 |
| CPJ ၀က်ဘ်ဆိုက်တွင် ဖော်ပြထားသော သမ္မတထံပေးပို့သည့်စာကို တွေ့ရစဉ် |
မြန်မာနိုင်ငံ၌ စာနယ်ဇင်းလွတ်လပ်ခွင့် တဖြည်းဖြည်း ဆုံးရှုံးလာပြီး ယခင်အစိုးရလက်ထက် စာနယ်ဇင်းများအပေါ် ဖိနှိပ်မှုနှင့် ဆင်တူလာသည်ကို ပြသနေကြောင်း နိုင်ငံတကာ ဂျာနယ်လစ်များ ကာကွယ်စောင့်ရှောက်ရေးအဖွဲ့ (CPJ) က သမ္မတဦးသိန်းစိန်ထံ စာပို့ပြီး ပြောကြားလိုက်သည်။
မတ် ၁၇ ရက်နေ့စွဲဖြင့် ပေးပို့ခဲ့သော ထိုစာတွင် CPJ ၏ အမှုဆောင်ညွှန်ကြားရေးမှူး Joel Simon က လက်မှတ်ရေးထိုးခဲ့ပြီး ပြန်ကြားရေးဝန်ကြီးဌာနက ရေးဆွဲခဲ့သော ပုံနှိပ်ခြင်းနှင့် ထုတ်ဝေခြင်းလုပ်ငန်း ဥပဒေကြမ်း၊ ယူနတီ သတင်းဂျာနယ်မှ သတင်းထောက်များ ထိန်းသိမ်းခံရပြီး အမှုရင်ဆိုင်နေရခြင်းတို့အပေါ် CPJ ၏ စိုးရိမ်မှုများအား ပြောကြားသည်။
အဆိုပါပေးစာ ပထမပိုဒ်တွင် လွှတ်တော်၌ အတည်ပြုထားသော မီဒီယာဥပဒေကြမ်းများကို ပြန်လည်ပယ်ဖျက်ပေးရန် တိုက်တွန်းကြောင်းနှင့် မြန်မာနိုင်ငံအတွင်း စာနယ်ဇင်းလွတ်လပ်ခွင့် တဖြည်းဖြည်း ဆုံးရှုံးလာခြင်းကို စိုးရိမ်ကြောင်း ဖော်ပြခဲ့သည်။
ပုံနှိပ်ခြင်းနှင့် ထုတ်ဝေခြင်းလုပ်ငန်း ဥပဒေကြမ်းတွင် အစိုးရ အာဏာပိုင်များ အနေဖြင့် ဆင်ဆာဖြတ်တောက်မှု လုပ်ခွင့်ပေးထားသည့်အပြင် သမ္မတဦးသိန်းစိန် အစိုးရသက်တမ်းအတွင်း ရရှိခဲ့သော ဒီမိုကရေစီရေး ပြုပြင်ပြောင်းလဲရေးအချို့ နောက်ကြောင်းပြန်လှည့်စေရန် ခြိမ်းခြောက်နေသည်ဟု CPJ က ဆိုသည်။
“သတင်းသမားများ၏ စိတ်ဆန္ဒ ပါဝင်ခြင်းမရှိဘဲ ပြန်ကြားရေးဝန်ကြီးဌာနမှ မူကြမ်းရေးဆွဲခဲ့သော ပုံနှိပ်သူများနှင့် ထုတ်ဝေသူများ မှတ်ပုံတင်ဥပဒေသည် ဆယ်စုနှစ်ပေါင်းများစွာ အစိုးရ၏ စောင့်ကြည့်ကြီးကြပ်မှုမှ ကင်းလွတ်စေရန် ကဏ္ဍများစွာတွင် စွမ်းဆောင်နိုင်ခြင်း မရှိခဲ့ပေ။ အထူးသဖြင့် ဥပဒေတွင် ‘ဘာသာရေးကို စော်ကားသော’၊ ‘တရားဥပဒေ စိုးမိုးရေးကို နှောင့်ယှက်သော’၊ ‘မငြိမ်သက်မှုများ ဖြစ်ပေါ်စေသော’၊ ‘အခြေခံဥပဒေကို ချိုးဖောက်သော’ (သို့မဟုတ်) ‘တိုင်းရင်းသား စည်းလုံးညီညွတ်မှုကို ထိပါးနှောင့်ယှက်သော’ အကြောင်းအရာများ ထုတ်ဝေခြင်းကို ကျယ်ကျယ်ပြန့်ပြန့် တားဆီးပိတ်ပင်ထားပေသည်” ဟု CPJ ပေးစာ၌ ရေးသားခဲ့သည်။
ထို့ပြင် ဥပဒေအရ အသစ်ခန့်အပ်သော မှတ်ပုံတင်အရာရှိသည် စာနယ်ဇင်းများကို ထုတ်ဝေခွင့်ချထားပေးခြင်းနှင့် ပြန်လည်ရုပ်သိမ်းခြင်းအပေါ် အထူးသြဇာအာဏာ ရရှိမည်ဖြစ်ပြီး CPJ ၏ လေ့လာချက်စစ်တမ်းများအရ ထိုကဲ့သို့ သြဇာအာဏာ ရှိသူများသည် အခြားနိုင်ငံများတွင် ၎င်းတို့၏အာဏာကို နိုင်ငံရေးရည်ရွယ်ချက်ဖြင့် အလွဲသုံးစားပြုမှုများ ရှိခဲ့ကြောင်း၊ စာနယ်ဇင်းများမှ ထုတ်ဝေခွင့် အချိန်မရွေး ပြန်လည်ရုပ်သိမ်းခံရနိုင်ခြင်းကြောင့် အကဲဆတ်လွယ်သော အကြောင်းအရာများ ရေးသားရာတွင် မိမိကိုယ်ကို ပြန်လည်ထိန်းချုပ် ဆင်ဆာဖြတ်တောက်မှုများ ဖြစ်ပေါ်စေနိုင်ကြောင်း ဆက်လက်ရေးသားခဲ့သည်။
ထိုအချက်များသည် သမ္မတ၏ မိန့်ခွန်းတွင်ပါဝင်သော စာနယ်ဇင်းများကို စတုတ္ထမဏ္ဍိုင်အဖြစ် လုပ်ဆောင်စေမည်ဟူသော ကြွေးကြော်ချက်နှင့် ဆန့်ကျင်နေပြီး မကြာသေးမီက ဖြစ်ပွားခဲ့သော ဖြစ်စဉ်များသည်လည်း သမ္မတ၏ ကတိက၀တ်နှင့် ဆန့်ကျင်နေသည်ဟု CPJ ကဆိုသည်။
“အကောင်းဆုံး ဥပမာတစ်ခုမှာ မြန်မာနိုင်ငံ အလယ်ပိုင်းရှိ လျှို့ဝှက်လက်နက်စက်ရုံအကြောင်း သတင်းရေးသားမှုကြောင့် ယူနတီအပတ်စဉ် သတင်းဂျာနယ်မှ သတင်းထောက်လေးဦးကို နိုင်ငံတော်လျှို့ဝှက်ချက် အက်ဥပဒေဖြင့် တရားစွဲဆိုခြင်းဖြစ်သည်။ ထိုကဲ့သို့ ကျယ်ပြန့်ပြီး သေချာစွာ ရှင်းလင်းထားခြင်းမရှိသော ဥပဒေအရ အပြစ်ရှိကြောင်း ထွက်ပေါ်လာပါက ၎င်းတို့အနေဖြင့် တစ်ဦးလျှင် ထောင်ဒဏ် ၁၄ နှစ် ကျခံရဖွယ်ရှိနေသည်။
သမ္မတကြီး၏ အစိုးရအနေဖြင့် နိုင်ငံခြား သတင်းဌာနများ၏ သတင်းတင်ပြမှုများကိုလည်း လျှော့ချရန် ကြိုးပမ်းချက်အနေဖြင့် နိုင်ငံခြား သတင်းသမားများ၏ ဗီဇာသက်တမ်း လျှော့ချခြင်းနှင့် ပဋိပက္ခဖြစ်ပွားရာ ဒေသများသို့ သွားရောက်ခွင့် ပိတ်ပင်ခြင်းကဲ့သို့သော လုပ်ရပ်များကိုလည်း လုပ်ဆောင်ခဲ့သည်” ဟု ပေးစာတွင် ရေးသားခဲ့သည်။
ထိုလုပ်ရပ်များသည် သမ္မတအနေဖြင့် ၀န်ကြီးချုပ်အဖြစ် တာဝန်ထမ်းဆောင်ခဲ့သော တပ်မတော်အစိုးရ လက်ထက်က စာနယ်ဇင်းများအပေါ် ဖိနှိပ်ခဲ့မှုများနှင့် ဆင်တူနေသည်ဟု ၎င်းတို့က ဆက်လက်ရေးသားသည်။
“သမ္မတကြီး၏ အစိုးရအနေဖြင့် ရရှိခဲ့သော ပြုပြင်ပြောင်းလဲမှုများအပေါ် ယုံကြည်မှု ပြန်လည်ရရှိစေရန်အတွက် သမ္မတကြီး၏ အတည်ပြုချက် စောင့်ဆိုင်းနေသော မီဒီယာဥပဒေကို စွန့်ပယ်ရန်နှင့် သတင်းသမားများကို နှောင့်ယှက်သော၊ ခြိမ်းခြောက်သော၊ ထောင်ဒဏ်ချမှတ်နိုင်သော အခြားဥပဒေများကို ဖျက်သိမ်းပေးနိုင်ပါသည်” ဟု CPJ က ရေးသားခဲ့ပြီး သမ္မတထံမှ အကြောင်းပြန်ချက်ကို စောင့်ဆိုင်းနေကြောင်း ရေးသားခဲ့သည်။
CPJ က သမ္မတဦးသိန်းစိန်ထံသို့ မတ် ၁၇ ရက် နေ့စွဲဖြင့် ပေးစာရေးသား ပေးပို့ခဲ့သော်လည်း ပေးစာတွင် ပယ်ဖျက်ရန် တိုက်တွန်းခဲ့သော ပုံနှိပ်ခြင်းနှင့် ထုတ်ဝေခြင်းလုပ်ငန်း ဥပဒေကြမ်းကို သမ္မတက လက်မှတ်ထိုးပြီး ပြဋ္ဌာန်းလိုက်ခြင်းကို မတ် ၁၉ ရက်ထုတ် အစိုးရသတင်းစာများတွင် ဖော်ပြခဲ့သည်။
EMG
No comments:
Post a Comment