(ဇန်န၀ါရီလ ၁၃ ရက်နေ့မှာ အကျဉ်းကျခံနေရာမှ နိုင်ငံတော် သမ္မတကြေညာတဲ့ လွတ်ငြိမ်းချမ်းသာခွင့် အမိန့်နှင့် လွတ်မြောက်လာသည့် ၈၈ ကျောင်းသားခေါင်းဆောင်တဦးဖြစ်တဲ့ (ဦး)ကိုကိုကြီး နှင့် ကချင်၊ အထက်မြန်မာနိုင်ငံ ခရီးစဉ်အပြီး ဖေဖေါ်ဝါရီလကုန်ပိုင်းက မန္တလေးမြို့တွင်ခရီးစဉ်၊ လက်ရှိနိုင်ငံရေး အပေါ်သုံးသပ်ချက်များကို YPI ကတွေ့ဆုံမေးမြန်းထားပါသည်။ ယင်းမေးမြန်းချက်များကို အောက်တွင်ဖေါ်ပြလိုက်ပါသည်။)
YPI - ၈၈ မျိုးဆက်ကျောင်းသားများရဲ့ ခရီးစဉ်အားလုံးရဲ့ အဓိက ရည်ရွယ်ချက်လေးကို သိချင်ပါတယ်။
ဖြေ - ကျွန်တော်တို့က နံရံလေးဘက်ကြားထဲမှာ ၁၀ စုနှစ် (၂)ခုလောက်အထိ နေခဲ့ရတော့ ပြည်သူတွေ နိုင်ငံသားတွေနဲ့ တလျှောက်လုံးထိတွေ့လို့ မရခဲ့ပါဘူး။ အဲဒီတော့ အခုလို ပြန်လွတ်လာတဲ့အချိန်မှာ အဓိကအားဖြင့် ဒေသအသီးသီးကပြည်သူတွေနဲ့ ထိတွေ့ချင်တယ်။ နောက်ပြီးတော့ သူတို့ရဲ့ရင်ခုန်သံတွေကို နားထောင်ချင်တယ်။ သူတို့ခံစားနေရတာတွေကို မျှဝေခံစားချင်တယ်ဆိုတဲ့ ရည်ရွယ်ချက်နဲ့ ခရီးတွေထွက်ဖြစ်တာပါ။
YPI - အခုလိုသွားဖြစ်တဲ့ ခရီးစဉ်တွေအပေါ်မှာကော ပြည်သူတွေရဲ့ ထောက်ခံမှုတွေ ရရှိရဲ့လား၊ ကျေနပ်မှုကော ရှိရဲ့လား။
ဖြေ - ရှိပါတယ်။ အထူးသဖြင့်ကတော့ ပြည်သူတွေရဲ့ထောက်ခံမှုဆိုတာ အခုမှ ထောက်ခံမှုရတာတော့ မဟုတ်ပါဘူး။ တလျှောက်လုံးပေါ့၊ ပြည်သူတွေဆိုတာ တချို့ကတော့ပြောတယ်၊ လူထုကြီးက ဘာမှမသိဘူး။ လူထုကြီးကို ဒါလုပ်၊ ဒါမလုပ်နဲ့ဆိုတာကို အုပ်ချုပ်တဲ့သူတွေက ပုံစံချပေးမှ လုပ်တယ်ဆိုတဲ့အတွေးအခေါ်ကို ကျွန်တော်တို့ ဘယ်တုန်းကမှ လက်မခံခဲ့ပါဘူး။ လူထုတွေက သိပါတယ်။ သူတို့သိတဲ့အသိတွေက ခမ်းခမ်းနားနားစကားလုံးတွေနဲ့ မဟုတ်ပေမယ့်လို့ ဘယ်ဟာမှန်တယ်၊ ဘယ်ဟာမှားတယ်ဆိုတာ၊ ဘယ်ဟာတရားတယ်၊ ဘယ်ဟာမတရားဘူးဆိုတာ သူတို့သိပါတယ်။ ဒါပေမယ့် ထောက်ခံခွင့်မရတဲ့အချိန်မျိုး၊ နောက်ပြီးတော့ ဖိနှိပ်မှုတွေများနေတဲ့ အချိန်မျိုးမှာ သူတို့ခံစားမှုတွေကို မြိုသိပ်ထားခဲ့ကြပါတယ်။ အခုတော့ နည်းနည်းလေးပွင့်လင်းလာပြီဆိုတော့ သူတို့ရဲ့ရင်ထဲက အမှန်တွေကို မြတ်နိုးတဲ့ စိတ်ဆန္ဒတွေကို ဖော်ထုတ်ပြသကြတာပါ။ အခုမှဖြစ်လာတဲ့ စိတ်ခံစားမှုမျိုး မဟုတ်ပါဘူး။ သူတို့ မြိုသိပ်ထားတာကို ထုတ်ဖော်ခွင့်ရတဲ့အချိန်မှာ ထုတ်ဖော်ကြပြီးတော့ နွေးနွေးထွေးထွေး ကြိုဆိုကြတယ်လို့ပဲ ခံစားရပါတယ်။
YPI - ဒေသအသီးသီးကိုရောက်တဲ့အခါ ဒေသခံပြည်သူတွေရဲ့ အခြေအနေတွေရယ်၊ ဒေသတွေရဲ့ အခြေအနေတွေကို မျက်မြင်ဘယ်လို ခံစားမိပါသလဲ။
ဖြေ - ကျွန်တော်တို့ ထောင်ကလွတ်လာပြီးတဲ့နောက် ဥပမာအနေနဲ့ပြောရရင်တော့ ရန်ကုန်မြို့ရဲ့ အနေအထားပေါ့။ စပြောရင်တော့ လွတ်လာချင်း လေဆိပ်မှာတွေ့ရတဲ့မြင်ကွင်းက သတင်းထောက်တွေ၊ နောက်ပြီး မျိုးဆက်သစ်မီဒီယာသမားတွေ အများကြီးနဲ့ လေဆိပ်မှာ တွေ့လိုက်ရတဲ့အတွက် ထူးခြားတဲ့ တိုးတက်မှုတစ်ခုလို့ မြင်ခဲ့ပါတယ်။ နောက် ကျွန်တော်တို့ ရန်ကုန်မှာလုပ်ဖြစ်တဲ့ သတင်းစာရှင်းလင်းပွဲကို လုပ်တော့လည်း အာဏာပိုင်တွေဘက်က အနှောက်အယှက်မရှိဘဲနဲ့ လုပ်နိုင်ခဲ့တယ်။ နောက်ဆုံးတော့ ပုံနှိပ်ထုတ်ဝေနိုင်တဲ့အထိ လုပ်နိုင်ခဲ့တယ်။ ပြီးတော့ ပဲခူးတိုင်းဒေသကြီးမှာလည်း ပဲခူးမြို့မိ၊မြို့ဖတွေနဲ့ တွေ့ဆုံဂုဏ်ပြု နှုတ်ဆက်ပွဲကိုလည်း သွားနိုင်ခဲ့တယ်။ နောက်ပြီးတော့ ဧရာဝတီဘက်မှာရှိတဲ့ ဟင်္သာတ ခရီးစဉ်မှာလည်း လူထုဟောပြောပွဲပုံစံမျိုးကို လုပ်နိုင်ခဲ့တယ်။ မကွေးတိုင်းဒေသကြီးခရီးစဉ်ဖြစ်တဲ့ သရက်နဲ့အောင်လံမှာလည်း အနှောင့်အယှက်ကင်းကင်းနဲ့ လူထုနဲ့ ထိတွေ့ခွင့်ရခဲ့တယ်။ မန္တလေးတိုင်းဒေသကြီး ခရီးစဉ်မှာလည်း အနှောင့်အယှက်ကင်းခဲ့ပါတယ်။ ဒါတွေအားလုံးက တိုးတက်မှုတွေအဖြစ် အသိအမှတ်လည်းပြုပါတယ်။
YPI - ဦးကိုကိုကြီးအနေနဲ့ လွှတ်တော်နိုင်ငံရေး၊ လွှတ်တော်ပြင်ပနိုင်ငံရေးရှိတဲ့ အနက်မှာ ဘယ်အပိုင်းကို အလေးထားပါသလဲ၊ ဘယ်အပိုင်းကို ပိုစိတ်ဝင်စားပါသလဲ။ ဘာကြောင့်လဲဆိုတာ သိပါရစေ။
ဖြေ - တကယ်ကတော့ ပါတီစုံဒီမိုကရေစီအသားကျသွားတဲ့ နိုင်ငံတွေမှာဆိုရင်တော့ လွှတ်တော်နိုင်ငံရေးက ပင်မအဓိကအခန်းကဏ္ဍဖြစ်လာမှာပါ။ အခုကတော့ အကူးအပြောင်း ကာလဖြစ်နေတဲ့အတွက် လွှတ်တော်နိုင်ငံရေး အခန်းကဏ္ဍက အခြေတကျမဖြစ်သေးပါဘူး။ မခိုင်မာသေးပါဘူး။ အဲဒီတော့ လူထုဒီမိုကရေစီအခန်းကဏ္ဍက ဆက်ရှိနေဘို့ လိုအပ်မယ်လို့ မြင်တဲ့အတွက်ကြောင့် ကြားဖြတ်ရွေးကောက်ပွဲမှာ ၀င်ရောက်ယှဉ်ပြိုင်တာမျိုး မလုပ်ဘဲနဲ့ (၈၈)မျိုးဆက် ကျောင်းသားများအနေနဲ့လည်း ဆက်ပြီးတော့ရပ်တည်နေမှာပါ။
YPI - နိုင်ငံရေးလှုပ်ရှားမှုပုံစံအမျိုးမျိုး၊ အသုံးအနှုန်းအမျိုးမျိုးရှိတဲ့အနက် လူထုခေါင်းဆောင်ဆိုတဲ့ အသုံးအနှုန်းရယ်၊ နိုင်ငံရေးသမားတစ်ယောက်ဆိုတာရယ် ဘယ်လိုခွဲခြားသိမြင်သလဲဆိုတာ သိပါရစေ။
ဖြေ - ဒီနေရာမှာ နိုင်ငံရေးသမားဆိုတာ ပရော်ဖက်ရှင်နယ် နိုင်ငံရေးသမားလို့ ဆိုလိုတာနဲ့တူတယ်။ ပြောရမယ်ဆိုရင် ပရော်ဖက်ရှင်နယ်နိုင်ငံရေးသမားဆိုတာ နိုင်ငံရေးလုပ်ငန်းတစ်ခုတည်းကို ဇောက်ချပြီးတော့ သူ့ရဲ့ကျွမ်းကျင်မှု လုပ်ငန်းအဖြစ်နဲ့ ဆောင်ရွက်နေတဲ့သူကို ခေါ်ဝေါ်တဲ့အသုံးအနှုန်းဖြစ်တယ်လို့ နားလည်ထားပါတယ်။ နိုင်ငံရေးသမားထဲကဘဲ တပြိုင်နက်တည်းဖြစ်နိုင်တယ်။ လူထုခေါင်းဆောင်ဆိုတာကတော့ ပြည်သူလူထုက ယုံကြည်လေးစားတဲ့၊ အားကိုးထောက်ခံတဲ့သူက လူထုခေါင်းဆောင်ဖြစ်နိုင်ပါတယ်။
YPI - ဦးကိုကိုကြီးအနေနဲ့ အကျဉ်းထောင်က လွတ်လာပြီးကာလအတွင်းမှာ နိုင်ငံတကာ သံတမန် အဖွဲ့အစည်းတွေ၊ ပြည်တွင်းမှာရှိတဲ့ နိုင်ငံရေးသမားတွေ၊ နိုင်ငံရေးပါတီတွေ၊ ဒေသအသီးသီးကပြည်သူတွေနဲ့ တွေ့ပြီးတဲ့နောက်ပိုင်းမှာ လက်ရှိ မြန်မာနိုင်ငံရဲ့အခြေအနေ၊ နိုင်ငံရေးအခြေအနေတွေကို ဘယ်လိုထင်မြင်သုံးသပ်မိပါသလဲ။
ဖြေ - အခုအခြေအနေကတော့ စပ်ကူးမတ်ကူးကာလ အသွင်ကူးပြောင်းနေတဲ့ ကာလလို့ဘဲ မြင်ပါတယ်။ အဲဒီအကူးအပြောင်းကလည်းဘဲ ထိပ်ပိုင်းက အုပ်ချုပ်သူတွေကနေပြီး ဦးဆောင်ပြီးတော့ ကူးပြောင်းတဲ့ နိုင်ငံရေးပုံစံဖြစ်တယ်လို့ပဲ မြင်ပါတယ်။ ဒါပေမဲ့ ဒီထိပ်ပိုင်းက ပြုပြင်ပြောင်းလဲတယ်ဆိုတာကလည်း ၁၉၈၈ ခုနှစ်ကနေစပြီးတော့ အောက်ခြေပြည်သူလူထုတစ်ရပ်လုံးရဲ့ လိုလားချက်၊ တောင်းဆိုချက်ကို မလွန်ဆန်နိုင်လို့ ပြောင်းလဲရတဲ့ ပြောင်းလဲမှုလို့မြင်ပါတယ်။ ထိပ်ပိုင်းကနေစပြီး ပြောင်းလဲနေတယ်ဆိုတော့ တစ်ဖက်ကကျတော့ လွှတ်တော်ပုံသဏ္ဍာန်ပေါ်လာတယ်။ လွှတ်တော်ကနေ ရွေးကောက်တင်မြှောက်တဲ့ အစိုးရပုံသဏ္ဍာန်ပေါ်လာတယ်။ ဒါပေမဲ့ အခုချိန်ထိက လွှတ်တော်က အသွင်သဏ္ဍာန်အားဖြင့်သာ ရှိသေးပြီး၊ တကယ့် အနှစ်သာရပြည့်ဝတဲ့ ဒီမိုကရေစီပုံစံမျိုး မရောက်သေးဘူးလို့ မြင်ပါတယ်။
YPI - အနာဂါတ်မှာ ကြုံတွေ့လာနိုင်မဲ့ မြန်မာနိုင်ငံရဲ့ နိုင်ငံရေး ပြောင်းလဲမှုပုံသဏ္ဍာန်ကို ဘယ်လို ထင်မြင်သုံးသပ်ထားပါသလဲ။
ဖြေ - အနာဂါတ်နိုင်ငံရေးဆိုတာကတော့ ဗေဒင်ဟောသလိုမျိုး အတိအကျဟောလို့တော့ မရပါဘူး။ ဒါပေမဲ့ ပြုပြင်ပြောင်းလဲမှုတွေကို သိမ်သိမ်မွေ့မွေ့နဲ့ ပြောင်းလဲဖို့ဆိုတာကတော့ ကဏ္ဍအသီးသီးမှာ တာဝန်ရှိပါတယ်။ လက်ရှိစစ်တပ်အသိုင်းအ၀ိုင်းကော၊ နိုင်ငံရေးအင်အားစုတွေကော ဘယ်လောက်ထိ နားလည်မှုရှိရှိနဲ့ ပူးပေါင်းဆောင်ရွက်နိုင်သလဲဆိုတဲ့အပေါ်မှာ မူတည်ပါလိမ့်မယ်။ အဲလိုမှမဟုတ်ဘူးဆိုရင်တော့ အဆိုးဆုံးခြေအနေကို ပြန်ရောက်သွားနိုင်တယ်။
YPI - နိုင်ငံတနိုင်ငံမှာ တည်ငြိမ်အေးချမ်းဖို့အတွက် ဘယ်ကဏ္ဍက အဓိကအကျဆုံးနဲ့ အခြေခံအကျဆုံး ဖြစ်သလဲဆိုတာ ဦးကိုကိုကြီးရဲ့အမြင်ကို ပြောပြပေးပါ။
ဖြေ - နိုင်ငံတနိုင်ငံမှာ အခြေခံအကျဆုံးကတော့ တရားဥပဒေစိုးမိုးမှုပါ။ နိုင်ငံတနိုင်ငံမှာ လူပုဂ္ဂိုလ်ကအုပ်ချုပ်တဲ့ နိုင်ငံမဟုတ်ပဲနဲ့ တရားဥပဒေကအုပ်ချုပ်တဲ့ နိုင်ငံဖြစ်မှ အဲဒီနိုင်ငံက တည်ငြိမ်အေးချမ်းတယ်၊ တရားဥပဒေစိုးမိုးတယ်လို့ ပြောလို့ရမှာဖြစ်တယ်။
YPI - ၈၈ မျိုးဆက်ကျောင်းသားတွေကို နိုင်ငံရေးပါတီတွေက ပါတီဝင်တွေအဖြစ် ကမ်းလှမ်းလာခဲ့မယ်ဆိုရင် ဘယ်လိုများ သဘောထားမလဲမသိဘူး။
ဖြေ - ၈၈ မျိုးဆက်ဆိုတာ တစ်ဦးချင်းတသီးပုဂ္ဂလအနေနဲ့ စုစည်းထားတာပါ။ တစ်ယောက်ချင်းရဲ့ ရွေးချယ်မှုအပေါ် မူတည်ပါတယ်။ သူတို့ကို ဘာမှချည်နှောင်ထားတာ မရှိဘူး။ သူတို့ယုံကြည်တဲ့ ပါတီရှိရင် လွတ်လွတ်လပ်လပ်ဝင်ရောက်နိုင်တဲ့ အခွင့်အရေးတွေရှိပါတယ်။
YPI - ၈၈ မျိုးဆက်ကျောင်းသားအဖွဲ့အနေနဲ့ စုပေါင်းပြီးတော့ လာမယ့်(၁)နှစ်၊ (၂)နှစ် ကာလအတွင်းမှာ နိုင်ငံရေးပါတီအဖြစ် တည်ထောင်ဖို့စီစဉ်ထားလားဆိုတာ သိပါရစေ။
ဖြေ - အဲဒီအဖြေကတော့ လာမယ့် (၁)နှစ်၊ (၂)နှစ်ကျမှ ပြောကြတာပေါ့။ ( ရယ်လျှက် )
YPI - နောက်ဆုံးအနေနဲ့ ပြည်သူတွေကို ဘာတွေပြောချင်နေပါသလဲ။
ဖြေ - ပြည်သူတွေကို အဓိကပြောချင်တာကတော့ ''နိုင်ငံရေးဆိုတာ နိုင်ငံရေးသမားတွေအတွက် အလုပ်ပဲ၊ ကိုယ်နဲ့မဆိုင်ဘူးဆိုတဲ့" အတွေးအခေါ်အမြင်တွေကို စပြောင်းလဲသင့်နေပါပြီ။ ပြောင်းလဲဖို့ဆိုတာကလည်း ပြည်သူတွေကိုယ်တိုင် ပြောင်းလဲရမှာဖြစ်သလို နိုင်ငံရေးတက်ကြွသူတွေကလည်း လူထုကြားထဲမှာ နိုင်ငံရေး နိုးကြွမှုရှိလာအောင် ၀ိုင်းပြီးတော့ကြိုးစားကြရမှာပါ။ အဓိကအကျဆုံးအနေနဲ့ကတော့ ၂၀၀၈ ဖွဲ့စည်းပုံအခြေခံဥပဒေမှာပါတဲ့ ပြဠာန်းချက်တစ်ခုကိုပဲ ကိုးကားပြီးပြောရပါလိမ့်မယ်။ နိုင်ငံတော်၏ အချုပ်အချာအာဏာသည် နိုင်ငံသားများမှ တိုက်ရိုက်ဆင်းသက်သည်လို့ ပါရှိတယ်။ အဲဒီဥပဒေရဲ့ အဓိပ္ပါယ်အနှစ်သာရက အစိုးရကို ပြည်သူစိတ်ပေါက်လာအောင် ပြောင်းလဲရမယ်။ ပြည်သူတွေကို အစိုးရစိတ်ပေါက်လာအောင် ကြိုးစားရမယ်၊ အဲဒါ အရေးကြီးတဲ့အချက်ပါပဲ။
YPI
No comments:
Post a Comment