နေတဲ့ အိမ်ရာတွေ ဈေးကြီးနေတာတော့ သဘာဝမကျဘူး။ အမှန်တကယ်လိုနေတဲ့ ပြည်သူတွေကိုလည်း အကျိုးပြုနိုင်မှာ မဟုတ်ဘူး” ဟု တန်ဖိုးနည်းအိမ်ရာ ၀ယ်ယူခွင့်ရရှိရန် စုံစမ်းနေသော မြောက်ဥက္ကလာပမြို့နယ်မှ ဦးအောင်ကျော်က ပြောကြားသည်။
ထို့ပြင် ဒဂုံဆိပ်ကမ်းမြို့နယ်တွင် နေထိုင်သူ ဒေါ်မိုးမိုးကလည်း “ဧရာဝဏ်နဲ့ ရတနာ တန်ဖိုးနည်း စီမံကိန်းတွေကို ကျောင်းဆရာ၊ ဆရာမ အစိုးရ၀န်ထမ်းတွေနဲ့ နိုင်ငံရေးပါတီတွေကို ဦးစားပေး ရောင်းချသွားမယ်လို့ ကြားရတဲ့အတွက် တကယ်အိမ်မပိုင်သေးတဲ့သူတွေ ရန်ကုန်မြို့မှာ နေရေး၊ ထိုင်ရေး ခက်နေတဲ့ သူတွေအတွက်ရော ဘယ်လိုစီစဉ်ပေးမှာလဲဆိုတာ စိတ်ပူမိတယ်။ စိုးရိမ်မိတယ်။ အိမ်ပိုင်နဲ့နေရဖို့ တစ်သက်လုံး အိပ်မက်တောင် မက်ခွင့်ရှိပါဦးမလား။ တကယ်တမ်း အဲဒီလူတွေကို ချပေးမယ်ဆိုရင် ဌာနဆိုင်ရာ ပိုင်တဲ့သူတွေ ရသွားမယ်။ သူတို့တွေလက်ထဲရောက်မှ ပြန်ပြီးတော့ ဈေးကစားရောင်းချမယ်ဆိုရင် တကယ်နေချင်တဲ့ အိမ်ပိုင်မရှိတဲ့ ဆင်းရဲသားတွေအတွက် ပိုပြီးတော့ ခက်ခဲသွားမှာပါ” ဟု ပြောကြားသည်။
လှိုင်သာယာမြို့နယ်တွင် ရွှေလင်ဗန်းနှင့် ကျန်စစ်မင်း တန်ဖိုးနည်းအိမ်ရာ စီမံကိန်းများကို မကြာမီ စတင်ရောင်းချမည်ဟု သတင်းထွက်ပေါ်လျက်ရှိပြီး ကျပ်သိန်း ၁၂၀ ၀န်းကျင်အထိရှိကြောင်း သိရသည်။ ထို့ပြင် ရန်ကုန်မြို့တော် စည်ပင်သာယာရေးကော်မတီ၏ ဗိုလ်ဗထူးတန်ဖိုးမျှတအိမ်ရာ စီမံကိန်းဖြစ်သည့် ဒဂုံမြောက်ပိုင်းတွင် အခန်းဈေးနှုန်းများမှာ အရစ်ကျဝယ်ယူပါက အနည်းဆုံး ကျပ် ၂၃၇ သိန်းမှ အများဆုံး ကျပ် ၃၂၉ သိန်းအထိ ပေါက်ဈေးရှိနေကြောင်း စုံစမ်းသိရှိရသည်။ ဘဏ်ချေးငွေဖြင့် ၀ယ်ယူပါက လေးနှစ်ပေးချေရမည်ဖြစ်ကာ ဘဏ်တိုးနှင့် ၀န်ဆောင်ခမှာ အရစ်ကျဝယ်ယူသည့် ဈေးနှုန်းထက် ကျပ်သိန်း ၆၀ မှ ၇၀ အထိ အပိုထပ်ဆောင်း ပေးရဖွယ်ရှိကြောင်း သိရသည်။
သို့ဖြစ်ရာ ဘဏ်တိုးပေးရမည့်နှုန်းကို ကျပ်သိန်း ၅၀ ခန့် ထပ်မံပေါင်း၍ သုံးစွဲမည်ဆိုပါက ရန်ကုန်မြို့တွင်းနှင့်နီးသော သင်္ဃန်းကျွန်း၊ သာကေတတို့တွင် တိုက်ခန်းတစ်ခန်း ၀ယ်ယူနိုင်မည်ဖြစ်ရာ အမှန်တကယ် အိမ်ရာလိုအပ်နေသော ပြည်သူများအနေဖြင့် တန်ဖိုးနည်းနှင့် တန်ဖိုးမျှတအိမ်ရာ စီမံကိန်းများ၏ ဈေးနှုန်းများအပေါ် တွက်ချက်ဝေဖန်မှုများ ရှိနေသည်။
“ပထမတော့ တန်ဖိုးမျှတအိမ်ရာ လျှောက်မလို့ပါပဲ။ လေးနှစ်ခွဲ သွင်းရမယ်ဆိုလို့ ဒါပေမဲ့ တစ်လကို ငါးသိန်းသွင်းရမယ်ဆိုလို့ အစိုးရ၀န်ထမ်းအနေနဲ့ ဘယ်လိုလုပ် သွင်းနိုင်မှာလဲ။ ပြီးတော့ တည်နေရာတွေကလည်း ဟိုးအစွန်အဖျားမှာ။ ဒါကြောင့် မလျှောက်ဖြစ်တော့ပါဘူး။ ရုံးက အခြားအိမ်ပိုင်မရှိတဲ့ ၀န်ထမ်းတွေလည်း ဈေးနှုန်းကြောင့် မလျှောက်ကြဘူး” ဟု အိမ်ပိုင်မရှိသေးသည့် အစိုးရ၀န်ထမ်းတစ်ဦးက ဆိုသည်။
အိမ်ရာစီမံကိန်းများ စတင်အကောင်အထည်ဖော်စဉ်က အခြေခံလူတန်းစား အလွှာနှင့် အစိုးရ၀န်ထမ်း အများစု စိတ်ဝင်စားမှု များခဲ့ပြီး စည်ပင်သာယာ၏ တန်ဖိုးမျှတအိမ်ရာများတွင် အိမ်ခန်းရရှိရန် လျှောက်လွှာတင်သူများလည်း များပြားခဲ့သည်။ သို့သော်လည်း အမှန်တကယ် ၀ယ်ယူခွင့်ရရှိရန် ကြိုးပမ်းမှုများကို ငွေကြေးတတ်နိုင်သည့် အသိုင်းအ၀ိုင်းမှ ပိုမိုလုပ်ဆောင်မှု များပြားပြီး ဈေးနှုန်းကြီးမြင့်မှုကြောင့် အခြေခံလူတန်းစားအလွှာ အနေဖြင့် အမှန်တကယ် ၀ယ်ယူရရှိနိုင်ခွင့် အခွင့်အရေး နည်းပါးကြောင်း ပြောဆိုမှုများ ရှိနေသည်။
ထို့ပြင် အခြားတစ်ဖက်တွင်လည်း တန်ဖိုးနည်းအိမ်ရာ စီမံကိန်းများကို ဆောက်လုပ်ရာ၌ စီးပွားရေးလုပ်ငန်းရှင်များ အနေဖြင့် အကျိုးအမြတ်များစွာ ရရှိရန် မျှော်ကိုးလုပ်ဆောင်မှုများ ရှိလာပြီး တန်ဖိုးနည်းအိမ်ရာ စီမံကိန်းဟု ခေါ်ဆိုရန်ပင် မသင့်သည့် ဈေးနှုန်းများဖြင့် ပြည်သူထံသို့ ရောင်းချရန် ကြိုးစားလာမှုများ ရှိနေကြောင်းလည်း ဝေဖန်မှုများ ထွက်ပေါ်လာခဲ့သည်။ လက်ရှိအချိန်တွင် တန်ဖိုးနည်းအိမ်ရာများ၏ ဈေးနှုန်းများမှာ ၀င်ငွေနည်း မိသားစုများနှင့် ပုံမှန်ဝင်ငွေရှိသော မိသားစုများအတွက် ၀ယ်ယူခွင့်ရရန် အခြေအနေတွင် မရှိနိုင်ကြောင်းလည်း စီးပွားရေး ကျွမ်းကျင်သူများက သုံးသပ်ထောက်ပြမှုများ ရှိလာသည်။ အစိုးရအနေဖြင့် အခြေခံလူတန်းစားများအတွက် တန်ဖိုးနည်းအိမ်ရာ စီမံကိန်းများကို ရည်ရွယ်လုပ်ဆောင်ခြင်း ဖြစ်သော်လည်း အမှန်တကယ် ၀ယ်ယူလိုသည့် ပြည်သူများအတွက် သက်သာချောင်ချိမှု မရှိသည့်အပြင် သတ်မှတ်ချက် စည်းကမ်းများမှာလည်း အိမ်ရာလိုအပ်နေသည့် ပြည်သူများအတွက် ၀န်ထုပ်ဝန်ပိုး ဖြစ်စေကြောင်းလည်း ဝေဖန်မှုများ ရှိနေသည်။
“နိုင်ငံတော်က အောက်ခြေလူတန်းစားတွေ လူနေမှုအဆင့်အတန်းမြင့်မားဖို့ တန်ဖိုးနည်း၊ တန်ဖိုးမျှတအိမ်ရာ စီမံကိန်းတွေ လုပ်ပေးတာ ရည်ရွယ်ချက်ကောင်းပါတယ်။ ဒါပေမဲ့ ၀ယ်ယူတဲ့သူက သက်သာချောင်ချိဖို့ လိုပါတယ်။ အခု အဲဒီအိမ်ရာတွေအတွက် သတ်မှတ်တဲ့ ဈေးနှုန်းတွေက တော်တော်ကိုမြင့်တယ်လို့ သိရပါတယ်။ ဒါကြောင့် ဒီအိမ်ရာတွေက ငွေကြေးတတ်နိုင်တဲ့သူတွေ လက်ထဲကို တစ်ဆင့်ခံရောက်သွားမှာ စိုးရိမ်တယ်။ ဒါကလည်း စောင့်ကြည့်ရမယ့် အနေအထား ဖြစ်ပါတယ်။ အခုဆို ရန်ကုန်မြို့တော်စည်ပင်က တန်ဖိုးမျှတဆိုပြီး ဒဂုံမြောက်ပိုင်းမှာရောင်းမယ့် အိမ်ရာဈေးနှုန်းတွေက ကျပ်သိန်း ၂၃၀ ကျော်၊ အဲဒီအိမ်ရာ ၀ယ်ချင်တဲ့သူတွေအတွက် စည်းကမ်းသတ်မှတ်ချက်တွေလည်း အများကြီး။ အိမ်ရာဝယ်ဖို့ လျှောက်မယ့်သူတွေက လစာအနည်းဆုံး ကျပ်သုံးသိန်းအထက် ရှိရမယ်။ ဒါကို ၀န်ထမ်းအနေနဲ့ ဘယ်လိုလုပ် ၀ယ်နိုင်မလဲ။ လုပ်သက်ကလည်း နှစ် ၂၀ အထက်ရှိရမယ်။ မဖြစ်သင့်ပါဘူး။ သင်္ကန်းကျွန်းလို နေရာမျိုးမှာတောင်မှ ကျပ်သိန်း ၁၅၀၊ ၂၀၀ လောက်ဆိုရင် အကျယ်အ၀န်း အသင့်အတင့်ရှိတဲ့ တိုက်ခန်းရတယ်။ ဒါတောင်ကန်ထရိုက်တွေဆောက်တာ။ ဒါကြောင့် နိုင်ငံတော်က တာဝန်ပေးပြီးဆောက်တဲ့ စီမံကိန်းတွေက ဒီထက်သက်သာသင့်တယ်လို့ ထင်တယ်” ဟု သင်္ဃန်းကျွန်းမြို့နယ်မှ တိုင်းဒေသကြီး လွှတ်တော်ကိုယ်စားလှယ် ဦးကျော်ကသုံးသပ်သည်။
တန်ဖိုးနည်းအိမ်ရာ စီမံကိန်းလုပ်ငန်းများ ရရှိလုပ်ဆောင်နေသော ဆောက်လုပ်ရေးကုမ္ပဏီ အချို့မှာ အစိုးရကချမှတ်ပေးသည့် မြေနေရာများတွင် မြေဖိုးကုန်ကျစရိတ်မရှိဘဲ စီမံကိန်းဆောက်လုပ်ခွင့် ရရှိပြီး ဆောက်လုပ်စရိတ်သာ ရှိသော်လည်း အများပြည်သူသို့ ပြန်လည်ရောင်းချရာတွင် အခြေခံလူတန်းစားအလွှာ လိုက်မမီနိုင်သော ဈေးနှုန်းများ သတ်မှတ်ထားခြင်းမှာ မဖြစ်သင့်ကြောင်းလည်း ဆောက်လုပ်ရေး အသိုင်းအ၀ိုင်းက ဝေဖန်မှုများ ရှိနေသည်။
“တန်ဖိုးနည်းအိမ်ရာ၊ တန်ဖိုးမျှတအိမ်ရာဆိုပြီး ရောင်းချမယ့်ဈေးနှုန်းတွေက များတယ်လို့ ကျွန်တော်လို ဆောက်လုပ်ရေးလုပ်ငန်း လုပ်တဲ့သူအနေနဲ့ ခံစားမိတယ်။ တန်ဖိုးမျှတ ကျပ်သိန်း ၂၀၀ ကျော်ဆိုတာ မဖြစ်သင့်ဘူး။ ဒီအိမ်ရာတွေက အစိုးရက မြေဖိုးမကုန်ဘဲ ဆောက်တာဆိုတော့ ဆောက်လုပ်စရိတ်ပဲ ရှိတာ။ ဒါကြောင့် ဒီဈေးနှုန်းဆိုတာ တော်တော်ကို လက်ခံဖို့ ခက်ခဲပါတယ်။ ဒီဈေးနှုန်းနဲ့ဗျာ ဒဂုံမြောက်ပိုင်းလို၊ ဒဂုံဆိပ်ကမ်းလို နေရာမျိုးမှာ ၀ယ်မလား။ ဒေါပုံ၊ သင်္ဃန်းကျွန်း၊ တာမွေလိုနေရာမျိုးမှာ သွားရအဆင်ပြေတဲ့ နေရာတွေမှာမှ တိုက်ခန်းအသင့်အတင့် တစ်ခန်းဆိုရင် ကျပ်သိန်း ၂၀၀ ၀န်းကျင်နဲ့ ရနိုင်တယ်။ သွားလာရလည်း အဆင်ပြေတယ်။ အဲဒီကနေဆက်သွားပြီး တောင်ဥက္ကလာလို နေရာမျိုးမှာ ဒီလိုဈေးနဲ့ ရနိုင်တယ်လေ။ အခုဟာက ရန်ကုန်မြို့မှာ မြို့သစ်တွေကလွဲလို့ အခြား လှိုင်၊ ကမာရွတ်၊ အင်းစိန် စတဲ့နေရာတွေမှာ လူတွေက တိုက်ခန်းအ၀ယ်တွေ ဖြန့်နေကြတာ။ ဈေးကွက်မျှသွားတဲ့ သဘောပေါ့။ ဒါကို အဲဒီလို မြို့သစ်နေရာတွေမျိုးမှာ ကျပ်သိန်း ၂၀၀ ကျော်ကတော့ လုံးဝကို မဖြစ်သင့်ဘူးလို့ ထင်ပါတယ်” ဟု ရန်ကုန်မြို့ရှိ ဆောက်လုပ်ရေးလုပ်ငန်းရှင် တစ်ဦးက သုံးသပ်ပြောကြားသည်။
သို့ဖြစ်ရာ အစိုးရအနေဖြင့် ပလပ်မြေများပေါ်တွင် တန်ဖိုးနည်းအိမ်ရာများဖြင့် ဆောက်လုပ်ရာတွင် အနစ်နာခံနိုင်မည့် လုပ်ငန်းရှင်များအား လုပ်ကိုင်ခွင့်ပေးကာ ဈေးနှုန်းကြီးမြင့်မှု ပြဿနာကို တစ်ဖက်တစ်လမ်းမှ ဖြေရှင်းသင့်ကြောင်း ထောက်ပြမှုများ ရှိနေသည်။
“တန်ဖိုးနည်းလို့ဆိုပေမယ့် စေတနာဟာ တန်ဖိုးလျော့ပါတယ်။ ဘာဖြစ်လို့လဲဆိုတော့ ဒေါပုံလို မြို့ထဲနဲ့နီးတဲ့ နေရာမျိုးမှာတောင်မှ ၁၂× ၅၀ ပေ တိုက်ခန်းကို ကျပ် သိန်း ၁၇၀ ၊ ၂၀၀ လောက်နဲ့ ရနိုင်တယ်။ ဒေါပုံဆိုတာက ကျောင်းနီးဈေးနီး မြို့ထဲနဲ့လဲ နီးတာပဲ။ ဒါကြောင့် ဒီဈေးနှုန်းတွေက ပြန်စဉ်းစားသင့်တယ်။ ဆင်းရဲတဲ့သူတွေလက်ထဲ မရောက်ဘဲ ရှိပြီးသားလူတွေ လက်ထဲကို ရောက်သွားရင် ဆင်းရဲတဲ့သူ ပိုဆင်းရဲ၊ ချမ်းသာတဲ့သူ ပိုချမ်းသာသွားမယ်။ မြေကွက်တွေက အစိုးရလက်ထဲမှာပဲ အစိုးရက တန်ဖိုးသုညနဲ့ ဖြတ်ပေးပြီး တကယ်အနစ်နာခံ လုပ်ပေးမယ့်သူတွေကို ဆောက်ခွင့်ပေးပြီး သက်သက်သာသာ လုပ်ပေးသင့်တယ်” ဟု ဆောက်လုပ်ရေးလုပ်ငန်း အသိုင်းအ၀ိုင်းမှ ပုဂ္ဂိုလ်တစ်ဦးက သုံးသပ်ပြောကြားသည်။
အစိုးရ၀န်ထမ်းများ ရရှိသည့် လစာငွေနှင့် အခြေခံလူတန်းစား အလွှာမှ ၀င်ငွေပေါ်မူတည်ပြီး မိသားစုတစ်စု နေထိုင်ရေးအတွက် တန်ဖိုးနည်းအိမ်ခန်း ၀ယ်ယူနိုင်ရေးအတွက်မှာ အခက်အခဲရှိနေပြီး အချို့တိုက်ခန်းများမှာ ဘဏ်ချေးငွေဖြင့် ၀ယ်ယူလျှင် တစ်လငါးသိန်းခန့်အထိ ပေးသွင်းရမည့် အနေအထားတွင် ရှိနေသည်။ သို့ဖြစ်ရာ သာမန်ဝင်ငွေနှင့် ရပ်တည်နေရသည့် မိသားစုများအနေဖြင့် ၀ယ်ယူခွင့်ရရှိရန် မလွယ်ကူသည့်အတွက် အစိုးရအနေဖြင့် အရစ်ကျ ဈေးနှုန်းများဖြင့် ကာလရှည် သတ်မှတ်ပေးကာ ပြည်သူလူထုထံ ရောင်းချပေးသင့်ကြောင်း ပြောဆိုမှုများ ရှိနေသည်။
ဗဟန်းမြို့နယ်မှ တိုင်းဒေသကြီး လွှတ်တော်ကိုယ်စားလှယ် ဒေါက်တာဒေါ်ညိုညိုသင်းက “လက်ရှိတန်ဖိုးနည်း တန်ဖိုးမျှတအိမ်ရာ ဈေးနှုန်းတွေက များပါတယ်။ သာမန်လုပ်လုပ်လက်စားတွေ မ၀ယ်နိုင်တဲ့ အနေအထား ဖြစ်နေပါတယ်။ တန်ဖိုးနည်းအိမ်ရာတွေ ဆောက်တဲ့နေရာက မြို့စွန်လိုနေရာမျိုး အဲဒီမှာ အစိုးရဆောက်တဲ့ အိမ်ရာတွေက ဒီလိုဈေးနှုန်းဖြစ်နေရင် ပုဂ္ဂလိကဆောက်တဲ့ အိမ်ရာတွေက ဈေးနှုန်းပိုပြီးတိုးလာနိုင်တယ်။ ဒါကြောင့် ဒီလိုနေရာမှာ အနစ်နာခံနိုင်တဲ့ စီးပွားရေး လုပ်ငန်းရှင်တွေနဲ့ ညှိနှိုင်းသင့်တယ်။ အခုတန်ဖိုးမျှတအိမ်ရာဆိုရင် ဘဏ်ချေးငွေနဲ့ဝယ်ရင် တစ်လကို ၅ သိန်းသွင်းရမယ်ဆိုတော့ လက်တွေ့မှာ လုံးဝကို မဖြစ်နိုင်ပါဘူး။ အစိုးရက ဈေးနှုန်းကို မလျှော့ဘူးဆိုရင်လည်း အရစ်ကျ ပိုက်ဆံသွင်းရမယ့် ကာလကို နှစ် ၂၀ လောက်အထိ လုပ်ပေးသင့်တယ်” ဟု ပြောကြားသည်။
အိမ်နီးချင်းနိုင်ငံများတွင်လည်း အစိုးရ၀န်ထမ်းအများစု အနေဖြင့် အိမ်ပိုင်ရရှိရေးအတွက် သတ်မှတ်ကာ စီမံကိန်းများဖြင့် အကောင်အထည်ဖော် လုပ်ဆောင်ပေးလေ့ရှိပြီး မိသားစုတစ်စုတွင် ပုံမှန်ဝင်ငွေရှိသည့် လူတစ်ဦးရှိပါက အရစ်ကျစနစ်ဖြင့် ၎င်းမိသားစုအတွက် နေအိမ်ရရှိရန် ခက်ခဲမှုမရှိနိုင်ပေ။ ထို့ပြင် သက်ဆိုင်ရာ တာဝန်ရှိသူနှင့် အစိုးရ၏ စနစ်ကျပြီး မှန်ကန်သည့် စီမံခန့်ခွဲမှုများကြောင့် တန်ဖိုးမျှတအိမ်ရာ စီမံကိန်းများနှင့် ပြည်သူများကြားတွင် ပြဿနာနည်းပါးပြီး အောင်မြင်မှုရသည့် စီမံကိန်းများအဖြစ် လက်ခံလာကြသည်။ သို့သော်လည်း စင်ကာပူ၊ ထိုင်း၊ မလေးရှား၊ ဗီယက်နမ် စသည့်ဒေသတွင်း အခြားနိုင်ငံများနှင့် မတူညီဘဲ မြန်မာနိုင်ငံတွင် လက်ရှိအကောင်အထည်ဖော်နေသော အစိုးရ၏ တန်ဖိုးနည်းအိမ်ရာ စီမံကိန်းများအပေါ် ပြည်သူတို့၏ ယုံကြည်မှု လျော့ကျသည့်အပြင် စီးပွားရေး လုပ်ငန်းရှင်များနှင့် ဆောက်လုပ်ရေး ကန်ထရိုက်များကလည်း တာဝန်ရှိသူများနှင့် ပူးပေါင်းကာ ၎င်းတို့အကျိုးစီးပွားအတွက် အခြေခံလူတန်းစားတို့၏ အကျိုးကို ငဲ့ကွက်ခြင်းမရှိဘဲ အမြတ်အစွန်းများစွာ ရယူထားမှုများ ရှိနေကြောင်းလည်း ဝေဖန်ပြောကြားမှုများအရ သိရသည်။
“အခုပြောနေတဲ့ တန်ဖိုးနည်း၊ တန်ဖိုးမျှတအိမ်ရာတွေ ဆိုတာကလည်း ပေ ၁၅×၆၀ တိုက်ခန်းကို သိန်း ၂၀၀ ကျော် ၃၀၀ ပေးရမယ်။ အဲဒီမှာ အရစ်ကျစနစ်နဲ့ ရောင်းမယ်လို့ပြောတယ်။ ဒီစနစ်ကလည်း ပြင်ပကန်ထရိုက်တွေရောင်းတဲ့ တိုက်ခန်းပုံစံမျိုး ဘယ်နှစ်လွှာပြီးရင် ဘယ်လောက်သွင်းရမယ် ဆိုတာမျိုးကြီးက အစိုးရအနေနဲ့ မဖြစ်သင့်ဘူး။ တကယ်တမ်း တန်ဖိုးနည်း တန်ဖိုးမျှတ ဖြစ်စေချင်တယ်ဆိုရင် လုံးခင်းပျဉ်ထောင်အိမ်လေး သပ်သပ်ရပ်ရပ်လေး ဆောက်ပေးလိုက်မယ်ဆိုရင်လည်း ဖြစ်နိုင်တာပဲလေ။ မြေလည်းပိုင်သွားမယ်။ ဒါမှ တကယ့်စေတနာ ပါတာပါ။ အခုကတော့ ဆင်းရဲသားတွေကို အကျိုးမပြုဘဲ ကန်ထရိုက်တွေကို အကျိုးဖြစ်စေမယ့်ပုံစံ ဖြစ်နေတယ်။ တန်ဖိုးနည်း တန်ဖိုးမျှတဆိုတာ ဘယ်လိုပုံစံမျိုး တိုင်းတာလဲ။ နေရာလည်းဝေးတယ်။ သွားရေးလာရေးလည်းခက်တယ်။ အခုလို ဘတ်စ်ကားတွေ ကျပ်နေတဲ့အချိန်မှာ ဘယ်လိုလုပ်မလဲ။ တော်တော်ကို မမျှတတဲ့ ဈေးနှုန်းတွေပါ။ ဒါကြောင့် အစိုးရအနေနဲ့ စေတနာလည်း မပါဘူး။ သဘာဝလည်း မကျဘူး။ ငွေကြေးတတ်နိုင်တဲ့ လူတန်းစားတွေအတွက်လောက်ပဲ ဦးတည်နေပါတယ်” ဟု တာမွေမြို့နယ်တွင် နေထိုင်သူ ဦးထွန်းမင်းက သုံးသပ်သည်။
လက်ရှိအချိန်တွင် ရန်ကုန်မြို့၌ အိမ်ရာဈေးနှုန်း ကြီးမြင့်မှုနှင့်အတူ အိမ်ပိုင်မရှိသည့် အစိုးရပင်စင်စားများ၊ ၀န်ထမ်းများလည်း များစွာရှိနေကြောင်း သိရသည်။ ထို့ပြင် အစိုးရ၏ တန်ဖိုးနည်းအိမ်ရာ စီမံကိန်းများမှာလည်း အလယ်အလတ် လူတန်းစားအလွှာအတွက်ပင် ၀ယ်ယူရန် မလွယ်ကူသည့် အခြေအနေမျိုးတွင် ရှိနေခြင်းမှာလည်း မဖြစ်သင့်ပေ။
ဒဂုံဆိပ်ကမ်းမြို့နယ်အစ ပဲခူးမြစ်ဘေး (တိုင်းရင်းသားကျေးရွာ အနောက်ဘက်) တွင် အခန်းပေါင်း ၂၀၀၀၀ ကျော်ပါဝင်သည့် လေးခန်းတွဲ ၁၈ ထပ် တိုက်အလုံးရေ ၄၈ လုံးကို အစိုးရက တင်ဒါခေါ်ပြီး စင်ကာပူ ဒီဇိုင်းလက်ရာအတိုင်း ဆောက်လုပ်ရန် စီစဉ်မှုများ ရှိနေသည်။ အခန်းတစ်ခန်းတွင် ကျပ်သိန်း ၁၈၀ သတ်မှတ်ကာ တစ်လကျပ် ၅၀၀၀၀ နှုန်းဖြင့် အစိုးရ၀န်ထမ်းများကို ဦးစားပေးရောင်းချရန် စီစဉ်နေမှုများလည်းရှိကြောင်း တော်ဝင်ကမ္ဘာ ဆောက်လုပ်ရေးမှ တာဝန်ရှိသူတစ်ဦး၏ ပြောကြားချက်အရ သိရသည်။
အမှန်တကယ် အိမ်ရာလိုအပ်ချက် ရှိသူများအတွက် တန်ဖိုးနည်း (သို့မဟုတ်) တန်ဖိုးမျှတအိမ်ရာ စီမံကိန်းများဆိုင်ရာ ဥပဒေကိုလည်း စတင်ရေးဆွဲနေပြီဖြစ်ကြောင်း သိရသည်။ ယင်းဥပဒေ၏ ရည်ရွယ်ချက်မှာ အမှန်တကယ် အိမ်ရာလိုအပ်ချက် ရှိသူများအတွက် ဦးစားပေးထားခြင်းဖြစ်ကြောင်း သိရသည်။
နှစ်စဉ် မြို့ပြလူဦးရေ တိုးတက်လာမှုနှင့်အတူ အိမ်ရာလိုအပ်ချက် မြင့်မားလာမှုကို အစိုးရအနေဖြင့် စနစ်တကျ ဖြေရှင်းရန် လိုအပ်နေပြီး တန်ဖိုးနည်းအိမ်ရာ စီမံကိန်းများ၊ ပြည်သူအပေါ် ၀န်ထုပ်ဝန်ပိုး မဖြစ်စေရန်နှင့် စီးပွားရေးလုပ်ငန်းရှင်များ ကိုယ်ကျိုးရှာသည့် အခွင့်အရေးတစ်ရပ် မဖြစ်ရန် လိုအပ်ကြောင်း နယ်ပယ်အသီးသီးမှ ဝေဖန်ထောက်ပြမှုများ ရှိနေသည်။
အထက်တန်းရှေ့နေဖြစ်သည့် ဦးဖိုးဖြူကလည်း “အခုတန်ဖိုးနည်း ဈေးနှုန်းတွေက အခြေခံလူတန်းစား အလွှာက လိုအပ်နေတဲ့ ပြည်သူတွေ ၀ယ်ဖို့ခဲယဉ်းပါတယ်။ သိန်း ၂၀၀ လောက်ကို ပြန်တွက်ကြည့်မယ်ဆိုရင် တစ်လကို လေးငါးသိန်းလောက် ၀င်ငွေရှိတဲ့ အရာရှိ အဆင့်လောက်ပဲ ၀ယ်ယူနိုင်မယ့် အနေအထားမှာရှိတယ်။ အစိုးရ၀န်ထမ်းတွေနဲ့ သာမန်အခြေခံ လူတန်းစားတွေ ၀ယ်ယူဖို့က တော်တော်ကိုခဲယဉ်းတဲ့ အခြေအနေမှာ ရှိပါတယ်။ အဲဒီဈေးနှုန်းဆိုရင် စီးပွားရေး လုပ်ငန်းရှင်တွေကပဲ လက်ဝေခံ အရောင်းအ၀ယ် ပြုလုပ်ရင်းနဲ့ အကျိုးအမြတ်တွေကို ရရှိသွားပါလိမ့်မယ်။ အစိုးရ အငြိမ်းစားဝန်ထမ်းတွေရဲ့ ဘ၀ဟာလည်း တော်တော်ကို သနားဖို့ကောင်းတယ်။ သူတို့ကို အရင်အစိုးရက သနားကရုဏာစာ အနေနဲ့ ပင်စင်ပေးတာပဲရှိတယ်။ နေရေးထိုင်ရေး စီစဉ်ပေးတာ မရှိတဲ့အတွက် ကိုယ်ပိုင်အိမ်ရာဝယ်ယူဖို့ အခက်အခဲ ဖြစ်နေပါတယ်” ဟု ပြောကြားသည်။
EMG
No comments:
Post a Comment