မင်းလူ ၏ အများနှင့် မသက်ဆိုင်သောသူ, အပိုင်း (၈)

ထိုအခါ ဒေါ်ငွေဇံက "မယ်လိုဒီ"တစ်မျိုးပြောင်းလာပြန်၏။ မြလွင်က တစ်ဆင့် မပြောတော့ဘဲ ချစ်ဦး ကို သူကိုယ်တိုင် တိုက်ရိုက်ဖွင့်ပြောခြင်းပင်ဖြစ်၏။ ပြောပုံက ပညာသားပါသည်။ ချစ်ဦးကိုယ်တိုင် လိုလို လားလား ဖြစ်ရအောင်......
"ချစ်ရူးရယ်၊ ညညကျရင် မင်းရဲ့ ဟောက်သံက တော်တော်ပြင်းတာပဲကိုး"
ဟု စကားစသည်။ ချစ်ဦးက....
"ဟုတ်ရဲ့လား အဒေါ်ကြီးရာ၊ ကျွန်တော့်ဘာသာတောင် ဘာမှမကြားဘဲနဲ့"
"ဟဲ....ဟောက်တယ်ဆို ကာယကံရှင်က ကြားရတာမျိုးမဟုတ်ဘူး၊ ဘေးလူကသာ နားမခံနိုင်တာ"

"သြော်...ဟုတ်မယ်၊ ဟုတ်မယ်၊ ကင်းတဲမှာ ကိုဘိုလေး အိပ်ရင်လည်း  ဒီအတိုင်းဘဲ"
''အေးပေါ့၊ ဒါတွင်မကဘူး၊ မင်းက ထထပြီး ယောင်တတ်သေးတယ်''
''ယောင်တယ် ဟုတ်လား၊ ဘယ်လိုယောင်တာလဲ''
ဒေါ်ငွေဇံ ရုတ်တရက် ဖြေရခက်သွား၏။ ပြီးမှ ...
''ဘာတွေမှန်း မသိပါဘူး၊ ဗလုံးဗထွေးနဲ့ အော်တာပဲ၊ အသံကလည်း တော်တော်ကျယ်တယ်၊ အဲဒါ ... မင်း တူမ က လန့်နိုးပြီး ငိုပါလေရော''
''ဟင် ... သဲသဲက''

ဟုတ်တယ်၊ ပြီးတော့ ကြောက်တယ်၊ ကြောက်တယ်နဲ့၊ ဘယ်လိုမှ ချော့လို့ မရဘူး၊ တက်သွားချက်သွား မလား တောင် အောက်မေ့ရတယ်''
''ဟင် ဒါဆိုရင်တော့ မဖြစ်ဘူး၊ ဘယ်လိုလုပ်ရကောင်းမလဲ''
ချစ်ဦးကို အညှာကိုင်မိပြီဖြစ်ကြောင်း ဒေါ်ငွေဇံ သိသည်။ ထို့ကြောင့် ...
''ကိုယ့်ဘာသာ မဖြစ်အောင် ထိန်းပေါ့''
''ဟာဗျာ၊ ဒါတော့ အာမမခံနိုင်ဘး၊ အိပ်နေရင်းနဲ့ သူ့ဟာသူဖြစ်တာ ဘယ်တတ်နိုင်မလဲ ... အင်း''
ချစ်ဦးက စဉ်းစားနေသည်။ သူ့ဆီက ပေါက်ကရ အကြံအစည်တစ်ခုခု ထွက်လာလျှင် ခက်မည်။ ဒီတော့ ...
''ငါ စဉ်းစားမိတာ တစ်ခုတော့ ရှိတယ်။ အိမ်ဘေးကွက်လပ်မှာ တဲကလေးတစ်လုံး ထိုးပြီး မင်းတစ်ယောက် တည်း ခွဲနေရင် ကောင်းမလားလို့''

''ဟာ ... ကောင်းတယ်ဗျ၊ ကောင်းတယ်''
''မင်းလည်း လွတ်လွတ်လပ်လပ် နေချင်သလို နေလို့ရတာပေါ့''
''ဟုတ်တယ်၊ အခု ကျွန်တော်က အိမ်ရှေ့ခန်းမှာ  အိပ်တာဆိုတော့ အစောကြီး မထလို့ မရဘူး၊ ပြီးတော့ ကျွန်တော် က အိပ်ရင် ဖင်တွေဘာတွေ ပေါ်တတ်လို့ အမြဲသတိထားနေရတာ၊ ကျွန်တော့်ဘာသာ တစ်ယောက် တည်း နေရရင် ကြိုက်သလို အိပ်လို့ ရပြီ၊ ကောင်းတယ်ဗျာ''
သဲသဲ ကို အကြောင်းပြလိုက်လျှင် ချစ်ဦး ပျာပျာသလဲ ဖြစ်သွားမှာပဲဟု ဒေါ်ငွေဇံ တွက်ခဲ့တာ မှန် သွားသည်။ အိပ်ခွဲနေဖို့ကိစ္စကို ချစ်င်္ဦးက ထင်ထားတာထက်တောင် ပိုပြီး လွယ်လွယ်ကူကူ လက်ခံခဲ့သည်။
မြလွင်ကတော့ သူ့အမေ လူလည်ကျပုံကြောင့် ကျိတ်ပြီး သက်ပြင်းသာချမိ၏။
 

(၁၃)

ကာရာအိုကေဆိုင်တွေ ရှိတာ ကောင်းလည်း ကောင်းသည်။ မကောင်းလည်း မကောင်းဘူး။
ကောင်းချက်ကတော့ ...
လူငယ်တွေ အတွက် ထွက်ပေါက်တစ်ခု ရသွားခြင်းပင် ဖြစ်၏။ ဟိုအရင်က သီချင်းဆိုချင်လျှင် ရေချိုးရင်း ဆိုချင်ဆို၊ ညကျမှ လမ်းလျှောက်ရင် ဟစ်ချင်ဟစ်၊ လမ်းထိပ်အုတ်ခုံမှာ ထိုင်ပြီး ဂစ်တာတီးရင်း ဟဲချင် ဟဲ ရသည်။ ကိုယ့်အသံက သိပ်မကောင်းလျှင် သူများမကြားအောင် တုိးတိုးညည်းရသည်။ အိမ်နေရင်း သီချင်း အော်ဆိုလျှင် လူကြီးတွေက နားပူလို့ဆိုပြီး ဆူတာခံရသေးသည်။
မိုက်ကရိုဖုန်း နှင့် ဆောင်းဗောက်နှင့် ဆိုခွင့်ရဖို့ဆိုတာ သိပ်လွယ်တာ မဟုတ်။ အလှူမှာ အသံချဲ့စက် ပါလာ လို့ စက်ဆရာ ကို စီးကရက်တိုက်ပြီး ''ဟဲလို တက် စတင်း'' ၀င်အော်ခွင့်ရတာလောက်ကို ဟုတ်လှပြီ ထင်ခဲ့ရတာလေ။

အရပ်တီးဝိုင်းအဖွဲ့မှာ ဒုံမင်း၊ မယ်ဒလင်၊ မြန်မာဂီတာတွေနဲ့ ဆိုကြတီးကြတဲ့ လူတွေဆို စတားပဲပေ့ါ။ တန်ဆောင်တိုင် တို့ လွတ်လပ်ရေးပွဲတို့မှာ ကျင်းပတတ်တဲ့ အဆိုပြိုင်ပွဲတွေမှာ တော်ရုံလူ ၀င်မပြိုင်ရဲကြ။ တချို့ လည်း သူများတွေ မြှောက်ပေးလို့ စင်ပေါ်တက်လာမိသည်။ တကယ်လည်းဆိုလိုက်ရော ဒူးတွေ တုန်၊ အသံတွေတုန်လာပြီး အရင်က တစ်ရေးနိုးထဆိုလို့တောင်ရတဲ့ သီချင်းကို တစ်ဝက်တစ်ပျက်နဲ့ မေ့ပြီး စင်ပေါ် ကနေ ရှက်ကိုးရှက်ကန်း ပြေးဆင်းခဲ့ရတာမျိုး ကြုံခဲ့ရသည်။

ခုကျတော့ ဒီလို မဟုတ်တော့။ မိုက်ကရိုဖုန်းဆိုတာ ရှေ့တည့်တည့်ကနေ မျက်နှာကို လောင်ချာနဲ့ တေ့ ချိန် ထားသလို ကြောက်စရာကြီး မဟုတ်တော့။ ကလေးတွေတောင် မိုက်ကရိုဖုန်းနဲ့ ငိုသံစမ်းလို့ ရနေပြီ။ ကာရာအိုကေ ခေတ်ရောက်လာပြီကိုး။
ရပ်ကွက်တစ်ခုမှာ ကောင်စီရုံးခန်း တစ်ခု ရှိရသလို အနည်းဆုံး လက်ဖက်ရည်ဆိုင်တစ်ဆိုင်၊ ဆေးခန်း တစ်ခန်း၊ ဘီအီးဆိုင်တစ်ဆိုင်၊ ဘီလိယက်ခုံတစ်ခုံ၊ ဗီဒီယိုရုံနှင့်အတူ ကာရာအိုကေခန်းတစ်ခန်းတော့ ရှိမှ ခေတ်မီဖွံ့ဖြိုးတိုးတတ်သော ရပ်ကွက်ဟု ခေါ်ဆိုနိုင်သည်။
လူငယ်များအနေဖြင့် ကိုယ်အသံကို စမ်းသပ်လိုလျှင် တစ်ပုဒ်ငါးဆယ်ပေးပြီး ဆိုလို့ရပြီ။ ရည်းစားနဲ့ ကွဲလာတဲ့ကောင် ကလည်း နာစရာကို အရက်နဲ့ဖြေစရာမလို။ ကာရာအိုကေခန်းဝင်ပြီး ''ငါ မင်းကို သတ်ချင် တယ်'' ဟု ဟစ်လိုက်ရုံပဲ။

လူငယ်တွေအတွက်သာ မဟုတ်။ အဆိုဝါသနာရှင် လူလတ်တွေ လူကြီးတွေအတွက်လည်း အဆင်ပြေ သည်။ အသက်ကလေး နည်းနည်းရလာတော့ နေရာတကာတိုင်းမှာဆိုလို့ မသင့်လျော်တော့။ အိမ်မှာ အိမ်ထောင်ဦးစီး ဖြစ်နေပြီ။ သားတွေ သမီးတွေလည်း ရှိနေပြီ။ သူတို့ရှေ့မှာ ''ချစ်သူရှိရာ ... ဒီဌာနဆီသို့'' ဆိုတာ မျိုး လုပ်လျှင် ကလေးတွေ ပြုံးစေ့စေ့ ဖြစ်ကုန်ကြမည်။ ကာရာအိုကေဆိုင်မှာဆိုလျှင် ဘယ်သူကမှ ကဲ့ရဲ့မှာ မဟုတ်။
ပြီးတော့ ... ကိုယ်က ဌာနဆိုင်ရာ လူကြီး၊ ရပ်ကွက်ထဲမှာလည်း သာရေး နာရေး အဖွဲ့ဝင်၊ အားလုံးက ရိုသေ လေးစားကြရတာ။ ဒီလိုပုဂ္ဂိုလ်မျိုးက အိမ်ရှေ့က သစ်ပင်အောက်မှာ ထိုင်ပြီး ''အချစ်ကို ဘယ်လို ပြောရမယ်'' ဆိုတာမျိုး လုပ်လို့မရ။

ဒီတော့ ဘာလုပ်မလဲ။ ကာရာအိုကေဘားဆီသွားပေါ့။ ယမကာလေးနဲ့ ရဲဆေးတင်ပြီးရင် ဆိုပေတော့။ ဟိုမှာကျတော့ ဘယ်သူ့ဘယ်သူ့မှ ရှက်နေစရာမလို။ ''အက်တိကက်'' တွေ ဘာတွေလည်း မလို။ အားလုံး သူလို ကိုယ်လိုချည်းပဲ၊ ကြည့်လေ။

''ဆုံးရှုံးခြင်းသာ ရင်မှာ ပိုက်လို့ ငိုရှိုက်ကာ အဝေးပြေးရပါတော့မည်'' လို့ ခံစားချက်ကို ဖွင့်ဟသီဆိုနေတာ ဗဟိုတရားရုံးရှေ့နေပေါ့။ အရာရှိကြီး တစ်ယောက်ကတော့ ''ပေးကားပေး၏ မရသည်ပမာ'' တဲ့ ပြီးတော့ ''လကွယ်ညသန်းခေါင်ယံအလယ်မှာ မဟူရာကျောက်ရိုင်းတစ်လုံးကို လူတကာ ကောက်ခိုင်းဦးတော့၊ ရှာလို့ တွေ့ချင်တွေ့ပါလိမ့်မယ်'' ဆိုတဲ့ သူကတော့ မျက်စိအထူးကုဆရာဝန်လေ။
အမယ် ဒါဘာဟုတ်သေးလို့လဲ။ နိုင်ငံကျော်စာရေးဆရာကြီး တစ်ယောက်ကလည်း ဆိုင်က အဆိုတော် ကောင်မလေးနဲ့ တွဲပြီး ...
''အချစ်ဦးရေ၊ သောကဟူသမျှ အတူတကွ၊ မျှခံစားဝေ အသည်းနှလုံးက ဒီလောက်ချစ်ကြ'' ဆိုတာမျိုး လုပ်သေးတာကော။

တချို့ကတော့ ဒါကို လူကြီးပေါနည်းတစ်မျိုးဟု အမနာပြောချင်ကြသည်။ စိတ်ပညာရှင်ကြီး ''ဖရိုက်''က လူတို့တွင် ''လီဘီဒို'' ဟုခေါ်သော စိတ်ရိုင်းကြီးသည် အမြဲကိန်းအောင်နေတတ်သည်။ လူ့ကျင့်ဝတ်တွေ၊ စည်းမျဉ်းစည်းကမ်းတွေ၊ ဥပဒေတွေနဲ့ ထိန်းချုပ်ထားလို့သာ ငုပ်လျှိုးနေခြင်း ဖြစ်၏။ အခွင့်သာတဲ့ အခါတိုင်း ထိုစိတ်ရိုင်ကြီး က လှစ်ခနဲ လှစ်ခနဲ ခေါင်းထောင်လာတတ်သည်ဟု ဆို၏။
လီဘီဒိုခေါ် စိတ်ရိုင်းတော့မသိ။ ''ပေါစိတ်'' ကတော့ လူတိုင်းမှာ ရှိနေတာသေချာသည်။ ဂုဏ်သိက္ခာတွေ ထိန်းသိမ်းနေရလို့သာ အောင့်ထားရတာ။ တစ်ကိုယ်တည်း လွတ်လွတ်လပ်လပ် ရှိတဲ့အခါမျိုးမှာ တစ်ကြိမ် မဟုတ်တစ်ကြိမ် တစ်နည်းမဟုတ် တစ်နည်းတော့ ပေါဖူးတဲ့လူတွေချည်း ဖြစ်မျာပါ။ (အနည်းဆုံး ကိုယ့်ရုပ် ကိုယ် မှန်ထဲကြည့်ပြီး ပြုံးပြမိတာမျိုးတော့ ရှိလိမ့်မည်။)
ဟိုအရင်က ဆိုလျှင် တစ်နှစ်လုံး အောင့်အီးနေခဲ့ကြရပြီး သင်္ကြန်တွင်းကျမှသာ တရားဝင် ပေါခွင့် ရကြသည်။ ခုတော့ ကာရာအိုကေဘားတွေ ပေါ်လာပြီဖြစ်သဖြင့် ပိုက်ဆံများ ရှိလို့ကတော့ ညစဉ်ညတိုင်း တောင် ပေါခွင့်ရကြပေပြီ။

တကယ်တော့ ပေါတယ်ဆိုတာ အပြစ်ကျူးလွန်းခြင်းထက်စာလျှင် ပွင့်ပွင့်လင်းလင်း ပေါတာက ပိုပြီး ဂုဏ်ရှိပါသေးသည်။
စိတ်ဆိုတာက သိပ်ပြီး ချုပ်တည်းရလွန်းလျှင် ဖိစီးမှုများလာတတ်၏။ တစ်ခါတစ်လေ ထွက်ပေါက်ကလေး ပေးပါမှ သက်သာရာရလိမ့်မည်။
ဒါတွေကတော့ ကာရာအိုကေရဲ့ ကောင်းချက်၊ အားသာချက်တွေပေါ့။

မကောင်းတာကတော့ ဘေးပတ်ဝန်းကျင်တွေ နားမခံသာခြင်းပင် ဖြစ်၏။ စည်းကမ်းအတိုင်းဆိုလျှင်တော့ ကာရာအိုကေခန်းများသည် ဘေးပတ်ဝန်းကျင်ကို ထိခိုက်အောင် အသံကျယ်လောင်စွာ မဖွင့်ရ။ အခန်းကို လည်း အသံလုံအောင် ပြုလုပ်ထားရမည်။ သို့ရာတွင် အများစုကတော့ ၀ိနည်းလွတ်အောင် အခန်း၏ ၀င်ပေါက်ဘက်မှာ မှန်ကာထားတာလောက်သာ ရှိ၏။ ကျန်သုံးဖက်ကတော့ ထုံးစံအတိုင်းပါ။
ဆိုတဲ့ လူတွေကလည်း ကိုယ့်ဘာသာကြားနိုင်ရုံလောက်နှင့် အားမရ။

တစ်ပုဒ်ငါးဆယ်တောင် ပေးဆိုရတာဆိုတော့ ကိုယ့်အသံကို ဘေးလူတွေပါ ကြားမှ တန်မှာပေါ့ဟု တွက်ပြီးအသားကုန်အော်ကြ သည်။
ကာရာအိုကေဘားတွေမှာ မွေးနေ့ပွဲတို့၊ နှစ်သစ်ကူးပွဲလုပ်လျှင် ပိုဆိုးသည်။ တစ်ယောက်ပြီးတစ်ယောက် တက်ဟဲနေကြတာ သန်းခေါင်ကျော်လို့ လင်းအားကြီးထိ မပြီးနိုင်။ မွေးနေ့ရှင်က အဆိုဝါသနာအိုးဆိုလျှင် တော့ သူ့ကိုချည်း ပွဲတောင်းပေးရသည်။ သူကလည်း မိုက်ကရိုဖုန်းကို လက်ကမချတော့။ ဒီလိုဆိုချင်လို့ပဲ ငွေကုန်ကြေးကျခံပြီး မွေးနေ့ပွဲလုပ်တာ မဟုတ်လား။
ဒီလိုနဲ့ တစ်ပုဒ်ပြီး တစ်ပုဒ်ဆိုလိုက်တာ အသံတွေ အက်ကွဲကုန်တာောတင် ဂရုမစိုက်တော့။ တစ်ပုဒ်ဆိုလိုက် တစ်ခွက်မော့လိုက်နဲ့ နောက်ဆုံးစာသားတွေလည်း မပီသတော့။ သံစဉ်တွေလည်း မမှန်တော့။ မူးကလည်း မူးနေတော့ ၀မ်းခေါင်းသံကြီးနှင့် ညှစ်ညှစ်ပြီး အော်လိုက်တာ ၀က်သတ်ရုံနားမှာ သွားနေတာကမှ သာယာ နာပျော်ဖွယ် ရှိလိမ့်ဦးမည်။ ဒီကြားထဲ သူ့ခံစားချက်တွေကို စင်ပေါ်ကနေ ပြောနေသေးသည်။

ဒီတော့ အနီးအနားမှာ နေတဲ့ လူတွေအဖို့ နေ့ဘက်ကျတော့လည်း အလှူခံမဏ္ဍပ်ကအော်၊ ညဘက် ကျတော့လည်း ကာရာအိုကေက ဆော်တာနဲ့ပဲ နားတွေအူ၊ ခေါင်းတွေကိုက်၊ သွေးတွေတက်၊ လူမမာတွေလည်း ရောဂါတွေတိုးပေါ့။ ဘာပဲဖြစ်ဖြစ် ကာရာအိုကေ ယဉ်ကျေးမှုကတော့ တောထဲ တောင်ထဲ ထိတောင် ပျံ့နှံ့နေပြီ။
ချစ်ဦးတို့ ရပ်ကွက်ထဲက ကာရာအိုကေခန်းကတော့ ရှေ့ပိုင်းမျက်နှာစာ တစ်ဝက်ကို မှန်ကာပေးထားပြီး ဘေးပတ်လည်က ၀ါးထရံသာ ဖြစ်၏။ တီဗွီက ၀မ်းတင်း ခေါ် ဒိုခေါ် ၁၁၀ ဗို့သုံးစက် ဖြစ်၏။ ဗီစီဒီကတော့ တရုတ်ပြည်ဖြစ် ကို သုံးထားသည်။ ဆောင်းဘောကအလတ်စား နှစ်လုံးတပ်ပေးထားသည်။

လူငယ်တွေလာဆိုကြတာ များသည်။ လူလတ်ပိုင်းတွေလည်း လာကြသည်။ လူငယ်တွေက ဇော်ဝင်းထွဋ်၊ စည်သူလွင်၊ ဇော်ပိုင်၊ မျိုးကြီး၊ ထူးအယ်လင်း၊ အောင်မျိုးထွကျပ်တို့ကို ကြိုက်ကြသည်။ လူလတ်ပိုင်းတွေ ကတော့ စိုင်းထီးဆိုင်တို့၊ ခင်မောင်တိုးတို့ပေါ့။ ညဘက် လူရှင်းချိန်ကျမှ ရောက်လာတတ်သော လူကြီးတွေ အတွက် လည်း ကိုတင်လှိုင်၊ ကိုသန်းလှိုင်၊ စန္ဒားရား ချစ်ဆွေ၊ စန္ဒားရား လှထွတ်တို့ သီးချင်းတွေ ထားပေး ရ သေးသည်။

ဒီကိုလာတဲ့ လူတွေရဲ့ ဆိုပုံဆိုလက်တွေကတော့ မျိုးစုံပဲ။ မူရင်းအဆိုတော်လောက်နီးပါး ထူးထူးခြားခြား ကောင်းအောင် ဆိုတတ်သူတွေ အနည်းအပါး ရှိ၏။ အများစုကတော့ တော်ရုံသင်ရုံ ဆိုနိုင်ကြသည်။ တချို့ ကတော့ ကီးကိုက်အောင် မဆိုနိုင်ဘဲ သံကြောင်တွေ ဖြစ်ဖြစ်သွားတတ်သည်။ စကားလုံးတွေကို အလျင်မီ အောင် မဆိုနိုင်သဖြင့် နောက်က အလျင်အမြန်လိုက်ရသောကြောင့် သံစဉ် လွဲချော် ကုန်တာလည်း ရှိ၏။ သို့သော်လည်း အဆိုပြိုင်ပွဲဝင်ဖို့ ရည်ရွယ်ချက်ရှိသူများ မဟုတ်ကြသဖြင့် ပြဿနာ မရှိ။

အားလုံးထဲမှ ချစ်ဦးကိုတော့ ဘယ်သူမှ မမှီ။ သူများတွေက ကိုယ်ပိုင်တဲ့ သီချင်းကိုပဲ ရွေးပြီးဆိုနိုင်တာ။ ချစ်ဦးကတော့ ဘယ်သီချင်းပဲဖြစ်ဖြစ် မဆိုနိုင်ဘူးရယ်လို့ မရှိ။ သီချင်းတွေ ဘာတွေ ရွေးနေတာလည်း မဟုတ်။ သူရောက်လာလျှင် ''သီချင်းတစ်ပုဒ်ဖွင့်ဗျာ'' ဟုပြောပြီး ကြုံရာကျရာကို ဆိုပစ်လိုက်တာပဲ။

သူက ဘယ်သီချင်းဖြစ်စြဖ် ဆိုလို့ရတာပေါ့။ မူရင်းသံစဉ်နဲ့ဆိုတာမှ မဟုတ်တာ။ သူ့ကိုယ်ပိုင်သံစဉ်နဲ့ သူဆိုတာကိုး။ စာသားတွေကလည်း တီဗွီဖန်သားပြင်ပေါ်မှာ ပေါ်လာနေတာဆိုတော့ မရဘဲ ဘယ်ရှိ ပါ့မလဲ။ တီးလုံးသံစဉ်က တီးချင်တာတီး၊ သူကလည်း ဆိုချင်သလိုဆို။ တစ်ခါ တစခါ သူ့ကိုယ်ပိုင် သံစဉ်ကတောင် ပိုကောင်းသလိုလိုပဲ။
ဒီနေ့တော့ သီချင်းစီဒီအသစ် ထွက်မည်ဟု ဆိုသဖြင့် အသံစမ်းချင်တဲ့လူတွေ အတော်များများ ရောက်လာ ကြသည်။ ဇော်ပိုင်ရဲ့ နောက်ဆုံးထွက်တဲ့ စီးရီးဆိုတော့ အရမ်းစိတ်ဝင်းစားနေကြသည်။ ပြဿနာကတော့ တီဗွီက ဖွင့်လို့မရခြင်းပင် ဖြစ်၏။ တီဗွီက ၁၁၀ဗို့အား သုံးဖြစ်၏။ အိမ်သုံး ၂၂၀ဗို့လျှော့ချဖို့ကြားမှာ မိန်းထုပ် ဟုခေါ်ကြသော ထရန်စဖော်မာခံ ပေးရသည်။  အခု ထိုမိန်းထုပ်ပျက်သွားဟန် တူသည်။ တီဗွီ ထဲက လျှပ်စစ်အား ၀င်မလာတော့။

တတ်ကျွမ်းနားလည်သော ဆိုင်ရှင်ကလည်း မရှိ။ လက်ထောက်ကောင်လေးကလည်း မလုပ်တတ်။ ဆိုမယ့် လူတွေ ကလည်း တစ်အုပ်စုကြီး ရောက်နေပြီ။
''မြန်မြန်လုပ်ပါကွ''
''မင်း မပြင်တတ်ဘူးလား''
''ဆိုင်ရှင် သွားခေါ်ကွာ''
စသည်ဖြင့် အရေးဆိုကြသဖြင့် ဆိုင်ကကောင်လေးမှာ ဘာလုပ်ရမှန်းမသိဘဲ ဒုက္ခရောက်နေရှာသည်။ ထိုစဉ်မှာပင် ချစ်ဦး ရောက်ရှိလာလေသည်။

''ဒီနေ့တော့ ငါအရင်ဆိုမယ်ကွာ၊ ကြိုက်တဲ့သီချင်းဖွင့်ဟေ့''
ဟု သူက ပြောသည်။ ဆိုင်မှ ကောင်လေးက ...
''အရေးထဲကွာ၊ ဒီမှာ စက်ပျက်လို့ စိတ်ညစ်နေရတဲ့ကြားထဲ''
''စက်ပျက်တယ် ဟုတ်လား၊ ဘာဖြစ်တာလဲ''
''မိန်းထုပ်က ပျက်နေလို့ကွ၊ တီဗွီထဲကို ပါဝါမ၀င်ဘူး ဖြစ်နေတယ်''
''ဒါများကွာ၊ ဘာခက်လုိ့လဲ''
''ဟင် ... မင်းလုပ်တတ်လို့လား''

ကောင်လေးမှာ ထူပူနေသဖြင့် ချစ်ဦးကို အားကိုချင်သလိုလို ဖြစ်သွား၏။ ချစ်ဦးက ...
''ဦးနှောက်ကလေး နည်းနည်းသုံးလိုက်ရင် ရပါတယ်ကွာ်၊ မိန်းထုပ်မပါဘဲ ဒါရိုက်ဆက်ပြီး ဖွင့်မှာပေါ့''
''ဟာ ... ဒါကတော့ မရဘူး၊ ဒါရိုက်ဆို လောင်သွားမှာပေါ့၊ အဲဒီလို မလုပ်ရဘူးလို့ အစ်ကိုက မှာထားတယ်''
''ဥာဏ်ကို လွှာသုံးစမ်းပါကွာ၊ မင်းစဉ်းစားကြည့်စမ်း၊ အိမ်မီးက ၂၂၀ဗို့ ရှိတယ်။ တီဗွီက ၁၁၀ဗို့ သုံးတယ်။ ဒီတော့ အိမ်မီးက ၀ါယာနှစ်စမှာ တစ်စကို ဖြုတ်လိုက်ရင် ပါဝါတစ်ဝက် လျော့သွားတော့ ၁၁၀ဗို့ ဖြစ်သွား တာပေါ့ကွ''
''ဟင် ... ဟုတ်လို့လား''

ဘေးက နားထောင်နေသူတွေလည်း ဆိုချင်ဇောနှင့် ...
''အေးကွ ...၊ ဖြစ်နိုင်တယ်''
''ဟေ့ကောင်၊ စမ်းကြည့်ကွာ''
စသည်ဖြင့် ပြောကြတော့ ကောင်လေးမှာ ဇဝေဇ၀ါ ဖြစ်လာသည်။
ချစ်ဦးပြောသလို လုပ်ကြည့်ရကောင်းနိုးနိုးဖြစ်ပြီး ၀ါယာကြိုးကို ကောက်ကိုင် ပလပ်ခေါင်းကို ဖွင့်ပြီး ၀ါယာတစ်ဖြုတ်နေတုန်း ဆိုင်ရှင်က ကံကောင်းထောက်မစွာ ရောက်ရှိလာ၏။
''ဘာဖြစ်နေကြတာလဲဟေ့''

ကောင်လေးက တူးတွမ်တိကို ၀ါယာကြိုးတစ်စဖြုတ်လိုက်လျှင် ၀မ်းတမ်း ဖြစ်သည်ဆိုသော ချစ်ဦး၏ သီအိုရီကို ပြောပြလိုက်သည်။ ဆိုင်ရှင်က မျက်လုံးပြူးသွားပြီး ...
''ဟာ ချစ်ရူးရာ၊ မင်းတော်တော် ရှုပ်တဲ့ကောင်ပါလား၊ အဲဒီလို လုပ်လို့ရမှာတော့ ဘယ်သူက ပိုက်ဆံ အကုန်ခံပြီး မိန်းထုပ်ဝယ်ဆင်တော့မှာလဲ ကံကောင်းလို့ပါလားကွာ''
ချစ်ဦးကတော့ ဒီအတိုင်းပဲ။ ဟိုတစ်ခါလည်း ဗီဒီယိုရုံမှာ ဒါမျိုး ဖြစ်ခဲ့ဖူးသည်။ သိမ်းပိုင်းပါမလာခဲ့။ ပရိသတ် က ပူညံ ပူညံလုပ်တော့ ရုံကလူ ပျာယာခတ်သွားသည်။ ထိုအခါ ချစ်ဦးက ...
''ဘီဆိုက် ထဲမှာ ရှိမယ်ထင်တယ်''

ဟု ပြောလိုက်သည်။ ကက်ဆက်သီချင်းတိပ်ခွေတွေဆိုလျှင် အေဆိုက်၊ ဘီဆိုက် နှစ်ဖက်လှည့်ဖွင့်လို့ရတာ ကိုး။ ရုံကလူလည်း ထူပူနေသဖြင့် သေသေချာချာ ပြောင်းပြန်လှန်ပြီး အတင်းထိုးထည့်မိ၏။ ကံကောင်းလို့ စက်အစိတ်အပိုင်းတွေ ပျက်စီးမသွားခြင်း ဖြစ်လေ၏။

ဆက်ရန်
 http://www.shwezinu.com