Miss International ပြိုင်ပွဲမှာ ဂုဏ်ရည်အေးကျော်က ကချင် ဝတ်စုံနဲ့ ဘာကြောင့် ယှဉ်ပြိုင်မှာလဲ

Miss Myanmar ဂုဏ်ရည်အေးကျော် (ဓာတ်ပုံ – ဂုဏ်ရည်အေးကျော် facebook မှ)

Miss Myanmar International 2013 ဂုဏ်ရည်အေးကျော်က ကချင်ပြည်နယ်နဲ့ လူမျိုးတွေဟာ မြန်မာနိုင်ငံရဲ့ အသွေးအသား ထဲက တခု အပါအ၀င်ပါ ဆိုတာကို သက်သေပြချင်တဲ့ အနေနဲ့ သူသွားရောက် ယှဉ်ပြိုင်မယ့် Miss International 2013 ပွဲရဲ့ အမျိုးသားဝတ်စုံနဲ့ ပြိုင်ပွဲကဏ္ဍမှာ ကချင်တိုင်းရင်းသား ၀တ်စုံကို ၀တ်ဆင်ပြီး ယှဉ်ပြိုင်သွားမယ်လို့ ဧရာဝတီကို ပြောပါတယ်။
“လက်ရှိ မြန်မာနိုင်ငံမှာ ကချင်နဲ့ မြန်မာတွေရဲ့ စစ်ပွဲတွေကြောင့် နိုင်ငံတကာကလည်း တော်တော်လေး အာရုံစိုက်နေတဲ့ အထဲမှာ ပါတယ်လေ။ အဲဒီတော့ ကချင်ဝတ်စုံကို ရွေးချယ်ခြင်းအားဖြင့် နိုင်ငံကို ကိုယ်စားပြုမယ့် ၀တ်စုံသည် ကချင်၊ ဆိုတော့ ကချင်လူမျိုးတွေ အတွက်ကိုရော ဗမာလူမျိုးတွေ အတွက်ကိုပါ ကျမတို့ ရင်ထဲမှာ တသွေးတည်း၊ တသားတည်း ရှိနေပါ သေးတယ်လို့ အဓိက ပြချင်တာပါ။ မြန်မာပြည်ရဲ့ အသွေးအသားထဲမှာ ကချင်ပြည်လည်း ပါပါတယ်ဆိုတာ သူတို့ကို သွေးချင်း အနေနဲ့ ယူဆထားတယ်။ အဲဒီတော့ မြန်မာနိုင်ငံ ကိုယ်စားပြုမယ့် ၀တ်စုံကို ကချင်အဖြစ် ရွေးချယ် ထားပါတယ်။ ဘာဖြစ်လို့လဲ ဆိုတော့ နိုင်ငံတကာကို ပြချင်တာက ဗမာနဲ့ ကချင်သည် အခုချိန်အထိ တသွေးတည်း၊ တသားတည်း ရှိနေပါတယ် ဆိုတာကိုပါ။ ဒါသည် ပြန်လည် စည်းလုံးညီညွတ်မှုကို ကိုယ်စားပြုချင်လို့ပါ။ ပြီးတော့ ကျမတို့ပြိုင်ပွဲ Logo ကလည်း Peace ပါတဲ့ အတွက်ကြောင့် မြန်မာနိုင်ငံရဲ့ ငြိမ်းချမ်းရေးကို ကျမတို့ ပြန်လည် ဖော်ဆောင်ချင်လို့ ကျမတို့ ၀ိုင်းစဉ်းစားပြီး ရွေးချယ် ထားတာပါ။ အဲဒီလို ပြသခွင့် ရနိုင်မယ့် အတွက်လည်း အရမ်း ကျေနပ်မိပါတယ်” လို့ ဂုဏ်ရည်အေးကျော်က ဆိုပါတယ်။

မန္တလေးသူ ဖြစ်တဲ့ ဂုဏ်ရည်အေးကျော် သွားရောက်ယှဉ်ပြိုင်မယ့် Miss International 2013 ပြိုင်ပွဲကို လာမယ့် ဒီဇင်ဘာလ ၁၇ ရက်နေ့ကျရင် ဂျပန်နိုင်ငံ တိုကျိုမြို့မှာ ကျင်းပတော့မှာပါ။
ဒီပြိုင်ပွဲကိုတော့ ပြီးခဲတဲ့ နှစ်က Miss Internet ရရှိဖို့အရေး Miss Myanmar နန်းခင်ဇေယျာကို လက်ညောင်းတဲ့အထိ အင်တာနက် စာမျက်နှာတွေပေါ်မှာ မဲပေးခဲ့ကြတယ် ဆိုရင် မှတ်မိ ကြမယ်ထင်ပါတယ်။
အခုလို မြန်မာနိုင်ငံ ကိုယ်စားပြုမယ့် မယ်မြန်မာ ဂုဏ်ရည်အေးကျော်ရဲ့ ကချင် တိုင်းရင်းသားဝတ်စုံကို ဖန်တီးပေးမှာကတော့ ကချင်တိုင်းရင်းသူ ဖြစ်တဲ့ ဒီဇိုင်နာ ဆန်းဘောက်ရာပါ။
သူ့အနေနဲ့ ကချင်ရိုးရာကိုသာ အခြေခံပြီး ပြန်လည် ဆန်းသစ်ထားတဲ့ ဒီဇိုင်းမျိုးနဲ့သာ ဖန်တီးပေးဖြစ်မယ်လို့ ဧရာဝတီကို ပြောပါတယ်။
“ရိုးရာပုံစံကိုပဲ အဓိက အသားပေးမှာပါ။ ရိုးရာ အစစ်ဆိုပေမယ့်လည်း ကျမတို့ရိုးရာအစစ်ကို လူတိုင်း တော်တော်များများ သိပြီးသားဆိုတော့ Modernize ဖြစ်မှာမဟုတ်ဘူး။ Fashion ဖြစ်မှာ မဟုတ်ဘူး။ ကျမတို့ ရိုးရာဝတ်စုံက ကိုယ်လုံးလည်း မပေါ်ဘူးလေ။ နောက် လူကို ၀စေတာပေ့ါနော်။ အဲဒီတော့ ရိုးရာကိုပဲ Modernize ပြန်လုပ်မှာပါ။ သူ့ခန္ဓာကိုယ်လည်း ပေါ်အောင်၊ သူနဲ့လည်း လုံးဝ Fit ဖြစ်တဲ့နောက် Miss နဲ့ ပိုပြီး သက်ဆိုင်နိုင်အောင် လုပ်ပေးမှာပါ။ ဒါပေမယ့် ရိုးရာအစစ်ကို နွှယ်ပြီးတော့ ရိုးရာဘက်ကိုပဲ ပိုသွားမှာပါ။ ကျမတို့ ကချင်ဝတ်စုံကို လူတိုင်းမြင်ထားတဲ့ ထမီအနီ၊ အင်္ကျီအနက်၊ နောက် ငွေမောင်းတွေနဲ့ ပစ္စည်း Accessories တွေ အကုန်ပါပါမယ်။ အဲဒါကိုမှ Modernize ဖြစ်အောင် သူ့ခန္ဓာကိုယ် အလှလည်း
ပေါ်အောင် ပြန်လုပ်ပေးမှာ” လို့ ဒီဇိုင်နာ ဆန်းဘောက်ရာက အင်္ကျီဒီဇိုင်းနဲ့ ပတ်သက်လို့ ရှင်းပြပါတယ်။
ဒ့ါအပြင် အစိုးရတပ်တွေနဲ့ ကချင်လက်နက်ကိုင်တွေ စစ်ပွဲတွေ ဖြစ်နေကြတဲ့ အချိန်မှာ ဂုဏ်ရည်အေးကျော်က ဒီဝတ်စုံကို ၀တ်ခြင်းအားဖြင့် အကုန်ုလုံး တန်းတူညီတူပဲ ဆိုတာရယ်၊ စစ်ပွဲတွေ အကုန် ရပ်စေချင်တယ်ဆိုတဲ့ သဘောရယ်နဲ့ ကချင်လည်း ပြည်ထောင်စု မြန်မာနိုင်ငံသားပဲ၊ အကုန်လုံး အတူတူပဲဆိုတာကို ပြချင်တဲ့အတွက်ကြောင့် ဒီဝတ်စုံကို ဂုဏ်ရည်အေးကျော်က ၀တ်ချင်တယ်လို့ ပြောတဲ့အကြောင်း၊ ဒါကြောင့် ပိုပြီး လုပ်ပေးချင်စိတ် ဖြစ်ခဲ့ရတာမို့ လုပ်ပေးဖြစ်ပြီး သူ့အနေနဲ့ အကောင်းဆုံးနဲ့ အလှဆုံးဖြစ်အောင် လုပ်ပေးမှာ ဖြစ်တဲ့အကြောင်းလည်း ဆန်းဘောက်ရာက ပြောပါတယ်။
ကချင် တိုင်းရင်းသူလည်း ဖြစ်တဲ့ အဆိုတော် ကေဂျာနူးကတော့ “အခုလို ကချင်ဝတ်စုံလေး ၀တ်မယ် ဆိုတဲ့အတွက် ကျမတို့ ကချင် အမျိုးသမီးတွေအနေနဲ့ ဂုဏ်ယူမိပါတယ်။ မြန်မာပြည် ကိုယ်စားပြုအနေနဲ့ မြန်မာပြည်က တိုင်းရင်းသားတွေရဲ့ ၀တ်စား ဆင်ယင်မှုလေး တွေကိုရော သယ်ဆောင်သွားမယ်၊ အခုလို တိုင်းရင်းသား လူမျိုးတွေကို ကိုယ်စားပြုတယ် ဆိုတော့ အရမ်း ကို ၀မ်းသာပါတယ်။ ကျမတို့ ကချင် တိုင်းရင်းသား ၀တ်စုံမှ မဟုတ်ပါဘူး။ တခြား တိုင်းရင်သား ၀တ်စုံတွေကို ၀တ်ဆင်မယ် ဆိုရင်လည်း ကျမတို့က ဂုဏ်ယူမှာပါ။ မြန်မာ ၀တ်စုံဝတ်ရင်လည်း ကျမတို့က ဂုဏ်ယူ နေပါတယ်။ အမြဲပဲ အားပေးနေပါတယ်။ ဒါပေမယ့် ၀တ်တဲ့အခါမှာ Modern Dress ၀တ်မယ်ဆိုရင် ကိစ္စမရှိဘူးပေါ့နော်။ Traditional ၀တ်ရင်တော့ မှန်မှန်ကန်ကန် လေး ၀တ်ဖို့ အဲဒါလေးပဲ သတိထားဖို့ လိုပါမယ်” လို့ သူရဲ့သဘောထားကို ရှင်းပြပါတယ်။
ကမ္ဘာမှာ စတုတ္ထအကြီးဆုံး မယ်ပြိုင်ပွဲဖြစ်တဲ့ Miss international 2013 ပြိုင်ပွဲကို မြန်မာနိုင်ငံ ကိုယ်စားပြု အနေနဲ့ သွားရောက် ယှဉ်ပြိုင်မယ့် ဂုဏ်ရည်အေးကျော်ရဲ့ အ၀တ်အစား ဒီဇိုင်းတွေကို မိုးကုတ်ပေါက်ပေါက်က အဓိက ပံ့ပိုး ကူညီပေးသွားမှာ ဖြစ်ပြီး ဒီဇိုင်နာ ပြည်စိုးအောင်၊ ဒီဇိုင်နာ ကောင်းမြတ်တို့ကလည်း အားဖြည့် ကူညီပေးမှာဖြစ်တဲ့အပြင် အမျိုးသား ၀တ်စုံအနေနဲ့ကတော့ ဒီဇိုင်နာ ဆန်းဘောက်ရာက ဖန်တီးပေးမှာပါ။
ဂုဏ်ရည်အေးကျော် အနေနဲ့ လက်ရှိမှာ ခန္ဓာကိုယ် ကြံ့ခိုင်ရေးအတွက် လေ့ကျင့် ပြင်ဆင်နေပြီး Talent Show ပြသရာ မှာတော့ မြန်မာ့တူရိယာ စောင်းနဲ့ ဂျပန်တေးသီချင်းကို တီးခတ် ယှဉ်ပြိုင်နိုင်ဖို့အတွက် ကြိုးစား လေ့ကျင့်နေတယ် လို့လည်း သိရပါတယ်။
“အခု လောလောဆယ် အားကစားပုံမှန် လုပ်ဖြစ်တယ်။ ခန္ဓာကိုယ် ကြံ့ခိုင်အောင်ပါ။ အင်္ဂလိပ်စာ အတွက် နောက်ထပ် သင်တန်းတွေ တက်ဖြစ်တာ၊ အခု အင်္ဂလိပ်စာလည်း ပိုပြီး ကောင်းလာပါတယ်။ နောက် Talent ရှိုးအတွက် Culture တွေ ဖလှယ်မယ့် ရှိုးလေးပါတယ်။ အဲဒီအတွက် မြန်မာ့စောင်း တီးပြမယ်။ မြန်မာသံ အဖွင့်၊ မြန်မာသံ အပိတ်နဲ့ ဂျပန်သီချင်း တီးသွားပါမယ်။ ကျန်တာကတော့ တချို့ Activies လေးတွေ ပါပါတယ်။ တချို့ပွဲအတွက် အင်္ကျီ အ၀တ်အစားတွေ၊ လေလံပစ်ရမယ့် ပစ္စည်းလေးတွေ သူတို့ တောင်းထားတယ်။ အဲဒီအတွက် ကျမတို့ ကြိုတင် ပြင်ဆင်ထားပါတယ်” လို့ ဂုဏ်ရည်အေးကျော်က ပြောပါတယ်။
ကာလ အတော်ကြာဖြစ်ပွားနေတဲ့ ကချင်ပြည်နယ်က စစ်မီးတွေ ငြိမ်းဖို့ရန်အတွက် အနုပညာသမားတွေ သာမက၊ ပြည်သူ အမြောက်အများ ကပါ ငြိမ်းချမ်းရေးအတွက် တောင်းဆိုနေခဲ့တာ ကြာလှပါပြီ။ အခုလို နိုင်ငံတကာ မယ်ပြိုင်ပွဲမှာ မြန်မာနိုင်ငံ ကိုယ်စားပြုအဖြစ် သွားရောက် ယှဉ်ပြိုင်မယ့် အလှမယ် မန္တလေးသူ ဂုဏ်ရည် အေးကျော်က မြန်မာပြည် ငြိမ်းချမ်းရေးနဲ့ ပြည်လည် စည်းလုံးညီညွတ်ရေးကို ရည်စူးလို့ ပထအဆုံးအဖြစ် နိုင်ငံကိုယ်စားပြု အမျိုးသားဝတ်စုံကို ကချင်တိုင်းရင်းသား ဝတ်စုံ ၀တ်ဆင် ပြသတော့မှာပါ။ ဒီလိုပြသမှုဟာ ဒီပြိုင်ပွဲက တဆင့် နိုင်ငံတကာ အလယ်မှာ မြန်မာပြည် ငြိမ်းချမ်းရေးအတွက် ဘယ်လောက် အထိ အကျိုးသက်ရောက်မှု ရှိလာနိုင်မလဲ ဆိုတာ မစပ်စုနဲ့ အတူ အားလုံးလည်း စောင့်မျှော်နေကြမယ်လို့ ယုံကြည်ရင်း …။

Irrawaddy News