menu

Tuesday 5 November 2013

မြန်မာ့ ဆယ့်နှစ်လရာသီ ပွဲတော်များ....(လှမြင့် (ရန်ကုန်တက္ကသိုလ်))

C-6-11
ဒဂုံမြို့သစ်မြောက်ပိုင်း အနှေးယာဉ် အမှတ် (၅)ဂိတ်လုပ်သားများ စုပေါင်းဘုံကထိန် မဏ္ဍပ်ကို တွေ့ရစဉ် (ဓာတ်ပုံ- အောင်မျိုးသန့်)

မြန်မာရိုးရာ ယဉ်ကျေးမှု ဓလေ့အရ တစ်နှစ်တာ ကာလဖြစ်သော တန်ခူးလမှသည် တပေါင်းလတိုင်အောင် တစ်ဆယ့်နှစ်လ ရှိသည့်အနက် တစ်ဆယ့်နှစ်လလုံးတွင် ရာသီပွဲတော်များကို မြန်မာ့ရေမြေ သဘာဝ ယဉ်ကျေးမှု ဓလေ့ထုံးစံများနှင့်အညီ မြန်မာမှု အခြေခံလျက် ရှေးခေတ်အဆက်ဆက်မှသည် မျက်မှောက်ခေတ်တိုင်အောင် လစဉ်ကျင်းပလျက် ရှိနေသည်။ ထို့ကြောင့် မြန်မာ့ဆယ့်နှစ်လရာသီ ပွဲတော်များသည် ဘာသာရေး ရိုးရာယဉ်ကျေးမှုနှင့် လူမှုရေးဆိုင်ရာ ပွဲတော်များအဖြစ် ခေတ်အဆက်ဆက်၏ ခေတ်အရိပ်၊ ခေတ်ကြေးမုံကို ထင်ဟပ်နေသော ပွဲတော်များဖြစ်ကြသည်။
မြန်မာတို့၏ ဆယ့်နှစ်လရာသီ ပွဲတော်များတွင် တန်ခူးလ၌ သင်္ကြန်ပွဲတော်၊ ကဆုန်လ၌ ညောင်ရေသွန်းပွဲတော်၊ နယုန်လ၌ ရဟန်းသံဃာတော်များ၏ စာပြန်ပွဲတော်၊ ၀ါဆိုလ၌ ၀ါဆိုသင်္ကန်းကပ်လှူပွဲ၊ ၀ါခေါင်လ၌ စာရေးတံမဲပွဲ၊ တော်သလင်းလ၌ လှေသဘင်ပွဲ၊ သီတင်းကျွတ်လ၌ ဆီမီးပူဇော်ပွဲ၊ တန်ဆောင်မုန်းလ၌ ကထိန်သင်္ကန်း ကပ်လှူပွဲ၊ နတ်တော်လ၌ စာဆိုတော်ပွဲ၊ ပြာသိုလ၌ မြင်းခင်းသဘင်ပွဲ၊ တပို့တွဲလ၌ ထမနဲပွဲ၊ တပေါင်းလ၌ သဲပုံစေတီပွဲ (ဘုရားပွဲ) တို့ကို လစဉ်အမြဲ မြို့ပြမှအစ ကျေးလက်တောရွာအဆုံး ခြိမ့်ခြိမ့်သဲသဲ ကျင်းပပြုလုပ်ကြသည်။ ယင်းသို့ မြန်မာ့ဆယ့်နှစ်လရာသီ ပွဲတော်များကို မြန်မာတို့ ခေတ်အဆက်ဆက်တွင် ခမ်းနားထည်ဝါ၀င့်ကြွားစွာ ကျင်းပခဲ့မှု သမိုင်းအစဉ်လာကို ကုန်းဘောင်ခေတ်နှောင်း စာဆိုကျော် ကင်းဝန်မင်းကြီးက-

"အတာတန်ခူး၊ နှစ်ဦးညောင်ရေ၊ စာပလွေခင်း၊ ပဉ္စင်းတော်ခံ စာရေးတံနှင့် မြစ်ယံပွဲကြီး၊ ဆီမီးထွန်းချိန်၊ ကထိန်နတ်ကျင်း၊ မြင်းခင်းဆင်ယင်၊ သဘင်မီးပုန်း၊ လူလုံးသဲပုံ၊ စေ့စုံကျင်းပ ဆယ့်နှစ်လ မှတ်ကြရာသီပွဲ" ဟူ၍ လွယ်ကူစွာ မှတ်သားသိရှိနိုင်ရန် ကဗျာလင်္ကာ ဖွဲ့သီခဲ့ပါသည်။
မြန်မာ့ဆယ့်နှစ်လရာသီ ပွဲတော်များသည် မြန်မာ့ယဉ်ကျေးမှု ဘာသာရေး၊ လူမှုရေးဓလေ့ ထုံးစံများကို အခြေခံ အရင်းတည်လျက် ကျင်းပခဲ့သော ရိုးရာယဉ်ကျေးမှု ပွဲတော်များဖြစ်ကြသည် သာမက ရှေးမြန်မာမင်းများ၏ ခေတ်အဆက်ဆက်တွင် ဆယ့်နှစ်လရာသီ ပွဲတော်များကို မြန်မာမင်းခမ်းမင်းနား ပွဲတော်များအဖြစ် သတ်မှတ်ကျင်းပ ခဲ့ကြသည်။ ယင်းသို့ မင်းခမ်းတော် ဆယ့်နှစ်ရာသီ ပွဲတော်များအဖြစ် သတ်မှတ်ကျင်းပ ခဲ့ပုံများကို ကုန်းဘောင်ခေတ် စာဆိုကျော် အင်ရုံရွာစား ဥဇနာ၏ "လောကဗျူဟာ အင်ရုံစာတမ်း" တွင် မှတ်တမ်းတင်ခဲ့သည်။
မြန်မာ့ဆယ့်နှစ်လရာသီ၏ တစ်လချင်း ကျင်းပခဲ့သော ပွဲတော်များတွင် မြန်မာတို့၏ စိတ်ရင်းစေတနာများသည် ထင်ဟပ်ဖော်ပြလျက် မြန်မာ့စိတ်ရင်း၊ မြန်မာ့စေတနာ၊ မြန်မာ့ယဉ်ကျေးမှု ပုံရိပ်များကို ဖော်ကျူးနေ . . . . .
ယင်းလောကဗျူဟာ အင်ရုံစာတမ်းလား ရှေးမြန်မာမင်းများလက်ထက် တစ်ဆယ့်နှစ်လရာသီ မင်းခမ်းမင်းနား ပွဲတော်များ၌ နတ်တော်လတွင် မဟာပိန္နဲစသော နတ်များပူဇော်ပွဲကို ပြုလုပ်ခဲ့ကြောင်း၊ တပို့တွဲလတွင် ဘုရားစေတီ ပုထိုးများ၌ မီးပုန်းပွဲဟူသော မီးပူဇော်ပွဲများကို နံနက်စောစော အချိန်တွင် အမွေးနံ့သာ သနပ်ခါးစသည်တို့ဖြင့် ပူဇော်ခဲ့ကြောင်း ရေးဖွဲ့ဖော်ထုတ် မှတ်တမ်းတင်ထားခဲ့သည်။ မျက်မှောက်ခေတ်၏ မြန်မာ့ရိုးရာ ဆယ့်နှစ်လရာသီ ပွဲတော်များတွင်မူ ခေတ်နှင့်အညီ နတ်တော်လ၌ စာဆိုတော်ပွဲနှင့် တပို့တွဲလ၌ ထမနဲပွဲများ အသွင်သို့ ပြောင်းလဲကျင်းပလျက် ရှိနေသည်။
မြန်မာ့ရိုးရာ ဆယ့်နှစ်လရာသီ ပွဲတော်များတွင် တန်ခူးလ၏ သင်္ကြန်ပွဲတော်၊ တော်သလင်းလ၏ လှေသဘင်ပွဲတော်၊ နတ်တော်လ၏ စာဆိုပွဲတော်၊ ပြာသိုလ၏ မြင်းခင်းသဘင်ပွဲတော်၊ တပို့တွဲလ၏ ထမနဲပွဲတော်တို့သည် မြန်မာ့ရိုးရာ ယဉ်ကျေးမှုနှင့် လူမှုရေးကို အခြေခံ၍ပြုလုပ် ကျင်းပသော ရိုးရာပွဲတော်များ ဖြစ်ကြသည်။ အထူးသဖြင့် တော်သလင်းလ၏ လှေသဘင်ပွဲတော်နှင့် ပြာသိုလ၏ မြင်းခင်းသဘင် ပွဲတော်တို့သည် နိုင်ငံတော်၏ ကာကွယ်ရေး အင်အား၊ စစ်ရေးအင်အား တောင့်တင်းစေရေးအတွက် ရေတပ်သူရဲကောင်းများနှင့် မြင်းတပ်၊ ဆင်တပ်၊ ခြေလျင်တပ် စစ်သည်သူရဲကောင်းများ ရွေးချယ်ဂုဏ်ပြုသော ပွဲတော်ဖြစ်သည်။
တော်သလင်းလရာသီ ပွဲတော်ဖြစ်သော လှေပြိုင်ပွဲများ ကျင်းပ၍ ထူးချွန်ထက်မြက်သည့် ရေတပ်သားကောင်းများ ပေါ်ထွန်းလာစေရေးကို ဦးတည်လျက်ပြုလုပ် ကျင်းပပေးခဲ့မှုကို ကုန်းဘောင်ခေတ်စာဆို ဦးယာ၏ ဆယ့်နှစ်လရာသီဘွဲ့လူးတား တော်သလင်းလဘွဲ့၌
"တော်သလင်းဟု မြစ်တွင်းသဘင် လှေပွဲဆင်၍ လက်သင်လှော်ကား၊ ရွှေလှေများကို ကစားလူးလာ၊ စုန်ကာဆန်လျက်၊ ရွှေတက်ပြိုးပြောင်၊ ဗုံတော်စည်မောင်း၊ ရေကြောင်းမြစ်လယ်၊ ပျော်ဖွယ်အံ့ချီး၊ တီးမှုတ်ကြော်ကြားသည် ပွဲသာတွင်" ဟူ၍ ဖွဲ့ဆိုမှတ်တမ်း တင်ခဲ့သည်။
ဆောင်းရာသီ ပြာသိုလ၏ ခွာညိုပန်းများ ပွင့်ချိန်တွင် မြင်းခင်းသဘင် ပွဲတော်ကို ရှေးမြန်မာမင်းများလက်ထက် ခေတ်ကာလများအနက် ပင်းယခေတ် ငါးစီးရှင်ကျော်စွာမင်း လက်ထက်ကပင် စတင်ကျင်းပ နေခဲ့ကြောင်းကို ငါးစီးရှင်ကျော်စွာ၏ မြင်းစိုင်းရွှေပြည်ကာ ချင်းကဗျာ၌ "နွယ်ပန်းခွာညို၊ ပွင့်ပေလို၊ ပြာသိုဆောင်းလလယ်၊ ဆောင်းလလယ်၊ ယရည်သွန်းသွန်း၊ မြင်းသည်ဝန်း၊ လှံချွန်တွန်းတက်ပယ်၊ တွန်းတက်ပယ်" ဟူ၍ ရေးဖွဲ့မှတ်တမ်း တင်ခဲ့သည်။
ထိုနည်းတူ မြန်မာ့ရိုးရာ ယဉ်ကျေးမှု ပွဲတော်တစ်ခုဖြစ်သော တန်ခူးလ သင်္ကြန်ပွဲတော်သည်လည်း ပျူခေတ်နှောင်း နရသီဟပတေ့မင်း (တရုတ်ပြေးမင်း)လက်ထက်ကပင် ဧရာဝတီမြစ် အတွင်း၌ မင်းခမ်းမင်းနားဖြင့် ပွဲသဘင်အဖြစ် ဆင်ယင်ကျင်းပခဲ့ကြောင်းကို ညောင်ရမ်းခေတ်စာဆို ဦးကုလားရေးသား ပြုစုခဲ့သော မဟာရာဇ၀င်တော်ကြီးနှင့် ကုန်းဘောင်ခေတ် ဘကြီးတော်မင်း လက်ထက်တွင် ပြုစုခဲ့သော မှန်နန်းမဟာ ရာဇ၀င်တော်ကြီးများ၌ မှတ်တမ်းတင်ခဲ့သည်။
ကဆုန်လတွင် ကျင်းပသော ညောင်ရေသွန်းပွဲတော်၊ ၀ါဆိုလ၏ ပဉ္စင်းခံပွဲတော်၊ ၀ါဆိုသင်္ကန်း ကပ်လှူပွဲ၊ သီတင်းကျွတ်လ၏ မီးထွန်းပူဇော်ပွဲ၊ တန်ဆောင်မုန်းလ၏ ကထိန်ပွဲတော်များကို ပုဂံခေတ် အလယ်ပိုင်း ဗုဒ္ဓဘာသာ စတင်ဖွံ့ဖြိုး တိုးတက်ခဲ့သည့် အချိန်ကာလမှ စတင်၍ ကျင်းပခဲ့ကြောင်းကို ပုဂံခေတ်တွင် ရေးထိုးခဲ့သော ကျောက်စာအချို့နှင့် ပုဂံခေတ် ဂူဘုရား၊ ပုထိုးများ၌ ရေးသားခဲ့သော မင်စာအထောက်အထားများအရ သိရှိနိုင်သည်။ ယင်းပွဲတော်များသည် ဘာသာရေးကို အခြေခံသော ပွဲတော်များပင် ဖြစ်သည်။ ထိုနည်းတူ နယုန်လ၏ စာဆိုပွဲ၊ ၀ါခေါင်လ၏ စာရေးတံမဲပွဲ၊ တပေါင်းလ၏ သဲပုံစေတီပွဲ (ဘုရားပွဲ) များသည်လည်း ရှေးမြန်မာ့သမိုင်းစဉ်၏ ခေတ်အဆက်ဆက် ကျင်းပခဲ့သော ဘာသာရေး ပွဲတော်များပင် ဖြစ်ကြသည်။
ရှေးမြန်မာမင်းများ လက်ထက်တွင် နတ်တော်လ၌ မဟာပိန္နဲစသော နတ်များကို ပူဇော်ခဲ့သောကြောင့် နတ်တော်လဟု ခေါ်ဆိုသတ်မှတ် ခဲ့သည်။ နောက်ပိုင်းကာလများတွင် ခေတ်စနစ်၊ ခေတ်အမြင်၊ ခေတ်ရေးအခြေအနေနှင့်အညီ နတ်တော်လ၌ နတ်များကို ပူဇော်ပသသော ပွဲတော်အစား စာဆိုတော်ကြီးများ၊ စာရေးဆရာကြီးများကို ဂုဏ်ပြုပူဇော် ချီးမြှောက်သော စာပေယဉ်ကျေးမှု ပွဲတော်အသွင်သို့ ကူးပြောင်း၍ နတ်တော်လတွင် စာဆိုတော်ပွဲအဖြစ် ကိုလိုနီခေတ်မှ စတင်ကာ ပြောင်းလဲကျင်းပ လာခဲ့သည်မှာ ယခုအချိန်တိုင်အောင်ပင် ဖြစ်သည်။
တပို့တွဲလတွင် မြန်မာမင်းများ လက်ထက်က မီးပုန်းပွဲဟူသော ဘာသာရေး ပွဲတော်ကို ကျင်းပခဲ့ကြသည်။ မီးပုန်းပွဲဟူသည် တပို့တွဲလတွင် အအေးဓာတ် လွန်ကဲမှုကြောင့် မြတ်စွာဘုရားရှင်အား ရည်စူးလျက် စေတီပုထိုး ရုပ်ပွားတော်များ၌ တပို့တွဲလပြည့်နေ့ နံနက်အာရုဏ်တက်ချိန်တွင် စေတီပုထိုး ရုပ်ပွားတော်များ၏ ပတ်ပတ်လည်၌ အမွေးနံ့သာတုံးများ၊ သနပ်ခါးများ၊ ဥာဏ်ရိုးစသည်တို့ဖြင့် မီးပူဇော် ကုသိုလ်ပြု ပွဲတော်ဖြစ်သည်။ ယင်းသို့ မီးပုန်းပွဲသို့ လာရောက်ကြည်ညို ပူဇော်သူတို့အား တပို့တွဲလ ရာသီစာဖြစ်သော ထမနဲများထိုး၍ ပေးကမ်းခြင်း၊ စေတီပုထိုး ရုပ်ပွားတော်များကို ကပ်လှူခြင်းများ ပြုလုပ်ကြသောကြောင့် နှောင်းခေတ်များတွင် မီးပုန်းပွဲအစား ထမနဲပွဲအသွင်သို့ ပြောင်းလဲကျင်းပခဲ့ခြင်း ဖြစ်သည်။ ရှေးမြန်မာမင်းများ လက်ထက်တွင် တပို့တွဲလ၌ မီးပုန်းပွဲ ကျင်းပခဲ့မှုကို စာဆိုဦးယာ၏ ဆယ့်နှစ်လရာသီဘွဲ့လူးတား (တပို့တွဲလ)၌ "သုံးလူ့ချာကို ရှိန်ဝါရောင်ညီ၊ မီးပုန်းပူဇော်၊ လှူတော်မြဲ၊ ရာသီပွဲ" ဟူ၍ ဖွဲ့ဆိုမှတ်တမ်း တင်ခဲ့သည်။
မြန်မာ့ဆယ့်နှစ်လရာသီ ပွဲတော်များသည် မြန်မာ့ယဉ်ကျေးမှု ဓလေ့ထုံးစံများ၊ ဘာသာရေး ကိုင်းရှိုင်းမှုများ၊ လူမှုရေး နယ်ပယ်မှ ရိုးရာဓလေ့ ထုံးစံများကို အခြေခံ၍လစဉ် သတ်မှတ်ကျင်းပခဲ့သော အနှစ်သာရများ ပေါင်းစည်းနေသောကြောင့် မြန်မာ့စိတ်ဓာတ်၊ မြန်မာ့စေတနာ၊ မြန်မာ့စိတ်ရင်းတို့ကို ထင်ဟပ်ပေါ်လွင် နေသည်။ ထို့ကြောင့် မြန်မာ့ဆယ့်နှစ်လရာသီ၏ တစ်လချင်း ကျင်းပခဲ့သော ပွဲတော်များတွင် မြန်မာတို့၏ စိတ်ရင်းစေတနာများသည် ထင်ဟပ်ဖော်ပြလျက် မြန်မာ့စိတ်ရင်း၊ မြန်မာ့စေတနာ၊ မြန်မာ့ယဉ်ကျေးမှု ပုံရိပ်များကို ဖော်ကျူးနေသောကြောင့် တစ်ဆယ့်နှစ်လတွင် တစ်ဆယ့်နှစ်လ ပွဲများကို ကျင်းပခဲ့ခြင်းသည် မြန်မာတို့၏ "အပျော်ကျူးလိုသော စိတ်ထား၊ အချိန်ကို အလဟဿ ဖြုန်းတီးပစ်လိုသော အကျင့်ဖြင့်" ပြုလုပ်နေခြင်း မဟုတ်ပေ။
မြန်မာ့ရိုးရာ ဆယ့်နှစ်လရာသီ ပွဲတော်များသည် ယင်းသို့သော ရည်ရွယ်ချက် အနှစ်သာရနှင့် အကျိုးတရားများကို လမ်းညွှန်ဖော်ဆောင်လျက် ရှိနေသည်။

Eleven Media Group

No comments:

Post a Comment

Related Posts Plugin for WordPress, Blogger...

ShareThis