မြစ်ကြီးနား လေဆိပ်မြင်ကွင်း (ဓာတ်ပုံ – စောရန်နိုင် / ဧရာဝတီ)
ငြိမ်းချမ်းရေးအတွက် အောက်တိုဘာလကုန်တွင် မြစ်ကြီးနားမြို့တမြို့လုံး လျှပ်စစ်မီးရရှိစေရန် လုပ်ဆောင်ပေးသွားမည်ဟု လျှပ်စစ်စွမ်းအား ဝန်ကြီးဌာန ပြည်ထောင်စုဝန်ကြီး ဦးခင်မောင်စိုးက ပြောကြားလိုက်သည်။
ယခင်က ငြိမ်းချမ်းရေး ဆွေးနွေးပွဲများ၌ ပြည်ထောင်စုဝန်ကြီး ဦးအောင်မင်း ခေါင်းဆောင်သော အဖွဲ့အတွင်း မွေးမြူရေးနှင့် ရေလုပ်ငန်း ပြည်ထောင်စုဝန်ကြီး ဦးအုန်းမြင့်နှင့် သဘာဝ ပတ်ဝန်းကျင်နှင့် သစ်တောဦးစီးဌာနမှ ပြည်ထောင်စုဝန်ကြီး ဦးဝင်းထွန်းတို့သာ အဖွဲ့ဝင်အဖြစ် လိုက်ပါတတ်သော်လည်း ယခုတခေါက် မြစ်ကြီးနားမြို့တွင် အောက်တိုဘာ ဂ၊ ၉၊ ၁၀ ရက် ၃ ရက် အကြာ ဆွေးနွေးညှိနှိုင်းမှုတွင်မူ လျှပ်စစ် ဝန်ကြီးဌာနမှ ပြည်ထောင်စုဝန်ကြီးပါ အဖွဲ့ဝင်အဖြစ် ထပ်မံ ပါဝင် လိုက်ပါလာသည့် အပေါ် မေးမြန်းစဉ် ၎င်းက ထိုသို့ဖြေကြားခဲ့ခြင်း ဖြစ်သည်။
“အမှန်က ဒီအဖွဲ့မှာက အဖွဲ့ဝင်အဖြစ် ပါဝင်ခဲ့ပြီးသားပါ။ နောက်တခုကတော့ လကုန်မှာ မြစ်ကြီးနားတမြို့လုံး မီးရရေးအတွက် လာပြီး လုပ်ဆောင်တာလည်း ပါတာပေါ့။ ကြိုးသွယ်တန်းရေး ကိစ္စတွေကို လုပ်ဆောင်နေပါပြီ။ ဒီလကုန်မှာတော့ မြစ်ကြီးနား က မီးလုံးဝ လင်းတော့မှာပါ” ဟု သူက ဆက်ပြောသည်။
ကချင်ပြည်နယ် မြစ်ကြီးနားအတွက် ချီဗွေငယ် ရေအားလျှပ်စစ်မှ ၉၉ မဂ္ဂါဝပ်၊ တာပိန် ၁ မှ ၁၁၀ မဂ္ဂါဝပ် စသည်တို့မှ စုစုပေါင်း လျှပ်စစ်မဂ္ဂါဝပ် ၂၀၀ ခန့် ထုတ်လုပ်နိုင်ရန် စီစဉ်ထားကြောင်း၊ ၎င်းတို့မှ တဆင့် လိုင်းသွယ်တန်းရန် စီစဉ်ထားကြောင်း သိရသည်။
“မြေပေါ်ကြိုးတွေ အခု ဆက်ပြီးတော့ လုပ်နေပါတယ်။ အစိုးရပိုင်းကပဲ လုပ်ဆောင် ပေးနေတာပါ။ မြစ်ကြီးနားအပြင် မိုးကောင်း၊ မိုးညှင်း၊ ဟိုပင် စတဲ့နေရာတွေပါ ရမယ်။ ဒေါ့ကွန်းယံ ဘက်လည်း လိုင်းဆွဲနေပြီ။ ဒီနှစ်မကုန်ခင်တော့ ကချင်ပြည်နယ် တခုလုံး မီးလင်းမယ် ထင်တယ်” ဟု ၎င်းက ဆက်ပြောသည်။
လက်ရှိတွင် ကချင်ပြည်နယ် မြစ်ကြီးနားမြို့၌ မလိချောင်း ရေအားလျှပ်စစ် ထုတ်လုပ်မှုမှ မီးရယူနေရပြီး လောက်ငမှုမရှိ သည့်အတွက် ပြည်နယ်အစိုးရမှ မီးစက်ဖြင့် မီးပေးလျှက် ရှိသည်ဟု ကချင်ပြည်နယ် အစိုးရအဖွဲ့မှ သိရသည်။
“အခု လတ်တလောမှာ မလိချောင်းဘက်က ရေအားလျှပ်စစ် ထုတ်တဲ့အပိုင်းက မိုးရေကြီးလို့ ပျက်စီးသွားတော့ လတ်တလောမှာ မီးစက်နဲ့ပဲ မီးပေးနေရတယ်။ ဒီတော့ အချိန်ပြည့် မပေးနိုင်ဘူး” ဟု ကချင်ပြည်နယ်အစိုးရ အဖွဲ့မှ တာဝန်ရှိသူ တဦးက ဆိုသည်။
မီးစက်ဖြင့် မီးပေးသည်ဟု ဆိုသော်လည်း ပြည်နယ်တခုလုံး လောက်ငှအောင် ပေးနိုင်ခြင်း မရှိသေးကြောင်း မြစ်ကြီးနား ဒေသခံ များထံမှ သိရသည်။
“မီးပေးတယ် ဆိုတာ အချိန်ပိုင်းပါပဲ။ များသောအားဖြင့် စီးပွားရေးလုပ်ရင် ကိုယ့်မီးစက်နဲ့ကိုယ် လုပ်ရတာ များပါတယ်။ အခုကတော့ နေ့ခင်းပိုင်းက လုံးဝ မီးမရတာများတယ်။ အစိုးရက ပေးတယ်ဆိုပေမယ့် လောက်ငှမှု မရှိပါဘူး” ဟု ဒေသခံ ဟိုတယ်လုပ်ငန်းရှင် တဦးဖြစ်သူ လဂျန် မိုင်ဂျာက ပြောသည်။
မြန်မာနိုင်ငံ၏ လက်ရှိ လျှပ်စစ်ထုတ်လုပ်နိုင်သည့် ပမာဏမှာ ၃၀ ရာခိုင်နှုန်းသာ ရှိနေပြီး လာမည့် ၂၀၁၄ တွင် ၁၅ ရာခိုင်နှုန်း ထပ်မံ တိုးမြှင့် ထုတ်လုပ်နိုင်ရန် စီစဉ်ထားကြောင်း၊ ၂၀၁၅ တွင် စုစုပေါင်း ထုတ်လုပ်မှုပမာဏ ၅၀ ရာခိုင်နှုန်း ရှိစေရန် စီစဉ် လုပ်ဆောင် နေကြောင်း ပြည်ထောင်စုဝန်ကြီး ဦးခင်မောင်စိုးက ပြောကြားသည်။
Irrawaddy News
No comments:
Post a Comment