မင်းလူ ၏ အများနှင့် မသက်ဆိုင်သောသူ, အပိုင်း (၂)

(၃)

ချစ်မှူးက ကုန်ကားမောင်းသူ ဖြစ်၏။ ချစ်ဦးကျောင်းက ထွက်ပြီး နောက်တစ်ခါ တစ်ခါ သူ့အစ်ကို၏ ကား နှင့် လိုက်သွားတတ်သည်။  ဒီလို ခရီးသွားတာကို သူပျော်သည်။
ချစ်မှူးက စိတ်မချလို့ ရှေ့ခန်းသူ့ဘေးမှာ ထိုင်ခိုင်းသော်လည်းမရ။ ချစ်ဦးတကားနောက်ခန်း၊ ကုန်သေတ္တာ တွေ၊ အိတ်တွေအပေါ် ထိုင်လိုက် ရတာကို ပိုသဘောကျသည်။ ညဘက်ကျလျှင် အိတ်တွေအပေါ်မှာ ပက်လက်လှန်ပြီး ကောင်းကင်ကကြယ်တွေကို ကြည့်ရင်း ကားစီးရတာ ဇိမ်ပဲဟု ဆို၏။

တကယ်တော့ ချစ်ဦးကို ခေါ်သွားရတာ သိပ်အကူအညီရလှတာတော့ မဟုတ်။ အဖော်အဖြစ်လောက်သာ အသုံးဝင်သည်။ သူက ကျော်တက်ချင်လို့နောက်က ဟွန်းက ပွမ်ပွမ်တီးသော ကားတွေကို လက်သီး ထောင်ပြချင်ပြတာ။ သူ့ကြောင့် တခြားကားတွေနဲ့တော့ ရန်ဖြစ်ရတမျိုး ရှိ၏။ ချစ်မှူးက လူအေးမို့လို့သာ ရိုက်နှက်ကြ မဖြစ်ခဲ့တာ။

ပြီးတော့ ချစ်ဦးအတွက် အစားအသောက် စရိတ်ကပိုကုန်သေးသည်။ သူက တစ်နေရာမှာ ရပ်တိုင်း တစ်ခုခု ၀ယ်စားချင်သူ ဖြစ်၏။ ချစ်မှူးကလည်း သူ့ညီကို အလိုလိုက်တော့ စားချင်တယ်ဆိုကျွေးတာပဲ။
ချစ်မှူး ၏ ကားမှာပါသော ယာဉ်နောက်လိုက်တွေကတော့ ချစ်ဦးကို ချစ်ကြသည်။ စလို့နောက်လို့ ကောင်း သဖြင့် ချစ်ဦးပါလျှင် အပျင်းပြေသောကြောင့် ဖြစ်၏။
သို့ရာတွင် ကုန်ကားသမားလောကသည် အတော်ထိန်းထိန်းသိမ်းသိမ်း နေနိုင်မှ တော်ကာကျသည်။ အမြဲ လိုလို လမ်းပေါ်မှာ ခရီးသွားနေရသဖြင့် အိမ်နှင့်ဝေးနေရတာ များသည်။ အိမ်ထောင်ရှိရှိ မရှိရှိ ကားပေါ် ရောက်လျှင် လူလွတ်လို ဖြစ်သွားသည်။

သူတို့ဘ၀ ကြမ်းတမ်းသည်။ ပင်ပန်းသည်။ ထို့အတူ ပျော်ပါးစရာ အခွင့်အရေးတွေလည်း ရတတ်သည်။ တစ်ချို့ ယမကာနှင့် အပန်းဖြေသည်။ တချို့က တခြားပျော်စရာ ရှာသည်။ တချို့က လိုင်းစုံ။
ချစ်မှူး သည် လူပျိုပေါက်မဖြစ်တဖြစ်၊ ကလေးသာသာအရွယ်ဖြစ်သော ချစ်ဦးကို ဒီလိုဝန်းကျင်ထဲမှာ သာယာ မသွားစေချင်။ ထို့ကြောင့် တစ်လတစ်ခေါက်သာ ခေါ်သွားတတ်သည်။
ချစ်မှူးက လူရိုးလူအေး။ အရက်မသောက်တတ်။ တခြားအပျော်အပါးလည်း မရှိ။ ထို့ကြောင့်ပင် သူ့လို ရိုးရိုး အေးအေးဖြစ်သော မြလွင်နှင့် ဆုံစည်းမိခြင်း ဖြစ်၏။
မြလွင်က ကြားစခန်းမြို့ကလေးရှိ ချစ်မှူးတို့ စားနေကျ ထမင်းဆိုင်မှ အလုပ်သမလေး ဖြစ်၏။ သားအမိ နှစ်ယောက် တည်းရှိပြီး နွမ်းပါးသည်။

မြလွင်က ဖြူဖြူစင်စင် သန့်သန့်ပြန့်ပြန့်ကလေး ဖြစ်သောကြောင့် စိတ်ဝင်စားသူတွေများသည်။ သို့ရာတွင် အများစု က အပျော်သဘော။ တချို့ကတော့ "တစ်ရွာတစ်နပ်စား" သဘောမျိုး ကြံစည်ချင်တာ။
ဒီကြားထဲမှာ မြလွင်က လူရိုးလူအဖြစ်သော ချစ်မှူးကိုသာ အရေးပေးမိ၏။ သို့ရာတွင် ခပ်တုံးတုံးဖြစ်သော ချစ်မှူး က အခွင့်အရေးယူရကောင်း မှန်းမသိ။ သူစားမည့် ဟင်းပန်းကန်ထဲကို မြလွင်က အသား ကောင်းကောင်း များများ ထည့်ပေးတာလောက်ကို အဟုတ်ကြီးမှတ်နေပြီး ကျေနပ်သည်။

ကားနားတဲ့ ရက်တစ်ရက်မှာတော့ ညီအစ်ကိုနှစ်ယောက် အိမ်ရှေ့မှာ ထိုင်စကား ပြောကြသည်။ ချစ်ဦးက သူ့ထုံးစံ အတိုင်း စိတ်ကူးထည့်ရာတွေ ကပ်သီးကပ်သပ်မေးသည်။ ပြီးတော့ …
"ကိုကြီး ခရီးသွားနေတဲ့ အချိန်ကျရင် သိပ်ပျင်းတာပဲ၊ အရင်သူငယ်ချင်းတွေကလည်း ကျောင်းဆက်တက် နေကျတော့ သိပ်မတွေ့နိုင်ဘူး။ ဒေါ်ကြီးကလည်း ရွာပြန်တော့မယ်လို့ နေ့တိုင်းပဲ ပြောနေတာပဲ"
"အေးပါကွာ၊ သူလည်း သူ့သားအမိတွေဆီ ပြန်ချင်တာပေါ့။ ငါမရှိတုန်း မင်းကို ထမင်းဟင်းချက်ကျွေးမယ့် လူမရှိ လို့ ဆွဲထားရတာ၊ ကြာကြာတော့ ဆွဲထားလို့ရမှာ မဟုတ်ဘူး"
"ရှုပ်ပါတယ် ကိုကြီးရာ၊ မိန်းမတစ်ယောက်သာ ယူလိုက်စမ်းပါ"
"ဟေ … အေးကွ၊ တစ်ခါတစ်ခါတော့လည်း ယူရကောင်းမလား စဉ်းစားမိသေးတယ်"

"မိန်းမယူရင် ကလေးမွေးမှာလား"
"မွေးမှာပေါ့ကွ"
"ဘာလေးမွေးမှာလဲ"
"ဒါတော့ ဘယ်သိမလဲကွ"
"ယူရင် သမီးလေးမွေးမယ် မိန်းမကိုပဲ ယူဗျာ"
"ဟာကွာ၊ မင်းကလည်း လုပ်ရော့မယ်၊ ကလေးမွေးတယ်ဆိုတာ ဘာလေးမွေးရမယ်လို့ ကြိုပြောလို့ ရတာမှ မဟုတ်တာ"
"ကျွန်တော်ကတော့ မိန်းကလေးပဲ ချစ်တယ်"
"ဘာဖြစ်လို့လဲ"
"ယောက်ျားလေးမွေးလာလို့ ကျွန်တော့်လို ပေါတောတော လေးဖြစ်နေရင် ဘယ်လိုလုပ်မလဲ"
"ညီလေး ကလည်းကွာ၊ ကိုယ့်ကိုယ်ကို ဒီလောက်မနှိမ်စမ်းပါနဲပ"

"ဒါ … မြှောက်ပြောသေးတာနော်၊ သူများတွေကဆိုရင် ကျွန်တော့်ကို အရူးလို့တောင် ပြောတာ မဟုတ်လား။
"အလကားပါ၊ သူတို့တွေက ငါ့ညီရုပ်ချောတာကို မနာလိုလို့ ပြောကြတာပါ" ဟု ချစ်မှူးက နှစ်သိမ့်သည်။ ကိုယ့်ကိုယ် ကို ပေါ့လို့ပေါမှန်းသိပြီး အမှန်တိုင်း ၀န်ခံတဲ့အတွက် လူကောင်းယောင်ဆောင်နေတဲ့ သူတွေ ထက် သာတယ်ဟု ချစ်မှူးက သူ့ညီကို အမှတ်ပေးလိုက်မိသေးသည်။

"ကျွန်တော် တစ်ခုစဉ်းစားမိသေးတယ် ကိုကြီးရ" ဟု ချစ်ဦးက ပြောသဖြင့်
"ဆိုစမ်းပါဦး" ဟု ချစ်မှူးစကားထောက်ပေးသောအခါ …
"ကျိန်းသေပေါက် သမီးလေးရနိုင်တဲ့နည်း ရှိတယ်ဗျ"
"တယ်ဟုတ်ပါလား၊ ပြောပါဦး၊ ဘာနည်းလဲ"
"သမီးလေးတစ်ယောက်ရှိတဲ့ မိန်းမကို ယူလိုက်ပေါ့"
"ဟာကွာ၊ မင်းကလည်း" ချစ်ဦး ခဏ စဉ်းစားနေပြီးနောက် …
"ကိုကြီး"
"ဟေ …"
"တကယ်လို့ ကိုကြီး မိန်းမယူမယ်လို့ စိတ်ကူးရင် မမြလွင်ကို ယူပါလား"

"ဟင် …"
ချစ်မှူးတွေသွား၏။ ချစ်ဦးက ခုလိုပြောလာမှ မြလွင်အကြောင်းကို စဉ်းစားကြည့်မိတော့သည်။ ထိုအခါ ကျမှ ပင် သူလည်း တအံ့တသြ ဖြစ်သွား၏။
သူမြလွင် ကို ချစ်နေမိပါပကော။

ချစ်ဦးသည် မြလွင်နှင့်အတော် အဆင်ပြေသည်။ ဆိုင်မှာ ထမင်းသွားစားတဲ့အခါ သဘောကောင်းသော မြလွင် က ချစ်ဦးကို စိတ်ရှည်လက်ရှည် ဆက်ဆံတတ်သည်။ တစ်ခါတစ်လေ ချစ်ဦးက ဟင်းနဲ့ မစား ချင်ဘူး။ ထမင်းသုတ် စားချင်တယ်ဆိုလျှင်တောင် သူကိုယ်တိုင်ဖြစ်အောင် လုပ်ပေးတတ်၏။ ထို့ကြောင့် လည်း ချစ်ဦးက မြလွင်ကို ခင်တွယ်မိခြင်း ဖြစ်၏။
ချစ်မှူးကတော့ မြလွင်ကို ကြိုက်နေမိပြီဆိုသော်လည်း ဖွင့်ဟမပြော ဖြစ်သေး။ ပြောလည်း မပြောရဲ။ သူထမင်းစား နေစဉ်မှာ မြလွင်က "ကိုချစ်မှူး၊ ဘာလိုသေးလဲ" လို့လာမေးတာလောက်ကို ဗီစီဒီကာရာ အိုကေ ထဲက မင်းသားမင်းသမီးတွေလို့ အောက်မေ့ပြီး ပီတိဖြာနေရုံသာ ရှိ၏။

သူ့အကြောင်း ရိပ်မိနေသော တခြားကားဆရာတွေ၊ ယာဉ်နောက်လိုက်တွေက ၀ိုင်းလှော်ကြ၊ စကြ၊ နောက်ကြ တာပဲ တိုးတက်မှု ရှိသည်။
တစ်ရက်မှာတော့ မြလွင်သည် ချစ်မှူးကြိုက်တတ်သဖြင့် တမင် ချန်ထားသော ငါးရံ့အူဟင်းနှင့် ချစ်ဦး အတွက် ဆတ်သားတောချက် ပန်းကန်များကို ကိုင်လာသည်။ ချစ်မှူးတို့ စားပွဲရှိရာသို့ အသွားတွင် အကြောင်း သိနေသော ကားသမားတစ်ယောက်က စချင် နောက်ချင်လာသဖြင့် ကြားကဖြတ်ပြီး …
"ဟာ … ငါးရဲ့အူဟင်းပါလား၊ မစားရတာ ကြာပြီ၊ ငါတို့ ကားဝင်လာတိုင်း ကုန်နေတာနဲ့ တိုးတိုးနေတာ၊ ကဲ … ကဲ ငါတို့ ၀ိုင်းကိုချ"
"အို … မဖြစ်ဘူး၊ ဟိုက အစောကြီးကတည်းက မှာထားတာ"

"အမယ် … ဘယ်မှာစောလို့လဲ၊ ကားချင်းဦးတိုက်ဝင်လာကြတာ၊ ငါတို့ကားကတောင် နှာတစ်ဖျားသာ သေးတယ်။ သူက ဖုန်းဆက်ပြီး လှမ်းမှာထားတာကျနေတာပဲ၊ မရဘူးဟေ့ ဒီနေ့တော့ ငါးရံ့အူဟင်းကို မရ ရ အောငေ် စားမှာပဲ"
ဆိုပြီး ပန်းကန်ကို လှမ်းလုမည့်ဟန် ပြင်သည်။ မြလွင်က "ဟာ … မလုပ်ပါနဲ့" ဆိုပြီး ကိုယ်ကိုယိမ်း၍ ရှောင် သည်။ ထိုစဉ် မှာပင် တစ်ဘက်က ခွေးခြေတစ်လုံးကို တိုက်မိပြီး ဟန်ချက်ပျက်သွားသည်။ လက်ထဲက ဟင်း ပန်ကန် တွေ မထိန်းနိုင်တော့ဘဲ အောက်ကို ပြုတ်ကျသည်။ ပန်းကန်လည်းကွဲ၊ ဟင်းတွေလည်း မှောက်။

ဒီမှာတွင်ပဲ ဆိုရှင် မိန်းမကြီး …
"လုပ်လိုက်ရင် နမော်နမဲ့နဲ့၊ ကွဲသွားတဲ့ ပန်းကန်ဖိုး၊ ဟင်းဖိုးတွေ ညည်းလခ ထဲက ဖြတ်ရမယ်" ဟု ပြောသည်။
ဆိုင်ရှင် အတော်များများသည် ဒီအတိုင်းပြောတတ်စမြဲ။ နောက်တော့လည်း လခဖြတ်ချင်မှ ဖြတ်တာပါ။
သို့ရာတွင် ဗီဒီယိုကားတွေထဲမှာ ဒီလိုဇာတ်ကွက်မျိုးတွေ မကြာခဏ ကြည့်ခဲ့ဖူးသော ချစ်ဦးက တကယ်ပဲ လို့ ထင်သည်။ မြလွင်ကိုလည်း သနားသွား၏။ ထို့ကြောင့် …
နောက်ဆုံး လက်ကျန် ဘဲဥချဉ်ရည်ဟင်းကို ယူပြီး လာချပေးသော မြလွင်ကို သူက ပြောလိုက်သည်။

"မမမြလွင်၊ ဒီဆိုင်ရှင်မိန်းမကြီး နှိပ်စက်တာတော့ မခံနဲ့၊ ကိုယ့်ချစ်သူ နောက်ကိုသာ လိုက်ပြေး ပေ တော့ဗျာ"
မြလွင်မျက်နှာ ရဲခနဲ ဖြစ်သွား၏။ ချစ်မှူး ၀င်မဟန့်နိုင်ခင်မှာပင် ခပ်နောက်နောက် ကားသမားတစ်ယောက် က ၀င်၍ …
"မြလွင်မှာ ရည်စားမှ မရှိဘဲကွ၊ ဘယ်သူ့နောက်လိုက်ရမှာလဲ"
"ကိုကြီးချစ်မှူး နောက်ကို လိုက်ပေါ့ဗျ"
ချစ်မှူး မျက်လုံးပြူးသွားပြီး။

"ဟာ … ဟေ့ကောင် … ဟေ့ကောင်" ဟု ဟန့်တား လိုက်သော်လည်း မရတော့။ ချစ်ဦးက ဆက်၍ …
"ဟုတ်တယ်ဗျ၊ ကိုကြီးက မမမြလွင်ကို ကြိုက်နေတာ ကြာပြီ၊ မပြောရဲလို့ဗျ၊ သိလား"
မြလွင်မှာ "ဟယ်ခနဲ" ဖြစ်ပြီး ဆိုက်နောက်ဘက်သို့ ပြေးဝင်သွား၏။
ချစ်ဦး၏ အသံက အကျယ်ကြီးဆိုတော့ သူ့စကားကို တစ်ဆိုင်လုံး နီးပါး ကြားကြရသည်။ ဘာပဲဖြစ်ဖြစ် အားလုံး သိအောင် ကြေညာပြီးသား ဖြစ်သွားတာကတော့ အမှန်ပဲလေ။
 

(၄)

ချစ်ဦးကျေးဇူးကြောင့် ဟိုကိစ္စ လူသိရှင်ကြား ဖြစ်သွားပြီးနောက် ဆိုင်ရှင်မိန်းမကြီးက ချစ်မှူးကိုခေါ်၍ မေးမြန်း စုံစမ်းလေတော့သည်။ ချစ်မှူးကလည်း ခေါင်းညိတ်ဝန်ခံလိုက်သည်။ မြလွင်ကို မေးတော့လည်း …
"အမေ့ကို မေးပါ။ အမေသဘောတူရင် လက်ခံပါမယ်" လို့ ဆိုသည်။
မြလွင်၏ အမေဒေါ်ငွေဇံကို မေးကြည့်သည်။ သဘောမတူစရာ ရှိသလဲ။ သူတို့သားအမိမှာ ဒီထမင်းဆိုင်ကို သာ အားကိုး နေရသည်။ စားရေး၊ သောက်ရေး၊ အဆင်ပြေတာကလွဲပြီး ဖြစ်ဖြစ်မြောက်မြောက်ရတာ မဟုတ်။ ရှေ့ရေးကလည်း ဘာမှမရေရာ။

ချစ်မှူးက ကုန်ကားဒရိုင်ဘာဖြစ်သောကြောင့် ၀င်ငွေမဆိုးလှ။ လူကလည်း ရိုးသားသည်။ ရန်ကုန်ဆင်ခြေ ဖုံးရှိ မြို့နယ်လေးတစ်ခုမှာ အိုးပိုင်အိမ်ပိုင်လည်း ရှိသည်။ မိဘတွေကတော့ မရှိတော့ဘူး။ ညီအစ်ကို နှစ်ယောက်တည်း နေသတဲ့။ ဒါဆိုလျှင် ဒီအိမ်ထောင်ကို သူက စီမံကြီးကြပ်ပြီး မြလွင်က အိမ်ရှင်မ လုပ်ရုံ ပေါ့။ အားလုံး ကိုယ့်လက်ကိုယ့်ခြေ၊ ဒီ့ထက်သင့်တော်သော ဘာရှိဦးမလဲ၊ သူတို့သားအမိ ကံဇာတာ တက်လာတာ လို့တောင်ဆိုနိုင်သေးဟု တွက်ပြီး ၀မ်းမြောက်ဝမ်းသာ သဘောတူလိုက်၏။
သူတို့သားအမိ ဒီမြို့ခံလည်း မဟုတ်။ ဆွေမျိုးအသိုင်းအ၀ိုင်းလည်း မရှိသဖြင့် ဒီမှာတော့ မင်္ဂလာ အခမ်းအနား တွေ ဘာတွေမလုပ်ဖြစ်။ ဘုန်းကြီးကျောင်းမှာ မင်္ဂလာဆွမ်းကပ်ပြီး လူကြီးတချို့ကို ကျွေးမွေး တာလောက်ပဲ လုပ်ဖြစ်၏။

ချစ်မှူးတို့အိမ်မှာတော့ မင်္ဂလာဆောင်အခမ်းအနား လုပ်ဖြစ်သည်။ ကြီးကြီးကျယ်ကျယ် မဟုတ် သော်လည်း သူတို့ရပ်ကွက်အနေနဲ့ဆိုလျှင် စံချိန်မီသည်ဟု ဆိုရမည်။ တစ်ရပ်ကွက်လုံးကို ဖိတ်ကြားပြီး ရေခဲမုန့်၊ အဆော့တစ်ကိတ်တို့ဖြင့် ကျွေးမွေးဧည့်ခံသည်။
ဒီမင်္ဂလာပွဲမှာပင် မြလွင်၏အမေ ဒေါ်ငွေဇံက သူ၏စရိုက်လက္ခဏာကို စတင်ပြသသည်။ သူ၏ အနေအထား ကိုလည်း တစ်ရပ်ကွက်လုံးကို ကြေညာသကဲ့သို့ ရှိ၏။ သူသည် နယ်မြို့ကလေး တစ်မြို့ကလာသော ရိုးရိုး အအတောသူမကြီး တစ်ယောက် မဟုတ်ကြောင်း၊ သမက်တစ်မျက်နှာ တစ်ရွာ ထင်ပြီး အားကိုးနေမည့်သူ မျိုး မဟုတ်ကြောင်း၊ ဒီအိမ်မှာ သူသာလျှင် သြဇာအကြီးဆုံး ဖြစ်ရမယ်ဆိုသည့် အကြောင်း တို့ကို သိစေလို ခြင်းတာလည်း ဖြစ်၏။

တကယ်တော့ ဒေါ်ငွေဇံသည်လည်း ခေသူမဟုတ်။
တစ်ချိန်တစ်ခါက သူ့အဆင့်အတန်းနှုန်း သူအခြေအနေတစ်ခု ရှိခဲ့သူဖြစ်၏။ သူ့ယောက်ျားက သစ်လုပ်ငန်း မှာ စာရေးကြီး ဖြစ်၏။ စားနိုင်သောက်နိုင် တဲ့ထဲကပေါ့။ ထိုစဉ်က တစ်အိမ်ထောင်လုံးကို သူပဲ နိုင်နိုင် နင်းနင်း ကွပ်ကဲ လာခဲ့တာလေ။ မြလွင် ၆တန်းအရောက်မှာမူ ယောက်ျားဆုံသွားခဲ့တာ။ ဒီနောက် စီးပွားရေး အခြေအနေ မကောင်းလို့ မြလွင်ကို ထမင်းဆိုင်မှာ ၀င်လုပ်ခိုင်းခဲ့ရတာ။
ခုတော့ ကံဇာတာ ပြန်တက်လာပြီ။

အိုးပိုင်အိမ်ပိုင် ရှိပြီး ၀င်ငွေ ကောင်းသော လူရိုး လူကောင်းတစ်ယောက် ကို သမက်တော်ခွင့်ရပြီ။ ထမင်းဆိုင် မှာတုန်းကလို သူများ မျက်နှာရိပ် မျက်နှာကဲကြည့်ပြီး နေဖို့ မလိုတော့။ ဒီအိမ်မှာ သူက အသက် ရော၊ ၀ါရော၊ ဂုဏ်ဒြပ်ရော အကြီးဆုံး။ အားလုံး သူ့သြဇာကို နာခံကြရမည်။ ဒီဆန္ဒ ကို မင်္ဂလာဆောင် မှာ စတင်အကောင်အထည် ဖော်ခြင်း ဖြစ်၏။
မင်္ဂလာဆောင် မှာ သတို့သား သတို့သမီး ဘာအ၀တ်အစားတွေ ၀တ်ရမလဲ။ ဧည့်သည်တွေကို ဘာကျွေး မလဲ ဆိုတာကအစ သူပဲ စီမံ ခန့်ခွဲသည်။

သတို့သား သတို့သမီးအနေဖြင့် မင်္ဂလာဆောင်မှာ ဖြစ်သလိုဝတ်စားလို့ မဖြစ် သူတို့ သားအမိ ဂုဏ်ငယ်ရ မည်။ သိပ်အကောင်းအစားဝတ်ပြန်တော့ ငွေကုန်သည်။ သားသားနားနားလည်း ဖြစ်အောင် နောက်ပိုင်း အလှူ အတန်း သွားလျှင်လည်း ၀တ်လို့ရအောင် ချိန်ဆတွက်ချက်ပြီး ၀ယ်ရမည်ဟု ဆို၏။
ချစ်မှူး က ချစ်ဦးကိုလည်း သူနှင့် ဆင်တူတစ်စုံဝယ်ပေးချင်သည်။ ဒေါ်ငွေဇံက ကန့်ကွက်သည်။ ချစ်ဦးက မင်္ဂလာ ဆောင်မယ့် သူမဟုတ်။ ဘယ်သူကမှလည်း ဂရုမစိုက်ကြည့်ကြမှာ မဟုတ်။ ၀တ်ကောင်းစားလှ ၀တ် လို့လည်း ဘာမှ ထူးလာမှာ မဟုတ်ဟု ဆိုသည်။

ထိုအခါ ချစ်ဦးက …
"အဒေါ်ကြီးကလည်း မင်္ဂလာဆောင်မှာမှ မဟုတ်တာ။ ပြီးတော့ အဒေါ်ကြီးကို ဘယ်သူကမှလည်း အရေး လုပ်ပြီး ကြည့်မှာ မဟုတ်ပါဘး။ ပြီးတော့ အဒေါ်ကြီးက ဘာဝတ်ဝတ် ရုပ်ထွက်မှာ မဟုတ်ပါဘူး" ဟု ပြန်တွယ် သဖြင့် ချစ်ဦးကို မျက်စောင်းခဲလိုက်သည်။ သူ့စိတ်ထဲကလည်း ဒီကောင်လေးကိုတော့ ဦးကျိုးအောင် အတော်လုပ်ယူရဦးမှာပဲဟု တေးထားလိုက်သည်။
မြလွင် ကပဲ ကြားက၀င်၍ မင်္ဂလာဆောင်မှာ  အားလုံးပဲ သပ်သပ်ရပ်ရပ် ၀တ်သင့်ပါတယ်ဆိုပြီး သူ့အမေ ကို ရော ချစ်ဦး ကိုပါ အ၀တ်အစားတွေ ၀ယ်ပေးလိုက်သည်။

ချစ်မှူးက ဧည့်သည်တွေကို အုန်းနို့ခေါက်ဆွဲ ကျွေးချင်သည်။ အားလုံး၀၀လင်လင် စားစေလိုသော စေတနာ ကြောင့် ဖြစ်၏။ ဒေါ်ငွေဇံက တစ်မျိုးတွက်သည်။ အုန်းနို့ခေါက်ဆွဲဆိုတာက  အကန့်အသတ်နှင့် (သူ့အခေါ် ကိုယ်တာနှင့်) ကျွေးလို့ရတာမဟုတ်။ စားပွဲအလယ်မှာ လိုက်ပွဲပန်းကန် ချပေးထားရပြီး စားနိုင် သလောက် တစ်ဝကြီးကျွေးရခြင်း ဖြစ်၏။ ထို့ကြောင့် အကုန်အကျ ပိုများသည်။ လက်ဖွဲ့တာနဲ့ စားတာနဲ့ မကာမီ အောင် ဖြစ်တတ်သဖြင့် တွက်ခြေမကိုက်ဘူး။

"ဒါဆိုရင် တွက်ခြေကိုက်အောင် ကန်စွန်းဥပြုတ်ကျွေးပါလား၊ ဘယ်သူမှ အများကြီး မစားနိုင်တော့ဘူး"
ဟု ချစ်ဦးက ၀င်၍ အကြံပေးးသည်။ သူကတော့ ထုံးစံအတိုင်း စိတ်ကူးရှိရာ ပြောလိုက်ခြင်းသည်။ ဒါကို ဒေါ်ငွေဇံ က သူ့ကို ငေါ့တာပါဆိုပြီး မကျေနပ် ဖြစ်သေးသည်။
သူတို့ အကြံအစည်က ရေခဲမုန့်နှင့် ကိတ်မုန့်ကျွေးမည်။ ဒါဆိုလျှင် လူတစ်ယောက် ရေခဲမုန့်တစ်ခွက်၊ ကိတ်မုန့်တစ်ချပ် နှင့် ပြီးသည်။
ဒီအစီအစဉ် ကိုတော့ ချစ်ဦးက ထောက်ခံသည်။ ဒေါ်ငွေဇံလို အသာအနာ တွက်ချက် တတ်သောကြောင့်  မဟုတ်။ သူကိုယ်တိုင်က ရေခဲမုန့် ကြိုက်သောကြောင့်ပင် ဖြစ်၏။

ဒေါ်ငွေဇံ၏ တွက်ကိန်းသည် မှန်သင့်သလောက်တော့ မှန်သည်။ ရေခဲမုန့်နှင့် ကိတ်မုန့်ဆိုတော့ လိုက်ပွဲချ ပေးစရာ မလိုတော့။
တစ်ခုရှိတာကတော့ မင်္ဂလာဆောင်သည် ရပ်ကွက်တွင်းမှာပင် ပြုလုပ်ခြင်း ဖြစ်၏။ ဧည့်သည် တွေအနေဖြင့် အ၀တ်အစားလေး ကောက်စွပ်ပြီး ထွက်လာလျှင် မိနစ်ပိုင်းအတွင်း ရောက်နိုင်သည်။ ခရီးစရိတ် တွေ ဘာတွေလည်း ကုန်ကျစရာမလို။ ထို့ကြောင့် များသောအားဖြင့် တစ်မိသားစုလုံး လာကြသည်။ တစ်ချို့က လက်ဖွဲ့ငွေ ၂၀၀ လောက်ထည့်ပြီး တစ်မိသားစုလုံး လာစားသည်။ ကလေး တွေလည်း ပါသည်။ ကလေး ဆိုတာက ဟန်ဆောင်ပန်ဆောင် လုပ်နေတတ်တာမျိုး မဟုတ်။ ရေခဲမုန့် တစ်ခွက် စားပြီး မ၀သေးဘူး ယူဦးမယ်ဆိုတာမျိုး လုပ်တတ်သည်။ ဒီအခါကျတော့ …
"ဟေ့ … ဟေ့၊ ဒီမှာ ကလေးတွေအတွက် ထပ်ပေးပါဦး၊ အဲ … အဲတစ်လက်စတည်း ငါ့အတွက်ပါ တစ်ခွက် ယူခဲ့ ပါကွယ်"

ဆိုပြီး ရောကြိတ်တတ်သည်။ နေ့တိုင်း မြင်နေတွေ့နေကျဆိုတော့ အားနာနေရမယ့် လူတွေမှ မဟုတ်တာ။ သူ့အလှူတုန်း ကလည်း ကိုယ်ကသွား ဖြဲနားဖြဲ သွားစားထားတာလေ။
ထိုကြောင့် ရေခဲမုန့်တစ်စည်ပြီး တစ်စည်ဖွင့်နေရသည်။ ဒေါ်ငွေဇံသည် ရေခဲမုန့် ခပ်ထည့်ပေးနေသူဆီ သွားပြီး....
"ရေခဲမုန့် ကို ပုံမှန်ထက်ခွက်ရေပိုထွက်အောင် လုပ်လို့မရဘူးလား" ဟု မေးသည်။
" ရတာပေါ့ အန်တီ ရဲ့၊ အနည်းဆုံးတော့ ၁၀လွက်လောက် ပိုထွက်အောင်လုပ်လို့ရတယ်"
" ဒါဆိုလည်း ကြည့်လုပ်ပေးပါကွာ၊ အဒေါ်လက်ဖက်ရည်ဖိုး ပေးပါ့မယ်"

ဆိုသဖြင့် ရေခဲမုန့်ထည့်သူက သူ့ပညာကို ထုတ်ပြသည်။ ရေခဲမုန့်ခပ်ရာမှာ အသာကလေးရှပ်ပြီး ခပ်ခြင်း ဖြစ်၏။ ခွက်ထဲ ထည့်လိုက်ရင်တော့ ပုံစံမပျက် ခုံးခုံးလေးပဲ။ အောက်ဘက်မှာမှ ခေါင်းပွဖြစ်နေ၏။
ရင်းနှီးသူ တွေက ချစ်ဦးကို ခေါ်ပြီး ဇွန်းနှင့် ထိုးခွဲပြသည်။ ချစ်ဦးက ဘာမှမပူနဲ့ဆိုပြီး သူအပေါင်းအသင်း တွေ အတွက်ဆိုလျှင် ရေခဲမုန့်ကို ကိုယ်တိုင်သွားခပ်ထည့်ပေးသည်။ သူက ခွပ်ခွက်ထဲ အပြည့် ထည့်ရုံ သာမက စည်နံရံနဲ့ပါဆောင့်ပြီး သိပ်ထည့်လိုက်သေးသည်။
ကလေးတွေက....
" ကိုကြီးချစ်ရူး၊ မဝသေးဘူးဗျ"
ဆိုလျှင် "အေး.... အေး... ရမယ် ဟေ့..."ဆိုပြီး ထပ်ယူပေးတတ်သည် သူကိုယ်တိုင်လည်း တစ်ဝိုင်းပြီး တစ်ဝိုင်း လှည့်ထိုင်ပြီး။
"ကျွန်တော့် လည်း တစ်ခွက်ဗျို့" လုပ်တတ်သည်။ သူတစ်ယောက်တည်းစားတာကိုက ၁၅ ခွက်လောက် ရှိသည်။

ဒေါ်ငွေဇံကတော့ ဒါကိုကြည့်ပြီး မျက်စောင်းတခဲခဲပေါ့။ သူ့ခမျာလည်း ပင်ပန်းရှာပါသည်။ သူသည် အရေးပါ သူတစ်ဦးဖြစ်ကြောင့် ပြဖို့ ဧည့်သည်တွေကိုလည်း စုံအောင်စေ့အောင် မျက်နှာပြ နှုတ်ဆက်ရသည်။ ရေခဲမုန့် စည်နားကို လည်း သွားပြီးကြီးကြပ်ရသည်။ လက်ဖွဲ့လက်ခံတဲ့နေရာမှာလည်း သွားပြီး စစ်ဆေးရ သေးသည်။
မင်္ဂလာဆောင် တွေမှာ ဖြစ်တတ်တာ တစ်ခုရှိ၏။ သတို့သားဘက်နှင့် သတို့သမီးဘက်တို့ ငွေရေးကြေးရေး နှင့် ပတ်သက်ပြီး အပြန်အလှန် သံသယပွားကြခြင်းဖြစ်၏။ ဒီလိုအခါမျိုးကျလျှင် လက်ဖွဲ့လက်ခံတဲ့နေရာ မှ နှစ်ဖက်စလုံးက ယုံကြည်စိတ်ချရသူတွေကို ပူးတွဲတာဝန်ပေးလေ့ရှိ၏။ တစ်ဖက်ဖက်က မရိုးမသား လုပ်လို့ မရအောင် အပြန်အလှန် စောင့်ကြည့် ထိန်းသိမ်းကြသည့် သဘော။

ဆက်ရန်
http://www.shwezinu.com