ရွက်လှေများတကယ်တော့လည်း ကျမတို့ လူဘ၀ဆိုတာ ကမ်းမမြင် လမ်းမမြင်သည့် ပင်လယ် သမုဒရာပြင်ကျယ်ကြီးမှာ ကိုယ်တိုင် ထိန်းချုပ်ပဲ့ကိုင်သော ရွက်လှေတစ်စင်းစီဖြင့် ခရီးနှင်နေကြရခြင်းပဲမဟုတ်လား။ ဟိုးငယ်ငယ်ကလေးဘ၀ အရွယ်တုန်းကတော့ ရေပြင်ကိုမြင်လျှင် လှေလွှတ်ချင် စိတ်တွေပဲရှိခဲ့၏။ ကျမငယ်စဉ်က ဧရာဝတီမြစ်၏ အနောက်ဘက်ကမ်းက ရွာကြီးတစ်ရွာတွင် ခေတ္တ သွားရောက် နေထိုင် ခဲ့ရဖူးသည်။ ခြံဝင်းကြီးမှ အကျယ်ကြီး၊ စတုရန်းပေပေါင်း နှစ်သောင်းလောက်တော့ ရှိမည်ထင်သည်။ အဲသည်ခြံကြီး၏ ပတ်ပတ်လည်မှာ မြင့်မား၍ အရွက်အရိပ်စိပ်သော မန်ကျည်းပင်များစီတန်း၍ ရှိနေသေးသည်။
ခြံရှေ့က သုံးပေလောက်ကျယ်သော ရေမြောင်းသည် နွေရာသီမှာ ရေမစီးသော်လည်း မိုးရာသီနှင့် မြောင်းရေလွှတ်သည့် ကာလများတွင် ဒူးဆစ်ထိ မြင့်သောရေဖြင့် ချောင်းကလေးတစ်ခုအဖြစ် စီးဆင်းနေကျ ဖြစ်သည်။ အိမ်ခြံဝင်း တံခါးပေါက်နှင့် ရှေ့က တာလမ်းကို ဆက်သွယ်ထားသော သစ်လုံးခင်း တံတားပြင်ကလည်း တော်တော်ကျယ်သည်။ ထိုတံတားပြင်ပေါ်မှာ ရေမြောင်းထဲသို့ ခြေချ၍ ထိုင်သည့်အခါ ရေက ကျမ၏ ခြေမျက်စိထိ နစ်နေလေ့ရှိသည်။
တစ်ခါတစ်ခါ မြောင်းကြီးမှ ရေလွှတ်များသည့်အချိန် တံတားသစ်လုံး၏ အစပ်ထိပင် ရေမြင့်သည့်အခါ ကျမခြေသလုံးအပေါ်ပိုင်းအထိ ရေမြုပ်တတ်၏။ ရေစီး၏တိုး တိုက်မှုကို အဆန်းတကြယ်ခံယူရင်း ကျမအမြဲစိတ်ကူးပေါ်လေ့ရှိသည်က စက္ကူလှေလုပ်ဖို့။ စက္ကူလှေသည် ကလေးတိုင်းလုပ်ဖူးနေကျ လက်မှု အနုပညာဖြစ်သလို စက္ကူလှေ လွှတ်ခြင်းသည် ကလေးတိုင်း ဆော့ကစားဖူးနေကျ ကစားနည်းဖြစ်လိမ့်မည်။
စက္ကူလှေကိုချိုးသည့်အခါ ရိုးရိုးစင်းစင်းစက္ကူလှေနှင့် တက်မ ပါသော စက္ကူလှေ ရယ်လို့ နှစ်မျိုးရှိ၏။ ကျမကတော့ ရိုးရိုးစင်းစင်း စက်ကူလှေကလေးသာ ချိုးတတ်သည်။ ထိုစက်ကူလှေကလေးကို မြောင်းရေထဲတွင် ကျမချလိုက်လျှင် လှေကလေးသည် ရေစီးအတိုင်း လျှင်မြန်စွာ ပြေးလေသည်။ ထိုလှေကလေး မျက်စိအောက်မှ ပျောက်သွားသည်အထိ (ကိုယ့်ခြံဝင်းရှေ့က ရေမြောင်းထဲမှာ အနှောင့်အယှက်မရှိ တစ်ဖက်ခြံကျော်သည်အထိ) တရွေ့ရွေ့ ရွက်လွှင့်သွားတာကို မြင်ရလျှင် ဘယ်လို ပျော်မှန်းမသိ ပျော်မိ၏။ ထိုလှေကလေး တာလွှတ်ပြီး ဘယ်လောက်မှမကြာခင် ဟိုငြိသည်ငြိ ငြိပြီး ကမ်းစပ်မှာ သောင်တင်နေလျှင် တုတ်ချောင်းကလေးဖြင့် ထိုးကော်ကာ ထပ်သွားစေဖို့ ကြိုးစားမိသေး၏။ တကယ်တော့လည်း ငြိပြီး လဲပြိုနစ်စဉ်ကတည်းက စက္ကူကရေစိုစွတ်ပြီးပြီ။ ဤလှေသည် ပြန်လည်ထောင် မတ်ပြီး ခရီးနှင်ဖို့ဆိုတာ သိပ်မဖြစ်နိုင်ပေ။ ရေစိုချပ်ပြားကလေးအဖြစ် တုံးလုံး ပက်လက်လဲရင်း မျောဖို့သာ ရှိတော့သည်။
အဲသည်တုန်းက စက္ကူလှေကလေးတစ်စင်း နစ်နေပြီဆိုလျှင်၊ နောက်စက္ကူ တစ်ရွက် ဖြုတ်ပြီး အလျှင်အမြန် နောက်တစ်စင်း ချိုးနိုင်၏။ ရေမှာချပြီး လွှတ်နိုင်သေး၏။ ဒါကြောင့်လည်း ကလေးဘ၀ဟာ ပျော်စရာကောင်းခဲ့ခြင်း ဖြစ်မှာပေါ့။ အသက်နည်းနည်း ပိုကြီးလာလို့ ပန်းချီရေးဆွဲဖို့ ၀ါသနာပါလာသောအခါမှာလည်း ကျမသည် ရေပြင်ကို ရေးဆွဲတိုင်း လှေတစ်စင်းထည့်ဖို့ ကြိုးစားလာခဲ့သည်။ ဘာကြောင့်လဲတော့ မသိ။ ရေပြင်ဆိုတာ လှေကလေးရှိနေမှ ပြည့်စုံသည်ဟု ထင်ခဲ့ပုံရသည်။ ဆွဲလိုက်သည့် လှေကလည်း ရွက်လှေ ဖြစ်တတ်သည်။
ရွက်တိုင်မှာ အ၀တ်စကို ရွက်လွှင့်ထားသည့် မြန်မာဆန်ဆန် ရွက်လှေလား၊ ပြိုင်ပွဲဝင် ရွက်လှေ ပေါ့ပေါ့ကလေးတွေလား၊ ကျမ မမှတ်မိပါ။ လေ၏ ထိန်း ကျောင်းမှုအောက်မှာ ကိုယ့်လှေကို ကိုယ်သွားလိုရာသို့ ပဲ့ကိုင်ပြီး ခရီးနှင်နိုင်သည့် ဘ၀မျိုးကတော့ တော်တော် အားကျစရာ ကောင်းလှသည်။ တကယ့်လက်တွေ့မှာတော့ ကျမ လှေမစီးရဲပါ။ မြစ်ပြင်ကျယ်မှာ လှေဖြင့် စုန်ဆန်သွားလာနေကြသူများကို အားကျပါရဲ့။ သူတို့ နေရာမှာ ကိုယ်က စိတ်ကူးဖြင့် ၀င်ရသည်က တော်တော်ကျေနပ်ဖို့ ကောင်းသည်။
တကယ် ကိုယ်တိုင် လှေပေါ်မှာ လိုက်ပါစီးနင်းဖို့၊ ထို့ထက်ပို၍ ထိုလှေကို ပဲ့ကိုင် လှော်ခတ်ဖို့၊ ရွက်လွှင့်ဖို့ ဆိုတာ ဘယ်လိုမှ သတ္တိမွေးယူလို့မရသည့် အဖြစ်တွေ။ ဘာကြောင့်လဲဆိုတော့ ကိုယ့်ကိုယ်ကို မယုံကြည်လို့ပေါ့။ ကိုယ့်အစွမ်းသတ္တိ ကို လည်း ကိုယ်မယုံ။ ကံကြမာဆိုတာကိုလည်း မယုံ။ ကိုယ့်ရွက်လှေကို လေထန် သည့် မုန်တိုင်းက ဆွဲနှစ်ပစ်မှာလည်း ပူပင်ရသေးသည်။ ဒါကြောင့် လှေမှန်သမျှ၊ ရေမှန်သမျှကို ဘေးကကြည့်ပြီး အားကျရုံပဲ သာယာခဲ့မိ၏။ ကိုယ်တိုင် ပါဝင်ဖို့ ဘယ်တုန်းကမှ စိတ်ကူးခဲ့သည်မဟုတ်။ သို့သော် ကျမမတွေးမိသည့် အချက်မှာ ကျမသည် ဘ၀၏ ကိုယ်ပိုင်ရွက်လှေဖြင့် ခရီးနှင်နေခဲ့ပြီးပြီ ဆိုတာပဲ။ ကျမ၏ရွက်လှေက ဘယ်လောက် ခိုင်ခံ့သလဲ၊ ဘယ်လောက်လုံခြုံသလဲ ကျမမသိ။ ဘယ်သူမှလဲ မသိ။ ကိုယ့်လှေကို လှပအောင်၊ ဆွဲဆောင်မှုရှိအောင် ကျမတို့ ဆေးခြယ်ရင်း .. အောင်မြင်သူတွေရှိမည်။ မအောင်မြင်ခဲ့သူတွေလည်း ရှိမည်။
လှပနိုင်သူ သစ်လွင်နိုင်သူတို့က ဂုဏ်ယူစွာ ရွက်လွှင့်နေချိန်တွင် မအောင် မြင်သူတွေက အစုတ်အပြဲ အဖာအထေးရွက်တို့ဖြင့် မွဲနွမ်းသော လှေကိုယ်ထည်ဖြင့် နာနည်ကြည်းကြည်း ရွက်လွှင့်နေကြလိမ့်မည်။ ကိုယ့်လှေကို ခိုင်ခံ့သည်ထက် ခိုင်ခံ့အောင်၊ တာရှည်ခံသည်ထက် ခံအောင် ကြိုးစားပြင်ဆင်လိုသူတွေလည်း ရှိမည်။ ကံစီမံရာပဲဟု ကံကြမာအပေါ် ယုံပြီး ပုံအပ်ထားသူတွေလည်း ရှိမည်။ မုန်တိုင်းဗဟိုနှင့် နီးသူတွေ ရှိမည်။ အဖျားအနားပဲ ထိသူတွေရှိမည်။ အချိန်မတိုင်မှီ နစ်သူတွေ ရှိမည်။ (အချိန်တိုင်ခြင်း၊ မတိုင်ခြင်းကိုရော ဘယ်သူက ဆုံးဖြတ်ပေးမလဲ)
ကျမတို့ခရီးနှင်ရာ၏ အဆုံးပန်းတိုင်က ဘာလဲ၊ အမှန်အတိုင်းပြောရလျှင် ကျမ မသိပါ။ နှစ်မြုပ်ခြင်းသည် ခရီးဆုံးလား၊ မနစ်မြုပ်ဘဲ ခရီးဆက်ခွင့်သာ ရခဲ့လျှင် ဟိုဘက်မှာ ဘာရှိသလဲ၊ ဘာကို မျှော်လင့်ပြီး ကျမတို့ ရွက်လွှင့်နေကြတာလဲ။
မေတ္တာတရားအတွက်လား၊ ဗြဟ္မစိုရ်တရား အတွက်လား၊ ဒါမှမဟုတ် နိဗ္ဗာန်ဟု စကားအရသာသိပြီး တကယ်လက်တွေ့ ကျမ မသိမြင်နိုင်သော စိတ်အခြေအနေ တစ်ခုစီသို့လား။ သီးသန့် နေရာ တစ်ခုဆီသို့လား။ ရော့ဒ်စတူးဝပ်၏ ရွက်လွှင့်ခြင်းကို နားထောင်ရစဉ်ကတော့ ဦးတည်ရာရှိသူ၏ ရွက်လွှင့်ခြင်းတစ်ခုအပေါ် အားကျပြီး မုဒိတာပွားခဲ့ရဖူးသည်။ ဘုရားသခင်နှင့် နီးရာ၊ အရှင်သခင်ရှိရာ အရပ်ဆီသို့ ဦးတည် ၍ ရွက်လွှင့်နေခြင်း ဖြစ်နိုင်သည်။
ဘယ်လောက် အဓိပ္ပာယ်ရှိလိုက်တဲ့ ဘ၀ ဖြစ်မလဲ။ ကျမကရော ဘယ်ကိုဦးတည်ပြီး ရွက်လွှင့်နေခဲ့ပါသလဲဟု ကိုယ့်ကိုယ်ကို ပြန်လည် ဆန်းစစ်ကြည့်သောအခါ ကျမ တော်တော်လန့်သွားသည်။ ဘာကို ဦးတည်မှန်းသာ မသိပေမယ့် ခရီးကတော့ အတော်ပေါက်ခဲ့ပြီးလေပြီ။ ကျမ၏ရွက်လှေပေါ်မှာလည်း လိုချင်၍သယ်ယူခဲ့သော ပျော်ရွှင်မှုများ၊ မလိုချင်ပါဘဲနှင့် လက်ခံယူခဲ့သည့် အမှားများ၊ လွှင့်ပစ်လို့ရလျှင် ချက်ခြင်း လွှင့်ပစ်လိုက်ချင်သော နောင်တများ.. စသည်ဖြင့် ကုန်စည်ပစည်းများလည်း အသင့်အတင့် စုံခဲ့ပြီ။ ကျမ ဘယ်ကိုရောက်မှာလဲ ဆိုတာကိုလည်း သိချင်လာပြီ။
မုန်တိုင်းကြောင့် (သို့မဟုတ်) ကျမ၏ ပဲ့ကိုင်ထိန်းချုပ်ခြင်းအတတ် ညံ့ဖျင်းမှုကြောင့် လှေကလေး နစ်သွားလေမလားဟုလည်း စိုးရိမ်ပူပန်လှပြီ။ ဘယ်သူကမှ အာမခံပေးလို့ မရသည့် ဟောသည် သမုဒရာပြင်ကျယ်ကြီးထဲမှာ မင်းရဲ့လှေ ဘာမှဖြစ်မှာ မဟုတ်ပါဘူး ဟူသော ဖျောင်းဖျ နှစ်သိမ့် အားပေးမှုကိုလည်း တစ်ဖက်က ကြားချင်နေပြန်သည်။ ကိုယ်တောင် ဘယ်အချိန် နစ်မလဲဟု မသိနိုင်သည့်ခရီးမှာ သူများလှေတွေ နစ်လု မတတ်ဖြစ်တာ၊ နစ်သွားတာတွေကို သူရဲကောင်းဆန်ဆန် ကယ်တင်နိုင် လေမလားဟုလည်း ကိုယ့်ကိုယ်ကို ဘ၀င်မြင့်ခဲ့ပြီးပြီ။ ကိုယ့်လှေခိုင်ခံ့အောင်၊ လုံခြုံအောင် ပြုပြင်တည်ဆောက်မည့်အစား အပေါ်ယံဆေးခြယ်မှုကို ပို၍ ဦးစား ပေးခဲ့မိသည့် ကာလကလည်း တော်တော်ရှည်ကြာခဲ့ပြီ။
ရှေ့ဆက်ပြီး ကျမ၏လှေ ခိုင်ခံ့ဖို့သာ ကြိုးစားရတော့မည်။ အချိန်တော့ နောက်မကျသေးဟု မျှော်လင့်ရပါသည်။ ကျမ၏ လှေထဲမှာ သယ်ယူခဲ့သည့် ပျော်ရွှင်ခြင်းဆိုတာတွေက အခုအချိန်မှာ ပြန်လည်သုံးလို့မရတော့သည့် တစ်ခါသုံး ပစ္စည်းတွေ၊ စွန့်ပစ်အမှိုက်တွေသာ ဖြစ်တော့သည်။ လူ့ဘ၀မှာ တကယ်လိုအပ်သည်က ပျော်ရွှင်ခြင်းမဟုတ်၊ သတ္တိသာ ဖြစ်သည်ဟု ကျမ တွေးတောစ ပြုလာပြီ။
ကျမက ကျမလိုအပ်သည့်အရာမှာ ပျော်ရွှင်မှုဟု ထင်ခဲ့ဖူး၏။ ငွေကြေးဥစ္စာဟု ထင်ခဲ့ဖူး၏။ အောင်မြင်ကျော်ကြားမှုဟု ထင်ခဲ့ဖူး၏။ အဲဒါတွေကို ရမှဖြစ်မည်ဟု ထင်ကာ မနိုင်မနင်း သယ်ယူခဲ့ပြီးပြီ။ ကျမလိုအပ်သာ ဒါမဟုတ်ဘူးဟု သိသလိုလို ရှိလာချိန်မှာ ဒါတွေကို လွှင့်ပစ်ဖို့လည်း မဖြစ်နိုင်။ အဲသည်အရာတွေနှင့် ကျမက တော်တော်ကြီး ပေါင်းစပ်ငြိတွယ် နေခဲ့ပြီးပြီ မဟုတ်လား။ လှေကလေးပေါ့အောင် ကိုယ်ထိန်သိမ်းတိုင်း လိုရာရောက်အောင်က အဲဒါတွေကို ပစ်ချခဲ့မှ ရမည်ထင်ပါရဲ့။
အခုတော့ ကျမ ရွက်လည်း လွှင့်နေဆဲ။ လေးလံသော အပိုပစည်းများကိုလည်း လွှင့်ပစ်ဖို့ ကြံရွယ်ရင်း တွယ်ဖက်နေဆဲ။ လှေကလေး ခိုင်ခံ့ဖို့ ပြုပြင် တည်ဆောက် မှဖြစ်မည် ဟူသော အသိတရားကလေး ရေးရေးပေါ်လာပြန်တော့ အလုပ်စတင်ဖို့ တွန့်ဆုတ်နေဆဲ။ အဲသည်လိုနှင့် သည်လှေ၏ သက်တမ်းက လှေတစ်စင်း၏ ယေဘုယျသက်တမ်း ထက်ဝက်ပင်ကျော်ခဲ့ပြီ။ ရှေ့မှာ ခရီးက မိုင်ပေါင်းများစွာ ရေပြင်ကြီး ။ ဘာကမ်း.. ဘာသောင်မှ မမြင်ရသေးသည့် ရေပြင်ကျယ်ကြီး..။ သည်လှေနှင့် သည်ခရီး
မျှတပါရဲ့လား ကျမ မသိ။
ကျမ ....ဘာမှ.... မသိပါ..။
ဂျူး Facebook Page မှ
No comments:
Post a Comment