ရေးသားသူ- အေးမွန်ရာပြည့်
ကမ္ဘာပေါ်တွင် လူဦးရေအများဆုံး တရုတ်နှင့် အိန္ဒိယဈေးကွက်တို့ဆက်သွယ်ရန် မဟာဗျူဟာအကျဆုံးနေရာတွင် မြို့တစ်မြို့ရှိသည်။ ထိုမြို့ကား မန္တလေးမြို့ဖြစ်၏။
တစ်ချိန်က မြန်မာနိုင်ငံ၏ မင်းနေပြည်တော်ဖြစ်ခဲ့သည့်အပြင် ယဉ်ကျေးမှုမြို့တော်အဖြစ်လည်း ထင်ရှားခဲ့သည့် မန္တလေးမြို့သည် လက်ရှိအချိန်တွင် ကုန်သွယ်ရေးလမ်းကြောင်းများ ပိုမိုပွင့်လင်းလာသည်။
မြို့တည်နေရာ ပထ၀ီအရအရေးပါမှုကြောင့် ကုန်သွယ်ရေးလမ်းကြောင်းပေါ်မှ ကုန်စည်များသာ စီးဆင်းတော့သည်မဟုတ်ပေ။
မြန်မာနိုင်ငံအရှေ့မြောက်ခြမ်းရှိ တရုတ်-မြန်မာနယ်စပ်နေရာမှ စိတ်ကြွဆေးပြားများအား နိုင်ငံ၏အနောက်ခြမ်းတွင်ရှိနေသည့် အိန္ဒိယနိုင်ငံနှင့် ဘင်္ဂလားဒေ့ရ်ှနိုင်ငံများသို့ အဓိကပို့ပေးနေရသော လမ်းကြောင်းပေါ်တွင် ရှိနေပြန်သည်။ မန္တလေးမြို့သည် ယနေ့အချိန်တွင် မူးယစ်ဆေးဝါးနှင့် ဆက်စပ်ပစ္စည်းများအား သယ်ယူရောင်းဝယ်ဖောက်ကားမှုများ၏ ခရီးတစ်ထောက်ခိုနားရာ နေရာတစ်ခုဖြစ်နေသည်ဟု မန္တလေးမြို့ရှိ မူးယစ်တပ်ဖွဲ့စု(၁၇)မှ ရဲမှူးဒီဒီယောဟန်ကပြောသည်။
စိတ်ကြွဆေးပြားများ ပြုလုပ်ရာတွင် အဓိကကုန်ကြမ်းဖြစ်သည့် ဆူဒိုအက်ဖဒရင်းခေါ်သည့် ချောင်းဆိုးပျောက်ဆေးကဲ့သို့သော ဆေးပြားများအား အိန္ဒိယ- မြန်မာနယ်စပ်မှ စစ်ကိုင်း၊ မန္တလေးနှင့် ရှမ်းပြည်နယ်တို့ကိုဖြတ်ကာ တရုတ်နယ်စပ်သို့ ပို့ဆောင်ကုန်သွယ်မှုများ ပြုလုပ်နေသည်။ ယင်းနယ်စပ်တစ်လျှောက်တွင်မှ ဆူဒိုဆေးပြားများနှင့် အခြားဓာတုပစ္စည်းများနှင့် ဓာတ်ပြုကာ စိတ်ကြွဆေးပြားများအဖြစ် ပြန်လည်ထုတ်လုပ်ခြင်းဖြစ်သည်။ ရရှိလာသည့် စိတ်ကြွဆေးပြားများကို အိန္ဒိယနိုင်ငံနှင့် ဘင်္ဂလားဒေ့ရ်ှနိုင်ငံများသို့ ပြန်ပို့သည့်လမ်းကြောင်းများတွင် မန္တလေးပါဝင်နေပြန်သည်။ ထို့ကြောင့် မန္တလေးမြို့သည် စိတ်ကြွဆေးထုတ်သည့် ကုန်ကြမ်းများ အပြန်အလှန်ကုန်သွယ်သည့်လမ်းကြောင်းတွင် ပါဝင်နေသကဲ့သို့ ဓာတ်ပြုပြီး စိတ်ကြွဆေးပြားများကို တစ်နိုင်ငံနှင့်တစ်နိုင်ငံ ရောင်းဝယ်ကြရာတွင်လည်း ပါဝင်နေသည့်အတွက် အဓိကအချက်အချာကျနေပြီး မူးယစ်ဆေးဝါးကုန်သွယ်သူများ၏ ခရီးတစ်ထောက်နားခိုရာ မြို့ဖြစ်နေခြင်းပင် ဖြစ်သည်။ ထို့ကြောင့် ပြည်တွင်းရှိ ဆေးပြားများ အပြန်အလှန်ရောင်းဝယ်ဖောက်ကားနေမှုများ ပြုလုပ်ရာတွင်လည်း မန္တလေးမြို့သည် အဓိကကျနေပြန်သည်။
၂၀၁၂ ခုနှစ်အတွင်းက မန္တလေးတိုင်းဒေသကြီးတစ်ခုလုံးတွင် စိတ်ကြွဆေးပြားဖမ်းဆီးရမှု ၁၀၇ မှုမှ ကျပ်သိန်းပေါင်းနှစ်သောင်းလေးထောင်ကျော်သာ ဖမ်းဆီးရရှိခဲ့သော်လည်း ၂၀၁၃ တွင်မူ စိတ်ကြွဆေးပြားမှု ၁၃၂ မှုတွင် ကျပ်သိန်းသုံးသောင်းငါးထောင်ကျော်ထိ တိုးမြှင့်ဖမ်းဆီးရမိခဲ့သည်။
လက်ကြီး ရောင်းဝယ်ဖောက်ကားသူများမှာ တရုတ်-မြန်မာနယ်စပ်တစ်လျှောက်မှ စိတ်ကြွဆေးပြားများကို ဆိုင်ကယ်ကယ်ရီသမားများအား အခကြေးငွေများပေးကာ သယ်ဆောင်ခိုင်းပြီး အိန္ဒိယနယ်စပ်နှင့် ဘင်္ဂလားဒေ့ရ်ှနယ်စပ်များသို့ ပြန်လည်ပို့ဆောင်ခိုင်းခြင်းများရှိသလို လက်လီပြန်လည်ရောင်းချသူများထံသို့ လက်ကားဈေးဖြင့် ပြန်လည်ရောင်းချပေးမှုများလည်း ရှိနေသည်။
အချို့ဆိုင်ကယ် ကယ်ရီသယ်သူများ ကိုယ်တိုင်ကလည်း တရုတ်ပြည်နယ်စပ်မှ တစ်နိုင်တစ်ပိုင်သယ်ဆောင်လာပြီး လက်ကြီးသမားများထံသို့ ပြန်သွင်းသည့်သူများလည်းရှိနေသည်။
စိတ်ကြွဆေးပြားအလုံးရေပေါင်း နှစ်ရာခန့်ပါဝင်သည့် နှစ်လက်မခွဲပတ်လည် ပလတ်စတစ်အိတ်တစ်အိတ်အား တရုတ်ပြည်နယ်စပ်မှ မန္တလေးမြို့ရောက်အောင် သယ်ယူလာပါက အနည်းဆုံးအမြတ်ငွေ ကျပ်နှစ်သိန်းနီးပါးခန့်ရရှိသောကြောင့် ဆိုင်ကယ်ကယ်ရီသမားအချို့မှာ ဆေးပြားများသယ်ယူလာလေ့ရှိသည်။ ထို့ကြောင့် ဆေးပြားများ ဖမ်းဆီးရမိသည့်အမှုများထဲတွင် ဆိုင်ကယ်ကယ်ရီသမားများထံမှ ဖမ်းမိသည့် အမှုအများဆုံးပါဝင်နေကြောင်း မန္တလေးတိုင်းဒေသကြီး မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများအန္တရာယ် တားဆီးကာကွယ်ရေးအဖွဲ့ မှတ်တမ်းများတွင် ဖော်ပြသည်။
မန္တလေးမြို့တွင် မူးယစ်ဆေးဝါးများအား လက်ကားရောင်းဝယ်ဖောက်ကားနေသူများမှာ ကိုယ်ပိုင်အိမ်များဖြင့် နေထိုင်လေ့မရှိဘဲ အိမ်ငှားများတွင်သာ နေထိုင်လေ့ရှိပြီး အများစုမှာ လျှို့ဝှက်သိပ်သည်းစွာ နေလေ့ရှိသည်။ မန္တလေးမြို့တွင် မူးယစ်ဆေးဝါးများ (အထူးသဖြင့် ဘိန်း) ရောင်းဝယ်အသုံးပြုသည့်နေရပ်များအနေဖြင့် နာမည်ကျော်ကြားသည့်နေရာများမှာ တာရိုးရှိ ကျောက်သပိတ်ရပ်ကွက်နှင့် ရတနာပုံမြို့သစ်များဖြစ်သည်။ ဆေးပြားအရောင်းအ၀ယ်လုပ်ကိုင်သူများအကြားတွင်မူ နေရပ်အတိအကျမရှိဘဲ လက်ကိုင်ဖုန်းများဖြင့်သာ တိတ်တဆိတ် အရောင်းအ၀ယ်ပြုလုပ်လေ့ရှိသည်။
“၂၀၁၂ ထဲမှာ အကြီးဆုံးမိတဲ့ ဆေးပြားအမှုကို စစ်လိုက်တော့ အာဏာပိုင်တွေ၊ ဌာနဆိုင်ရာတွေ၊ ၀န်ထမ်းတွေ၊ ရပ်ကွက်ခံတွေကို ပေါင်းထားတာမရှိဘူး။ သူ့ဂိုဏ်းနဲ့သူပဲ အချိတ်အဆက်တွေနဲ့ လုပ်နေကြတာ။ ဒါပေမဲ့ ၁၆ မိုင်ဂိတ်မှာ ဆေးပြားတစ်သိန်း၊ နှစ်သိန်းဖမ်းမိတဲ့အမှုတွေမှာတော့ ၀န်ထမ်းတွေ၊ ၀န်ထမ်းဟောင်းတွေပါနေတယ်။ များသောအားဖြင့် အကြီးအကျယ်လုပ်သူတွေက တိတ်တဆိတ်ပဲ လုပ်ကြတာများတယ်”ဟု ရဲမှူးဒီဒီယောဟန်က ထည့်သွင်းပြောသည်။ မူးယစ်ဆေးဝါးရောင်းဝယ်ဖောက်ကားသူအများစုမှာ ကျောက်လုပ်ငန်းနှင့် ဆောက်လုပ်ရေးလုပ်ငန်းကဲ့သို့သော လုပ်ငန်းကြီးများကို ဗန်းပြလုပ်ငန်းများအဖြစ် လုပ်ဆောင်လျက်ရှိသည်။ မန္တလေးမြို့တွင် ဖမ်းဆီးရမိသည့် မူးယစ်ဆေးဝါးမှုများ အားလုံးနီးပါးတွင် ကျောက်စိမ်းဖြတ်စများနှင့်ပါ တွဲဖက်ဖမ်းမိလေ့ရှိကြောင်း မန္တလေးတိုင်းဒေသကြီး မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများအန္တရာယ် တားဆီးကာကွယ်ရေးအဖွဲ့မှ သတင်းရရှိသည်။
သတင်းပေးများမွေးပြီး မူးယစ်ဆေးဝါးရောင်းဝယ်ပြုလုပ်နေသူများအား လိုက်လံစောင့်ကြည့်မှုများ ပြုလုပ်နေသော်လည်း သတင်းပေးအများစုမှာ မူးယစ်ဆေးဝါးလက်ကြီးရောင်းဝယ်နေသူများ၏ လုံခြုံရေးစနစ်ကို မထိုးဖောက်နိုင်သေးပေ။ လက်ကားရောင်းဝယ်နေသူများမှာ လက်ကိုင်ဖုန်းများဖြင့် ကင်းတိုကင်းရှည်များ ချထားမှုများကြောင့် လိုက်လံသတင်းရယူရေးနှင့် ဖမ်းဆီးနိုင်ရေးအတွက် အခက်အခဲများရှိနေသည်။ လက်ကား မူးယစ်ဆေးဝါးရောင်းဝယ်ဖောက်ကားနေသူများ ရှိနေသကဲ့သို့ လက်လီပြန်လည်ရောင်းချနေသူများမှာလည်း မြို့အနှံ့ပျံ့နှံ့လျက်ရှိပြီး ကေတီဗီ၊ ကာရာအိုကေဆိုင်များတွင်လည်း လက်သိပ်ထိုးရောင်းချမှုများ ရှိနေသည်။ မူးယစ်ဆေးဝါးများအား လက်လီရောင်းချသည့်နေရာအဖြစ် မန္တလေးမြို့တွင်နာမည်ကြီးသည့် ရတနာပုံမြို့သစ်အတွင်းရှိ မူးယစ်ဆေးရောင်းချသည့် အိမ်များသို့ နေ့စဉ်မူးယစ်ဆေးလာရောက်သုံးစွဲသည့် လူငယ်ပေါင်း ပျမ်းမျှ ၁၅၀ ခန့်ရှိပြီး ရောင်းချသူများကိုယ်တိုင်ကလည်း ရပ်ကွက်အတွင်းတွင် ကင်းစနစ်ဖြင့် လူငါးယောက်ခန့်အား အမြဲတစေတာဝန်ချထားလေ့ရှိကြောင်း ရတနာပုံမြို့သစ်နေ အမျိုးသားတစ်ဦးကပြောသည်။
ရပ်ကွက်ထဲမှာတော့ ဆေးရောင်းတဲ့အိမ်က ခုနစ်အိမ်လောက်ရှိတယ်။ ဘိ (ဆေးသုံးတဲ့အခန်း)လည်း ငှားတယ်။ အရောင်းအ၀ယ်လုပ်သူတွေကတော့ သူဌေးတွေ၊ သုံးနိုင်ဖြုန်းနိုင်တဲ့သူတွေပေါ့။ ရောင်းသူနဲ့ ရဲကြားက ချိတ်ပေးတဲ့သူတောင် အခုသူဌေးဖြစ်နေပြီ။ သူလည်း ကျွန်တော်တို့ရပ်ကွက်ထဲမှာပဲ နေနေတာ”ဟု ၎င်းကဆက်လက်ပြောသည်။
သို့သော်လည်း မူးယစ်ဆေးဝါးရောင်းဝယ်သည့် လက်လီရော လက်ကားပါ ဖောက်ကားသူအများစုမှာ ပြည်သူများအကြားတွင်ပင် လုပ်ကိုင်နေရသောကြောင့် ရပ်ကွက်ဒေသခံပြည်သူများ၏ သတင်းပေးမှုများသာရှိပါက ၎င်းတို့အား ယခုထက်ပိုမိုဖမ်းဆီးနိုင်မည်ဖြစ်ကြောင်း တာဝန်ရှိသူတစ်ဦးကပြောသည်။
မန္တလေးမြို့အတွင်း ဖမ်းဆီးရမိသည့် မူးယစ်ဆေးဝါးရောင်းဝယ်ဖောက်ကားမှုများအနက် အများစုမှာလည်း ပြည်သူများ၏ သတင်းပေးမှုများကြောင့်ဖြစ်ကြောင်း မန္တလေးတိုင်းဒေသကြီး မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများအန္တရာယ် တားဆီးကာကွယ်ရေးအဖွဲ့မှ တာဝန်ရှိသူကဆိုသည်။
ရှမ်းပြည်နယ်မှ အဓိကထွက်သည့် ဘိန်းစိမ်းများ ဘိန်းဖြူများကိုလည်း မန္တလေးမြို့မှတစ်ဆင့် ကချင်ပြည်နယ်သို့ သယ်ယူရောင်းဝယ်မှုများရှိသည်။ ဘိန်းဖြူနှင့်ဆက်စပ်သည့် မူးယစ်ဆေးများကိုမူ မန္တလေးဘူတာကြီးမှတစ်ဆင့် စစ်ကိုင်းတိုင်းကိုကျော်ဖြတ်ကာ ကချင်ပြည်နယ်အတွင်းရှိ မိုးကောင်း၊ မိုးညှင်း၊ မြစ်ကြီးနားမြို့များသို့ အနည်းဆုံးအခကြေးငွေ ကျပ်ဆယ်သိန်းရယူပြီး မီးရထားလမ်းကြောင်းမှ ခိုးဝှက်သယ်ယူနေသူများလည်းရှိနေကြောင်း မန္တလေးဘူတာကြီးရှိ မီးရထားရဲတပ်ဖွဲ့မှ သတင်းရရှိသည်။
၂၀၁၃ ခုနှစ်တွင် မန္တလေးဘူတာကြီး၌ ဘိန်းဖြူဘိန်းစိမ်းများ သယ်ဆောင်သည့် အမျိုးသမီး ၂၈ ဦးနှင့် အမျိုးသားခုနစ်ဦးပါဝင်သည့် အမှုပေါင်း ၂၆ မှု၊ စုစုပေါင်းတန်ဖိုးငွေ ကျပ်သိန်းပေါင်း ၄၈၀၀ ကျော်အား မီးရထားရဲတပ်ဖွဲ့က ဖမ်းဆီးနိုင်ခဲ့သည်။
မန္တလေးမြို့ပေါ်တွင်ဖြစ်ပွားခဲ့သည့် ခိုးမှု၊ လုယက်မှုများအနက် အမှုတချို့မှာ မူးယစ်ဆေးဝါးမှုများနှင့် သွယ်ဝိုက်ဆက်စပ်လျက်ရှိနေသည်ဟုလည်း မန္တလေးတိုင်းဒေသကြီးရဲတပ်ဖွဲ့မှူးရုံးမှ ဒုတိယရဲမှူးကြီးဇော်မင်းဦးကပြောသည်။
မူးယစ်ဆေးဝါးများအား လက်လီရောင်းချနေသူများက မူးယစ်ဆေးသုံးသူများ၏ နေအိမ်ရှေ့ပေါက်အထိ လာရောက်ရောင်းချကြသောကြောင့်လည်း ဆေးသုံးစွဲသူများအနေဖြင့် အလွယ်တကူငွေရရေး ကြိုးပမ်းမှုများရှိလာပြီး လုယက်မှု၊ ခိုးမှုများအား ပြုလုပ်လာသည်။
“မန္တလေးမြို့အတွင်း ၂၀၁၃ ခုနှစ်အတွင်း ဖြစ်ပွားတဲ့ခိုးမှု၊ လုယက်မှုတွေအားလုံးက မူးယစ်ဆေးဝါးနဲ့ တိုက်ရိုက်မသက်ဆိုင်ပေမယ့် ဆက်နွှယ်မှုတွေတော့ ရှိနေတယ်”ဟု ဒုတိယရဲမှူးကြီးဇော်မင်းဦးကပြောသည်။
မြန်မာတစ်နိုင်ငံလုံးမှ မူးယစ်ဆေးဝါးနှင့် ဆက်စပ်လုပ်ငန်း လုပ်ကိုင်နေသူများကို ယခုထက် ပိုမိုဖမ်းဆီးနိုင်ရေးအတွက် ပြီးခဲ့သည့် ၂၀၁၃ ခုနှစ် စက်တင်ဘာ ၂၄ ရက်က နေပြည်တော်ရဲတပ်ဖွဲ့ဌာနချုပ် လက်အောက်ရှိ မူးယစ်တပ်ဖွဲ့မှ ဖွဲ့စည်းပုံအသစ် ထုတ်ပြန်ခဲ့သည်။
ယင်းဖွဲ့စည်းပုံအသစ်အရ မန္တလေးတိုင်းဒေသကြီးအတွင်းတွင် မူးယစ်အထူးတပ်ဖွဲ့နှစ်ခုမှ လေးခုအထိ တိုးမြှင့်ခဲ့ပြီး တပ်ဖွဲ့ဝင်အင်အားကိုလည်း အယောက် ၇၀ ကျော်ရှိနေရာမှ ၁၅၀ ကျော်ထိ တိုးမြှင့်ချထားခဲ့ပြီးဖြစ်သည်။ မူးယစ်ဆေးဝါးမှုများ ကြီးလျှင်ကြီးသလို ၎င်းအင်အားနှင့် သက်ဆိုင်ရာနယ်မြေရဲစခန်းများမှ ရဲတပ်ဖွဲ့ဝင်များ ပူးပေါင်းဖမ်းဆီးအရေးယူခြင်းများ ပြုလုပ်လျက်ရှိသော်လည်း မူးယစ်ဆေးဝါးအရောင်းအ၀ယ်လုပ်သူများ၏ ကင်းချသည့်စနစ်များနှင့် လှည့်ကွက်အမျိုးမျိုးတို့ကြောင့် သွားရောက်ဖမ်းဆီးရာတွင်မူ ဆေးများအား လက်ဝယ်မတွေ့ရှိသောကြောင့် အရေးယူ၍မရသည့် ဖြစ်စဉ်များလည်း ရှိနေသည်။
မူးယစ်ဆေးဝါးနှိမ်နင်းရေးတပ်ဖွဲ့များအနေဖြင့် မူးယစ်မှုများ တိုးမြှင့်ဖမ်းဆီးနိုင်ပါက ရာထူးတက်ခြင်း၊ နိုင်ငံတော်အစိုးရမှပေးသည့် နာမည်ကောင်းလက်မှတ်များရရှိခြင်း၊ အဖွဲ့အစည်းနာမည်တက်ခြင်းတို့ကြောင့် မူးယစ်အမှုအားလုံးကို ဖမ်းလိုကြောင်း ရဲမှူးဒီဒီယောဟန်ကဆိုသည်။ ထိုသို့ ဖမ်းနိုင်ရန်အတွက်လည်း ပြည်သူများက သတင်းပေးရန်လိုအပ်ကြောင်း ၎င်းကပြောသည်။
မူးယစ်မှုများပပျောက်ရန် ရဲတပ်ဖွဲ့မှာ အဓိကကျပြီး လက်ကြီးရောင်းချသူများကို အမှန်တကယ်ဖော်ထုတ်နိုင်လျှင် အမြစ်ပြတ်ချေမှုန်းရန် လွယ်ကူကြောင်းလည်း မင်းတဲအီကင်းရပ်ကွက်မှ အမျိုးသားကြီးတစ်ဦးကပြောသည်။
ဓာတ်ပုံ- ညီညီဇော်
7Day News Journal
No comments:
Post a Comment