နေ့စဉ် ဘုရားဖူးဦးရေသိန်းနှင့်ချီ လာရောက်လေ့ရှိသော မကွေးတိုင်း မင်းဘူးမြို့နယ် ရွှေစက်တော်ပွဲတော်အတွင်း မတ် ၁၉ ရက် နံနက် ၂ နာရီက မီးလောင်မှုဖြစ်ပွားခဲ့ပြီး တည်းခိုဆောင်ပေါင်း ၁၆ လုံးရှိသည့် နမ္မဒါအဆင့်မြင့် ဧည့်ရိပ်သာဝင်းရှိ တဲကျောင်းအတွဲ ငါးတွဲနှင့် လုံးချင်းတည်းခိုဆောင်များ အပါအ၀င် အဆောက်အအုံ ၁၄ ခု ပျက်စီးဆုံးရှုံးခဲ့ပြီး ထိခိုက်ဒဏ်ရာရသူ မရှိခဲ့ကြောင်း ပွဲတော်တွင်း လုပ်ငန်းရှင်များနှင့် မကွေးတိုင်း မီးသတ်ဦးစီးဌာန အတည်ပြုချက်များအရ သိရသည်။
အဆိုပါတည်းခိုဆောင်၌ ပျဉ်းမနားမြို့မှ လာရောက်တည်းခိုနေသော ဦးဇော်မင်းသိန်း၏ အဆောင် ၅၊ အခန်းအမှတ် ၆ အတွင်း ခြင်ဆေးခွေမှတစ်ဆင့် မီးစတင်လောင်ကျွမ်းခဲ့သည်ဟု သက်ဆိုင်ရာဌာနများမှ အတည်ပြုထားသော်လည်း ကာယကံရှင်မိသားစုက ၎င်းတို့အခန်းမှ စတင်လောင်ကျွမ်းခြင်း မဟုတ်ဟု The Daily Eleven သတင်းစာသို့ ပြောကြားသည်။
“ကားသံတွေဆူညံနေပြီး ခရာမှုတ်သံတွေကြားလို့ ချောင်းရေလျှံလာတာလားဆို ထကြည့်မိတော့ မီးတောက်ကြီးတွေ မြင်ခဲ့တယ် အဲဒီအချိန်ထိ ဂေါပကအဖွဲ့က တောမီးလောင်တာပါလို့ အသံချဲ့စက်နဲ့ အော်နေတယ်။ မီးတောက်တွေဆီ သွားကြည့်တော့ နမ္မဒါကွင်းထဲ မန်းချောင်းတောင်ဘက်က စလောင်တဲ့မီးက ချောင်းတစ်ဖက်ကိုကျော်ကူး လောင်နေတယ် ပြီးတော့သန့်စင်ခန်းတွေပါ ကူးကုန်တယ်။ နမ္မဒါကွင်းက ဂေါပကအဖွဲ့က တိုက်ရိုက်ကိုင်တဲ့ တဲကျောင်းတွေပါ၊ ကံကောင်းတာက ပုဂ္ဂလိကပိုင် အခန်းတွေဘက် မကူးလို့ဘဲ ကူးလာရင်တော့ အကုန်ပါမှာ” ဟု ရွှေစက်တော်ပွဲတော်တွင်း နှစ်စဉ်လာရောက်သည့် အမှတ်တရပစ္စည်းဆိုင်ရှင် တစ်ဦးကဆိုသည်။
မီးလောင်မှုနှင့် ပတ်သက်၍ နမ္မဒါအဆင့်မြင့် ဧည့်ရိပ်သာတာဝန်ခံ ဦးသန်းဋ္ဌေးအောင်က “မီး မီးဆိုတော့ ကားတွေအရင်ထွက်နိုင်အောင် လုပ်ခဲ့ရတယ်။ စလောင်တဲ့နားက အခန်းမှာ အသက် ၈၀ ကျော် ဘိုးဘွားတွေရှိလို့ သူတို့ကို အရင်ထုတ်ရတယ် ကလေးတွေကိုလည်း ဦးစားပေး ထွက်ခိုင်းရတယ်။ အရင်ရက်ကလို ကားတွေထွက်မရအောင် ကျပ်နေရင်တော့ အကုန်လောင်ကုန်တော့မှာပါ။ လူတွေဘာမှမဖြစ်တာရောကြောင့် အရမ်းကံကောင်းပါတယ်” ဟု ပြောကြားခဲ့သည်။
အဆိုပါ မီးလောင်မှုသို့ ရွှေစက်တော်ပွဲတော်တွင်း မီးသတ်ဌာနနှင့် မကွေး၊ မင်းဘူး၊ လယ်ကိုင်း၊ ငဖဲမြို့များမှ မီးသတ်ယာဉ်နှင့် ရေသယ်ယာဉ်ရှစ်စီး မီးသတ်အင်အား ၇၀ ခန့် အပါအ၀င် ပွဲတော်ဝန်းအတွင်း နေထိုင်သူများက ၀ိုင်းဝန်းငြှိမ်းသတ်ခဲ့ကြောင်း၊ နံနက် ၃ နာရီတွင် မီးလုံးဝငြိမ်းခဲ့ကြောင်း၊ မီးလောင်မှု စတင်သည်ဟု ယူဆရသည့် အခန်းတွင် တည်းခိုနေခဲ့သူ ဦးဇော်မင်းသိန်းအား စကုရဲစခန်းမှ (ပ)၂၅/၂၀၁၄၊ ဥပဒေပုဒ်မ (၂၈၅) ဖြင့် အမှုဖွင့်ထားကြောင်း သိရသည်။
ရွှေစက်တော်ဘုရားပွဲအတွင်း မီးလောင်မှုဖြစ်ပွားပြီးနောက် အပျက်အစီးများအား ရှင်းလင်းနေစဉ် (ဓာတ်ပုံ-အောင်သူငြိမ်း)
EMG
No comments:
Post a Comment