menu

Thursday 20 March 2014

လေထန်ကုန်းလက်သည်များ...(မင်းလူ)



    ဒီအကြောင်းကို မေ့မေ့လျော့လျော့ ပေါ့ပေါ့ဆဆနေခဲ့မိ၏။ အရေးမပါလောက်ဘူးဟု ထင်သောကြောင့်ဖြစ်၏။
    သို့ရာတွင် အစဖော်သူများရှိလာသဖြင့် ပြန်လည်စဉ်းစားသုံးသပ်ရပါတော့သည်။
    တစ်လောက အင်တာဗျူးဂျာနယ်မှာ အယ်ဒီတာများ၏တာဝန်ပေးချက်အရဆိုပြီး တူးတူးသာဆိုသောမိန်းကလေး ကျွန်တော့်ဆီ ရောက်လာသည်။ သူနှင့်ကျွန်တော်မှာ နဂိုကတည်းက သိကျွမ်းပြီးသားဖြစ်၏။ သူသည် ကာတွန်းဆရာအနောင်၏ သမီးဖြစ်ပြီး ဆရာအောင်ပြည့်၏တူမလည်းဖြစ်၏။ သူက မေးစရာလေး ရှိလို့ပါဟု ဆို၏။
    ကျွန်တော်သည် ခုနောက်ပိုင်းမှာ အင်တာဗျူးတွေကို ရှောင်လေ့ရှိသည်။ ပြောစရာထွေထွေထူးထူးလည်းမရှိလှ။ ထူးထူးခြားခြားရှိလာလျှင်လည်း ဂျာနယ်တွေမှာ ဆောင်းပါးရေးပြီး တင်ပြလို့ရသောကြောင့်လည်းဖြစ်၏။
    ခုတစ်ခါတော့ မဗျူးလို့မဖြစ်သည့်အခြေအနေ။ တူးတူးသာက ယခုလာရောက်ရသည့်ကိစ္စမှာ သူ၏ဂျာနယ်သမား ဘ၀တွင် ပထဦးဆုံးသော အားထုတ်ကြိုးပမ်းမှုဖြစ်ပါသည်ဟု ဆို၏။ ကျွန်တော့်အနေဖြင့် တက်ကြွနေသော မျိုးဆက်သစ် လူငယ်တစ်ယောက်၏ ပွဲဦးထွက်အတွေ့အကြုံကို အလဲလဲအပြိုပြို တပ်လှန့်သွားတာမျိုးမဖြစ်စေချင်။ ပြီးတော့ သူက အင်တာဗျူးဆိုသော်လည်း အားလုံးပေါင်းမှ မေးခွန်းတစ်ခုတည်းသာမေးမှာပါဟု ဆို၏။
    ဒီမေးခွန်းကလည်း တစ်ခုဆို ဆိုသလောက်ပါပဲ။ သာမန်အားဖြင့်တော့ ဘာမှအရေးကြီးသောကိစ္စမဟုတ်။ စာပေလောကအတွက်လည်း သိပ်အကျိုးရှိတယ်လို့ မဆိုသာ။ သို့တိုင်အောင် စာပေသမားအားလုံးနှင့် သက်ဆိုင်နေသည်။ အထူးသဖြင့် နယ်က စာပေ၀ါသနာရှင်များ၊ စာဖတ်ပရိသတ်များ စိတ်ဝင်စားကြသောကိစ္စဖြစ်နေ၏။
    ဒီတော့ ကျွန်တော်ဖြေမှဖြစ်မည်။

    သူ့မေးခွန်းကတော့...
    "ရန်ကုန်မြို့ သုံးဆယ့်သုံးလမ်းရှိ စာပေသမားတို့စုဝေးရာ လက်ဖက်ရည်ဆိုင်ကလေးကို "လေထန်ကုန်း"ဟု ကျွန်တော်(မင်းလူ)က စတင်ကင်ပွန်းတပ်အမည်ပေးခဲ့သည်ဟု သိရကြောင်း၊ ဘယ်လိုစိတ်ကူး၊ ဘယ်လိုအကြောင်းနဲ့ ဒီအမည်ကို ပေးခဲ့ခြင်းဖြစ်ပါသလဲဆိုတာ သိလိုပါသတဲ့"

                    *   *   *   *   *

    စာရေးဆရာများသည် ကိုယ်ပိုင်ရုံးခန်းများမှာ စတိုင်ကျကျ ထိုင်နိုင်ကြသူများမဟုတ်ကြပါ။ အများစုမှာ ရုံးခန်းမပြောနဲ့။ အိမ်ခန်းတောင် ကောင်းကောင်းငှားနေနိုင်ကြသူများမဟုတ်။
    စာရေးဆရာများအနေဖြင့် စာပေကိစ္စအတွက် မြို့ထဲထွက်၍သွားလာလှုပ်ရှားနေကြပြီးလျှင် အပန်းဖြေ နားနေရန် နေရာတစ်ခုလိုသည်။ အချင်းချင်းချိန်းဆို တွေ့ဆုံနိုင်ရန် စုရပ်တစ်ခုလိုသည်။
    တချို့ကတော့ မဂ္ဂဇင်းတိုက်တွေမှာ ဆုံကြ၊ နားကြ၏။ သို့ရာတွင် မဂ္ဂဇင်းတိုက်တော်တော်များများက နေရာ ကျယ်ကျယ်ဝန်းဝန်းမရှိ။ တိုက်ခန်းကျဉ်းကျဉ်းကလေးထဲမှာ အယ်ဒီတာများထိုင်ကြရခြင်းဖြစ်၏။ ဧည့်သည်တွေအတွက် ကုလားထိုင်အနည်းငယ်သာရှိ၏။ မဂ္ဂဇင်းတိုက်ဆိုတော့ လူအ၀င်အထွက်များသည်။ ကိုယ်က အလိုက်ကန်းဆိုးမသိဘဲ တစ်ချိန်လုံးထိုင်နေလို့ဖြစ်တာမဟုတ်။
    ဒီတော့ လက်ဖက်ရည်ဆိုင်တွေကိုသာ အားကိုးကြရသည်။ လက်ဖက်ရည်ဆိုင်ဆိုရာမှာလည်း လက်ဖက်ရည်  ကောင်းတာ၊ မကောင်းတာ အရေးမကြီး။ ဆိုင်ရှင်သဘောကောင်းဖို့သာ အရေးကြီးသည်။ စာရေးဆရာတွေက ငွေဖြုန်းနိုင်သူများ မဟုတ်ကြ။ စာမူခရလာတဲ့လူက ရေးဖော်ရေးဖက်များကို ပြုစုတဲ့အခါမျိုးမှာသာ ပွဲတော်ကြီးဖြစ်နိုင်သည်။ (ဒါတောင် ညနေ ယမကာဝိုင်းအတွက် အဓိကထား ချန်ထားရဦးမည်)
    များသောအားဖြင့်တော့ လူ လေးငါးခြောက်ယောက်ဝိုင်းထိုင်ပြီး လက်ဖက်ရည်က နှစ်ခွက်လောက်ပဲမှာ၊ ဆေးလိပ် တစ်ဗန်းမှာပြီး ရေနွေးတစ်အိုးပြီးတစ်အိုး မှာသောက်ရင်း တစ်နေကုန်ထိုင်ကြသည်။ တစ်ခါတစ်လေ ဘယ်သူ့ဆီမှ ပိုက်ဆံ မပါသဖြင့် လက်ဖက်ရည်မမှာသေးဘဲ ဒကာကိုမျှော်ရင်း ထိုင်စောင့်ချင်စောင့်ကြသည်။ ဒီအခါမျိုးမှာ ဆိုင်ရှင်က ရေနွေးကြမ်းအိုး အလိုက်သိစွာဖြည့်ပေးရသည်။ ဒီကြားထဲ ဘယ်သူလာရင် ဒီစာအုပ်လေးပေးလိုက်ပါ ဆိုတာမျိုး၊ ဘယ်သူလာရင် လေးဆယ့်ခုနစ်လမ်းဆိုင် လိုက်ခဲ့ပါလို့ပြောပေးပါ ဆိုတာမျိုး စာရေးဆရာတို့၏ အချိန်းအချက်ကိစ္စတွေ ကူညီ ဆောင်ရွက်ပေးရသေးသည်။ သိပ်ရင်းနှီးလာလို့ လက်ဖက်ရည်အကြွေးသောက်တာ၊ ဆေးလိပ်ဖိုး မှတ်ထားရတာ တစ်ခါတစ်လေ ပိုက်ဆံတောင် ပြန်ချေးရတာမျိုးရှိသေးသည်။
    ဒီလို စာရေးဆရာတွေအပေါ် နားလည်သည်းခံတတ်သူလည်းဖြစ်ရမည်။ ဆိုင်ကလည်း အရိပ်အာဝါသ ကောင်းကောင်း ကျယ်ကျယ်ဝန်းဝန်း လွတ်လွတ်လပ်လပ်ရှိမည်။ သွားရေးလာရေးလည်း အဆင်ပြေမည်။ မဂ္ဂဇင်းတိုက်များ၊ စာအုပ်တိုက်များနှင့်လည်း နီးမည်ဆိုလျှင် စာပေသမားတွေဆုံစည်းရာလက်ဖက်ရည်ဆိုင်အဖြစ် ဂုဏ်ယူပေတော့။ ဒါမှမဟုတ် နာပြီသာမှတ်ပေတော့။
    အဖေတို့ခေတ်က စာရေးဆရာအတော်များများသည် ရှုမ၀မဂ္ဂဇင်းတိုက်ကို အ၀င်အထွက်ရှိကြ၏။ ဒီတုန်းက ရှုမ၀သည် ဗိုလ်ချုပ်ဈေး၏အနောက်ဘက်တန်းမှာရှိသည်ဟု ဆို၏။ ရှုမ၀ကိုလာသည့် စာရေးဆရာတွေ စတည်းချရာ လက်ဖက်ရည်ဆိုင်ကတော့ အနောက်ဘက်တန်း၏ အတွင်းဘက်အစွန်ရှိ ဘသန်းကဖီးဟု မှတ်သားခဲ့ဖူးသည်။ ထိုလက်ဖက်ရည်ဆိုင်သည် တော်တော်သက်တမ်းရှည်ခဲ့သည်။ ကျွန်တော်တို့တက္ကသိုလ်ကျောင်းသားဘ၀အထိ ရှိနေသေးသည်။ ဟိုအရင်စာရေးဆရာတွေထိုင်ခဲ့တဲ့ဆိုင်ဆိုပြီး အမှတ်တရ သွားသောက်ခဲ့ဖူးသည်။ ဒီဆိုင် ခုထိရှိသေးလား၊ မရှိတော့ဘူးလားဆိုတာတော့ သေချာမသိတော့။
    အဖေတို့ စာရေးဆရာတွေ စုပေါင်းပိုင်ဆိုင်သော ပဒေသာမဂ္ဂဇင်း၊ ထို့နောက် အဖေ၏သစ္စာမဂ္ဂဇင်းတို့ ထုတ်ဝေခဲ့စဉ်က ဘယ်လက်ဖက်ရည်ဆိုင်ထိုင်ကြသလဲ မပြောတတ်။ အဖေ လေးဆယ့်ခုနစ်လမ်းပြောင်းပြီး စာသဘင်စာအုပ်တိုက်နှင့် ပုံနှိပ်တိုက်ထောင်သောအခါ သူငယ်ချင်းစာရေးဆရာတွေ အဖေ့အိမ်မှာ စတည်းချကြသည်။
    သူတို့ကို အဖေက ထမင်းကျွေးရသည်။ လက်ဖက်ရည်တိုက်ရသည်။ အရက်တော့မတိုက်။ အဖေက အရက်ကို မုန်းသူဖြစ်၏။ ဒါတောင် ဆရာသော်တာဆွေတို့က မရရအောင် အရက်ဖိုးညှစ်ကြသေးသည်။ ထိုစဉ်ကတော့ အဖေ့အိမ်နှင့်နီးသော မမကြီးကဖီးမှာ ထိုင်ကြသည်။ ဗိုလ်ချုပ်အောင်ဆန်းလမ်းနှင့် သိမ်ဖြူလမ်းထောင့် ခုံးတံတားအဆင်းမှာရှိသည်။ နောက်ပိုင်း စိန်မမဟု အမည်ပြောင်းလိုက်တာတွေ့ရသည်။

                    *   *   *   *   *

    ကျွန်တော် စာရေးဆရာပေါက်စဘ၀တွင် စာပေသမားတို့ စတည်းချရာဆိုင်မှာ ရွှေကြည်အေးကဖီးဖြစ်၏။ သုံးဆယ့်သုံးလမ်းထိပ်တည့်တည့် (ယခုအိတ်ဇဲလင့်စားသောက်ဆိုင်နေရာ)မှာရှိ၏။ သူက သုံးဆယ့်သုံးလမ်းနှင့် အနော်ရထာ လမ်းထောင့်မှာ။ ဆိုင်မျက်နှာစာက နှစ်ဖက်ဖွင့်ဖြစ်၏။ ထို့ကြောင့် ဒီဆိုင်မှာထိုင်လျှင် လမ်းထဲဝင်လာသမျှလူကို ဆီး၍မြင်နိုင်သည်။ ကိုယ်တွေ့ချင်သူကို လွယ်လွယ်ကူကူစောင့်နိုင်သည်။ လမ်းထဲဝင်သူကလည်း ကိုယ်တွေ့ချင်သူကို ဆိုင်မှာရှိမရှိ အလွယ်တကူ ရှာနိုင်သည်။ ဒီဆိုင်မှာ တစ်ဦးနှင့်တစ်ဦး ချိန်းဆိုနိုင်သည်။
    ရွှေကြည်အေးကဖီးသည်လည်း နှစ်ပေါင်းအတော်ကြာအောင် စာပေသမားတို့အပေါ် နားလည်မှုရှိစွာ ကူညီ ရပ်တည်ပေးခဲ့ကြောင်း ဂုဏ်ပြုမှတ်တမ်းတင်သင့်ပါသည်။
    တချို့စာပေသမားတွေကတော့ ကိုယ့်အုပ်စုနဲ့ကိုယ် အဆင်သင့်ရာဆိုင်တွေမှာ စုရပ်လုပ်ကြသည်။
    ရှုမ၀အဖွဲ့သားတွေက ဗိုလ်ချုပ်ဈေးအတွင်းရှိ နီနီမြင့်ကဖီးမှာထိုင်ကြသည်။
    ထိုအချိန်က မော်ဒန်အုပ်စုက ဆူးလေဘုရားလမ်း ရွှေလမင်းတီးဟောက်စ်မှာ ဆုံကြသည်။ ဆရာဖေညွန့်ဝေတို့ ကတော့ သုံးဆယ့်ရှစ်လမ်းထိပ်က ခရေမှာ အမြဲရှိသည်။
    ကာတွန်းဆရာတွေကတော့ ဘားလမ်း(ယခုမဟာဗန္ဓုလပန်းခြံလမ်း)မှ ရွှေမင်းသမီးမှာ။ သူတို့ကတော့ စာရေးဆရာတွေလိုမဟုတ်။ စည်းကမ်းရှိသည်။ ကိုယ်စားတာသောက်တာ ကိုယ့်ဘာသာရှင်းကြသည်။ ကိုယ့်ဧည့်သည်ဆိုလျှင် ကိုယ်တာဝန်ယူရသည်။ သူတို့ဝိုင်းထဲ ၀င်ထိုင်မိလျှင် ဆရာငွေကြည်၊ ဆရာမောင်မောင်၊ ဆရာမောင်ဝဏ္ဏ တစ်ယောက်ယောက်က ကျွန်တော်သောက်သည့် လက်ဖက်ရည်ဖိုးကို ရှင်းတတ်သည်။
    စာပေသမားတချို့ စက်ကျတတ်သော ဆိုင်နှစ်ဆိုင်ရှိသေးသည်။ တစ်ဆိုင်က ပြည်သူ့မုန့်တိုက်။ ယခု ထရိတ်ဒါးစ်ဟိုတယ်၏ ဗိုလ်ချုပ်လမ်းဘက်ခြမ်းနေရာမှာ ရှိခဲ့သည်။ တစ်ဆိုင်ကတော့ ပန်းဆိုးတန်း၊ ပြည်သူ့ကုန်တိုက်ကြီး၏ အောက်ထပ်က လက်ဖက်ရည်ဆိုင်ဖြစ်၏။ ထိုဆိုင်များသည် အစိုးရကော်ပိုရေးရှင်းပိုင် (ပြည်သူပိုင်)ဆိုင်များဖြစ်ကြသည်။ နေရာကျယ်ကျယ်ဝန်းဝန်းရှိသည်။ လေ၀င်လေထွက်ကောင်းပြီး အေးချမ်းချမ်းရှိသည်။ နေ့လည်ပိုင်းဆိုလျှင် အမြဲလိုလို လူရှင်းနေတတ်သည်။ စားပွဲထိုးဝန်ထမ်းတွေကလည်း ပုဂ္ဂလိကဆိုင်တွေလို မျက်စိနောက်လာအောင် ပျာယာခတ်နေတတ်တာမျိုးမရှိ။ အေးအေးဆေးဆေး တည်တည်ငြိမ်ငြိမ်ပင်ဖြစ်၏။ ပြည်သူပိုင်ဆိုင်တွေဆိုတော့ ဘာမှ မစားမသောက်ဘဲ တစ်နေကုန်ထိုင်နေလည်း ကိစ္စမရှိ။ ဘယ်သူကမှ ဘာမျှမပြော။ ထို့ကြောင့် ဒီဆိုင်တွေမှာ ရုံးခန်းတစ်ခုလို အသုံးပြုပြီး ကျောက်ချထိုင်ခဲ့သူတွေလည်းရှိ၏။
    ကျွန်တော်ကတော့ စာရေးဆရာပေါက်စဘ၀မှာ ဆရာအောင်ပြည့်နဲ့ အတွဲများသဖြင့် သူသွားလေ့ရှိသော မဟာဗန္ဓုလပန်းခြံလမ်း မုတ်ဆိတ်ဆိုင်မှာ လိုက်ထိုင်သည်။ ဆရာပြည့် ချယ်ရီမဂ္ဂဇင်းကိုင်တော့မှပင် မုတ်ဆိတ်ဆိုင်နှင့် အဆက်ပြတ်သွားသည်။
    ဆရာငြိမ်းကျော်၏ ငွေတောင်စာအုပ် ရိုက်နှိပ်ရာမှာ ကူညီလုပ်ကိုင်နေတုန်းကတော့ ပုဂံစာအုပ်တိုက်ဘေးကပ်လျက် ဆိုင်မှာဖြစ်စေ၊ ကန်တော်ကလေးစာတိုက်နားက ချိုချိုမြင့်ကဖီးမှာဖြစ်စေ ထိုင်ဖြစ်ခဲ့၏။
    ကျွန်တော်တို့သူငယ်ချင်းတွေစုပြီး ကဗျာစာအုပ်ကလေးတွေ ထုတ်နေကြတုန်းက ညနေစောင်းလျှင် မျိုးရာဇာညွန့်တို့ ဆေးဆိုင်ရှိရာ လဟာပြင်ဈေးထဲ သွားကြသည်။ သူ့ဆိုင်သိမ်းပြီးနောက် စားသောက်ဆိုင်တန်းရှိ စိန်သောင်းကဖီးမှာထိုင်ပြီး လက်ဖက်ရည်သောက်ရင်း ကဗျာစာအုပ်ထုတ်ဖို့ကိစ္စများကို ဆွေးနွေးတိုင်ပင်လေ့ရှိကြ၏။
    နောက်ပိုင်းမှာ ကျွန်တော်အများဆုံးထိုင်ဖြစ်သောနေရာက မဟာဗန္ဓုလပန်းခြံလမ်း မွတ်စလင်ကုသိုလ်ဖြစ် ဆေးရုံနားက ကိုထွန်းရီလက်ဖက်ရည်ဆိုင်ပင်ဖြစ်သည်။ ကိုထွန်းရီက သဘောကောင်းသည်။ ဆက်ဆံရေးပြေပြစ်သည်။ အားလုံးနှင့်တည့်အောင် ပေါင်းတတ်သည်။ သူ့ဆိုင်ရှေ့အုတ်ခုံနှင့် ပလက်ဖောင်းမှာရော လမ်းတစ်ဖက် မျက်နှာချင်းဆိုင် ပလက်ဖောင်းမှာပါ စားပွဲပုလေးတွေ၊ ခွေးခြေလေးတွေခင်းပြီး ထိုင်လို့ရသည်။  ပလက်ဖောင်းကကျယ်သဖြင့် လွတ်လွတ်လပ်လပ်ရှိ၏။ များသောအားဖြင့် အခန်းတစ်ခန်း၏ရှေ့လှေကားအုတ်ခုံမှာ ကျွန်တော်တို့ ထိုင်လေ့ရှိ၏။
    ဒီဆိုင်က လက်ဖက်ရည်လည်းကောင်းသည်။ သူငယ်ချင်းတွေနှင့်လည်း ဆုံဖို့လွယ်သဖြင့် ဒီဆိုင်မှာပင် နှစ်အတော်ကြာအောင် စွဲစွဲမြဲမြဲထိုင်ဖြစ်ခဲ့၏။ နောက်ကျတော့ ဒီဆိုင်လေး ထိုင်လို့ကောင်းတယ်ဆိုပြီး ဆရာမောင်ခိုင်မာတို့ အုပ်စုလည်း မကြာမကြာ လာထိုင်လေ့ရှိ၏။ ကျွန်တော်မြို့ထဲ အရောက်အပေါက်နည်းသွားသည့်အချိန်မှာလည်း ဟန်သစ် မဂ္ဂဇင်းဝိုင်းတော်သားများဖြစ်ကြသော ကိုတင်ကိုအောင်၊ ကိုဝင်းမင်းထွေး၊ ကိုခင်ဇော်တို့သည် ညနေတိုင်း ဒီဆိုင်မှာ ထိုင်ဖြစ်သည်ဟု ဆို၏။

                    *   *   *   *   *

    လွန်ခဲ့သော ဆယ်နှစ်ဝန်းကျင်လောက်က သုံးဆယ့်သုံးလမ်း(အထက်လမ်း)ထဲမှာ လက်ဖက်ရည်ဆိုင်လေးတစ်ဆိုင် ပေါ်လာသည်။ ဆိုင်ရှင်တွေက စာပေ၀ါသနာရှင်လူငယ်လေးတွေ။ ထို့ကြောင့် စာရေးဆရာတို့၏အထာကို နားလည်သည်။ ဆိုင်မှာ ၀င်ထိုင်လျှင် ဘာသောက်မလဲဟု လာမေးခြင်းဖြင့် စိတ်အနှောင့်အယှက်မဖြစ်စေရ။ သောက်ချင်မှ လှမ်းမှာ။ ရေနွေးကြမ်း အကြိမ်ကြိမ်ဖြည့်ပေးရခြင်းအတွက် ငြူစူခြင်း၊ နှမြောတွန့်တိုခြင်းမရှိ။
    ဓမ္မာရုံရှေ့အုတ်ခုံပေါ်မှာ ဆိုင်ကိုတည်ထားခြင်းဖြစ်၏။ တိုက်ဘေးလမ်းကြားမှာလည်း တာလပတ်မိုးပေးထားသဖြင့် မိုးရွာလျှင် ၀င်ခိုရင်း ထိုင်နိုင်သည်။
    အစပိုင်းကတော့ လမ်းထဲမှာပင် နီးနီးနားနား လွယ်လွယ်ကူကူရှိသဖြင့် ၀င်ထိုင်ကြခြင်းဖြစ်၏။ နောက်တော့ ထိုင်ရတာ အဆင်ပြေခြင်း၊ အချင်းချင်း ချိန်းဆိုတွေ့ဆုံဖို့ လွယ်ကူခြင်း၊ ဆက်ဆံရေးပြေပြစ်ခြင်းတို့ကြောင့် ဒီဆိုင်ကလေးကို မျက်စိကျလာ၏။ တဖြည်းဖြည်းလူသိများပြီး စာပေသမားတို့ စတည်းချ နားနေရာစုရပ်ကလေးဖြစ်လာ၏။
    အစပိုင်းတွင် ဆိုင်နာမည်ဟူ၍မရှိသေး။ ဓမ္မာရုံရှေ့ကဆိုင်ဟူ၍သာ ညွှန်းဆိုကြသည်။ နောက်ပိုင်းကျတော့ "လေထန်ကုန်း"ဟု အမည်တွင်လာသည်။
    ပထမတော့ ဒီဆိုင်လာနေကျ စာပေသမားတွေသာ သိသည်။ နောက်တော့ စာပေသမားအားလုံး သိလာသည်။ နယ်က ကိစ္စနှင့်ရောက်လာသူတွေကလည်း ဒီနာမည်ကို ပြန်သယ်သွားကြသည်။ စာရေးဆရာတွေက သူတို့စာထဲမှာ ထည့်ရေးရာမှ စာဖတ်ပရိသတ်တွေပါသိပြီး လေထန်ကုန်းလက်ဖက်ရည်ဆိုင်သည် နိုင်ငံကျော်ဖြစ်လာခဲ့၏။ နယ်၊ ရန်ကုန်မှတက်သစ်စ လူငယ် စာပေသမားတို့အဖို့ လေထန်ကုန်းမှမရောက်ဖူးရင် စာပေသမားမပီသလောက်ထင်ပြီး တကူးတကန့် လာထိုင်ကြရလောက်အောင် နာမည်ကြီးလာသည်။

                    *   *   *   *   *

    ဆရာမခင်ဆွေဦး၏ စာတစ်ပိုဒ်ထဲတွင် "လေထန်ကုန်း"ဆိုသောအမည်ကို မင်းလူက စတင်မှည့်ခေါ်ခဲ့သည်ဟု ရေးခဲ့သည်။ ဆရာမောင်တင်ဆင့်က လေထန်ကုန်းညနေခင်းများအကြောင်း ရေးရာမှာလည်း ဒီနာမည်ကို မင်းလူက ပေးခဲ့ကြောင်း ရေးထားပြန်၏။ ဒီအကြောင်း သတင်းသယ်ဆောင်လာသူက ဆရာမောင်ခိုင်မာဖြစ်သည်ဟု သိရ၏။
    ထိုအခါ အရင်က အမှတ်တမဲ့နေမိရာမှ ဒီနာမည် ငါများ တကယ်ပေးမိသလားဟု ပြန်စဉ်းစားကြည့်ရသည်။ သေသေချာချာမမှတ်မိ။ မေ့နေပြီ။ စေ့စေ့စပ်စပ် တွေးကြည့်သောအခါ ဖြစ်နိုင်သောအချက်နှစ်ချက်ကို တွေ့ရသည်။
    ကျွန်တော်က ဒီဆိုင်မှာ ဆရာမောင်သင်းခိုင်၊ ဆရာမောင်ခိုင်မာ၊ ဆရာမောင်လူမှိန်၊ ဆရာမြမြင့်မိုရ်၊ ဆရာမြင့်ဦးဦးမြင့် စသော ကဗျာဆရာများနှင့် အတူထိုင်ဖြစ်တာများသည်။ တစ်ခါတစ်လေ ဆရာခင်မောင်တိုး(မိုးမိတ်)၊ ဆရာမောင်တင်ဆင့်၊ ဆရာယဉ်မင်းပိုက်တို့နှင့်လည်း ဆုံတတ်သည်။
    ဒီဆိုင်မှာက စားပွဲအားလုံးမှာ စာပေသမားတွေချည်းဖြစ်၏။ အုပ်စုတူစွာ သို့မဟုတ် နီးစပ်ရာ၊ ခင်မင်ရာ တချို့လည်း ကြုံရာဆုံရာလူနှင့် အတူထိုင်ကြပြီး စာအကြောင်းပေအကြောင်း၊ စာသတင်း ပေသတင်း၊ တခြားလူမှုရေး၊ စီးပွားရေး၊ နိုင်ငံရေးတို့ကို ပြောကြ ဆိုကြ၊ ဆွေးနွေးကြ၊ ငြင်းခုံကြသည်။ တချို့က အေးအေးဆေးဆေး၊ တိုးတိုးညင်သာ၊ တချို့လည်း ဆူဆူညံညံ အာပေါင်အာရင်းသန်သန်။
    ဒါကိုကြည့်ပြီး ကျွန်တော်က ...
    "ဒီဆိုင်ကတော့ တကယ့်ကို လေထန်ကုန်းပါပဲဗျာ"
    ဟု ပြောကောင်းပြောမိလိမ့်မည်။ ဒီစကားကို ဆရာမောင်ခိုင်မာကြားတော့ သဘောကျပြီး "မင်းလူကတော့ ဒီဆိုင်ကို လေထန်ကုန်းလို့ နာမည်ပေးထားပြီ"ဟု (သူ့ဝါသနာအတိုင်း)လျှောက်ပြီး သတင်းလွှင့်မည်။ ဒီလိုနှင့် တစ်ဆင့်စကားတစ်ဆင့် ပျံ့နှံ့ကြားသိကုန်ကြရာမှ ဒီနာမည်တွင်သွားဖြစ်နိုင်၏။
    နောက်... ဖြစ်နိုင်တာတစ်ခုကတော့...
    ကျွန်တော်သည် ဒီလိုမျိုးချစ်စနိုးနှင့် နောက်တတ်ပြောင်တတ်ကြောင်း စာပေမိတ်ဆွေများ သိကြသည်။ ဥပမာ...
    ဆရာမောင်ခိုင်မာ၏ သိင်္ဂါရငှက်များ ကဗျာစာအုပ်မှာ အကြောင်းကြောင်းကြောင့် မထွက်နိုင်ဘဲ ကြန့်ကြာနေစဉ် ကျွန်တော်က ...
    "အစ်ကို့စာအုပ်ကို သိင်္ဂါရငှက်များလို့ နာမည်မပေးဘဲ သင်္ခါရငှက်များလို့ ပြောင်းလိုက်"ဟု ပြောခဲ့သည်။
    တစ်လောဆီက ဆရာချစ်ဦးညို၏စာအုပ်တစ်အုပ်ထွက်သည်။ လူကြိုက်များပြီး တော်တော်ရောင်းအားကောင်း ခဲ့သည်။ ထိုစာအုပ်ထွက်ခါနီးမှာ သူနှင့်ကျွန်တော်ဆုံကြတော့ ကျွန်တော်ကမေးသည်။
    "ဘာစာအုပ်ထွက်ဖို့ရှိသေးလဲ"
    သူက...
    "လောကဓံနှင့် လမ်းလျှောက်အတူထွက်ခြင်း ဆိုတဲ့စာအုပ် ထွက်စရာရှိတယ်"
    ထိုအခါ ကျွန်တော်က...
    "ဘာလဲ ကိုကြီးညိုရဲ့အိမ်ကလေဒီကြီးကို စောင်းပြီးရေးထားတာလား"
    ဟု ကျီစယ်ခဲ့၏။ ဒါနဲ့ပတ်သက်ပြီး သူ၏လေဒီဖယောင်းတိုင်ကြီးကတောင် "လူကို အဲ့လို ချိုးချိုးဖဲ့ဖဲ့ များများရေးနိုင်ပါစေတော်"ဟု ကောင်းချီးပေးခဲ့ပါသေးသည်။ ဒီအကြောင်းတွေ သိနေကြသော စာပေသမားတို့ စကားဝိုင်းတစ်ခုတွင် တစ်ယောက်က ...
    "နေစမ်းပါဦး။ ဒီဆိုင်ကို လေထန်ကုန်းလို့ ဘယ်သူက နာမည်ပေးခဲ့တာလဲ"
    ဟု မေးမည်။ ထိုအခါ မောင်ခိုင်မာက
    "ဒါမျိုး ပေါက်ပေါက်ရှာရှာ တွေးတတ်ပြောတတ်တာ ဘယ်သူရှိမလဲဗျာ။ မင်းလူပဲဖြစ်မှာပေါ့"
    ဟု ပြန်ပြောလိမ့်မည်။ ဒီစကားအဆင့်ဆင့်ပျံ့နှံ့သွားရာမှ ကျွန်တော်သည် "လေထန်ကုန်း ဖန်တီးရှင်"ဟု သတ်မှတ်ခံရခြင်းလည်းဖြစ်ချင်ဖြစ်ပါမည်။
    တကယ်တော့ "လေထန်ကုန်း"ဆိုသောအမည်၏ မူလပိုင်ရှင်မှာ ဆရာမင်းကျော်သာဖြစ်ပါသည်။ ဆရာက ၀ူးသရင်းဟိုက်ဆိုသော စာအုပ်ကို မြန်မာပြန်ရာတွင် "လေထန်ကုန်း"ဟု အမည်ပေးခဲ့သည်။ ထိုအမည်မှာ မူရင်းအင်္ဂလိပ် အမည်နှင့်ကိုက်ညီရုံသာမက ဇာတ်လမ်းနှင့်လည်း အလွန်လိုက်ဖက်လှသည်။ စကားလုံးကျစ်လျစ်ပြီး အဓိပ္ပာယ်လည်း တာသွားလှသည်။ ကျွန်တော်က ထိုအမည်လေးကို အလွန်သဘောကျပြီး စိတ်ထဲစွဲနေ၏။ ထို့ကြောင့် အကြောင်း တိုက်ဆိုင်လာသောအခါ လွှတ်ခနဲ ပါးစပ်ကထွက်သွားတာဖြစ်လေမလားမသိ။
    တကယ်လို့သာ ဒီလက်ဖက်ရည်ဆိုင်ကို ဒီနာမည်ပေးခဲ့တာ တကယ်ပဲ ကျွန်တော်ကိုယ်တိုင်ဖြစ်နေခဲ့လျှင်လည်း ဆရာမင်းကျော်ကို ဂုဏ်ပြုရာရောက်သဖြင့် ၀မ်းသာရပါမည်။
    လေထန်ကုန်းဆိုသောအမည်ကို ကျွန်တော် သို့မဟုတ် အခြားသူတစ်ဦးဦးက အမှတ်တမဲ့ စတင်ပြောမိပြီး ဆရာမောင်ခိုင်မာက တွင်ကျယ်အောင် သတင်းဖြန့်ချိကာ ဆရာမခင်ဆွေဦးနှင့် ဆရာမောင်တင်ဆင့်တို့က စာနှင့် ပေနှင့် မှတ်တမ်းတင်ခဲ့သည်ဟု ဆိုလျှင် မျှမျှတတရှိပြီး ကျေနပ်လောက်သောအဖြေ ဖြစ်ကောင်းဖြစ်နိုင်ပါလိမ့်မည်။
    ဘာပဲဖြစ်ဖြစ် လေထန်ကုန်းဆိုသောအမည်ကို ဘယ်သူက စတင်ပေးခဲ့သလဲဆိုတာ အရေးမကြီးပါ။ ခုချိန်မှာ ထိုအမည်သည် စာပေသမားအားလုံးတို့နှင့် သက်ဆိုင်သောဝေါဟာရတစ်ခု ဖြစ်နေပါပြီ။
    လေထန်ကုန်းမှာထိုင်ကြသော စာပေသမားများအနေဖြင့် ကိုယ်နှစ်သက်ယုံကြည်ရာ စာပေအယူအဆတွေ အမျိုးမျိုးရှိနေကြသော်လည်း စာဖတ်ပရိသတ်အပေါ်ထားရှိသည့် စေတနာကတော့ တူညီကြလိမ့်မည်ဟု မျှော်လင့် ယုံကြည်ပါသည်။
    နောက်ဆုံးရရှိသောသတင်း(အင်တာဗျူးဂျာနယ် အတွဲ ၁၊ အမှတ် ၃)အရ လေထန်ကုန်းဆိုသောအမည်ကို မိမိ စတင်ပေးခဲ့ခြင်းဖြစ်ကြောင်း ဆရာလင်းဝေမြိုင်က တရားဝင်ထုတ်ဖော်ဝန်ခံခဲ့ပြီးဖြစ်သဖြင့် လက်သည်ပေါ်ပြီဟု ယူဆနိုင်ပါကြောင်း။

                    *   *   *   *   *

နောက်ဆက်တွဲ
---------------
    ဤစာမူ မဂ္ဂဇင်းထဲပါလာပြီးနောက်မှ ထပ်မံကြားသိရပြန်သည်မှာ လေထန်ကုန်းဆိုသောစကားလုံးကို ရှေးမဆွကပင် မိမိသုံးစွဲခဲ့ပြီးဖြစ်ကြောင်း ဆရာမောင်ရန်ပိုင်က ဂျာနယ်သို့ ဖွင့်ဟပြောကြားခဲ့ပါသည်။ ထို့ကြောင့် လေထန်ကုန်းကိစ္စမှာ ဖောင်ပိတ်လို့ မရသေးဘဲဖြစ်နေပြန်ပါသည်။
    လေထန်ကုန်း၏ မူလပိုင်ရှင်ဟု ကျွန်တော်ဆိုခဲ့သော ဆရာမင်းကျော်(ကျော်လှိုင်ဦး)၏သားဖြစ်သူ အံ့ဘွယ်ကျော်နှင့် တလောက ဆုံမိရာမှ လေထန်ကုန်းနာမည်အကြောင်း စကားစပ်မိပါသည်။
    အံ့ဘွယ်ကျော်က-
    "လေထန်ကုန်းဆိုသောအမည်သည် သူ့ဖခင်ဆရာမင်းကျော်၏ ကိုယ်ပိုင်အတွေးမဟုတ်ကြောင်း ဆရာကြီး တက်တိုး၏ ဆောင်းပါးတစ်ပုဒ်ထဲတွင် ပါဝင်သော စကားလုံးဖြစ်ကြောင်း၊ ထိုစကားလုံးကလေးကို ဆရာမင်းကျော်က သဘောကျသဖြင့် ဆရာကြီးတက်တိုးထံ ခွင့်တောင်းပြီး အသုံးပြုခဲ့ခြင်းဖြစ်ကြောင်း" ပြောပြပါသည်။
    ကျွန်တော်ကတော့ ဒီလောက်လှပပြီး ဂန္ထ၀င်ဆန်လှသည့်နာမည်စကားလုံးကို တီထွင်ဖန်တီးနိုင်သူကို (ဘယ်သူပဲဖြစ်ဖြစ်) လေးစားစွာ ချီးကျူးဂုဏ်ပြုအပ်ပါသည်။


မင်းလူ
----------------
န၀ဒေးမဂ္ဂဇင်း၊
ဇန်န၀ါရီ၊ ၂၀၀၀
 https://www.facebook.com/notes/မင်းလူ-၀တ္တုတိုများ/လေထန်ကုန်းလက်သည်များ/309547102482349

No comments:

Post a Comment

Related Posts Plugin for WordPress, Blogger...

ShareThis