လရောင် ကြောက်သူ - ၁.....(ဂျူး)

ကျွန်မကလရောင်သည် အလွန်စိတ်ကြည်နူးနှစ်သက်စရာ ကောင်းသည်ဟု ထင်သည်။ ည၏ အရိပ်အရောင်များသည် လရောင်အောက်မှာမှပိုမိုပီပြင်ထင်ရှားသည်ဟု ထင်သည်။ နောက်ပြီး လရောင်မှာ လန်းဆန်းစေသော မွှေးရနံ့တစ်မျိုးပါဝင်နေသည်ဟုပင် ထင်၏။ လ၏ဆွဲငင်အားကိုလည်း ကျွန်မသိထား၊ လက်ခံထားသည်။ လရောင်၏စွမ်းအားအလွန်ကြီးမားလှသည်ဟု ကျွန်မထင်၏။ သို့သော် ထိုမျှအေးချမ်းဆိတ်ငြိမ်သော လရောင်ကိုမှမုန်းတီးကြောက်ရွံ့သူတစ်ဦးကိုလည်း ကျွန်မသိခဲ့ဖူးပါသည်။ အဖြစ်အပျက်သည် ထူးဆန်းအံ့သြစရာဟုထင်ရသော်လည်းတကယ်တော့ အလွန်ရိုးစင်းသော ဖြစ်ရိုးဖြစ်စဉ်တစ်ခုသာ ဖြစ်သည်။ ကာလကတော့ တော်တော်လေးကြာမြင့်ခဲ့ပါပြီ။

ကျွန်မအလုပ်သင် ဆရာဝန်ဘ၀မှာ မန္တလေးပြည်သူ့ဆေးရုံကြီး၏ ဌာနခွဲတစ်ခုဖြစ်သောမန္တလေးစိတ်ရောဂါအထူးကုဆေးရုံသို့သုံးပတ်ကြာမျှ တာဝန်ထမ်းဆောင်ရန် သွားခဲ့ရဖူးသည်။ ဖျားနားဆောင်(Medical Ward) များတွင်တာဝန်ကျသော အလုပ်သင်ဆရာဝန်တိုင်း ကြုံတွေ့ဖြတ်ကျော်ရသည့်တာဝန်များသာဖြစ်ပြီး ကျွန်မတို့၏အလုပ်တာဝန်များကလည်း သိပ်ထူးထူးဆန်းဆန်းကြီးမဟုတ်ပါ။ နံနက်(၈) နာရီ မှာ စိတ်ရောဂါကုဆေးရုံသို့သွား၊လူနာများကို ကိုယ်ရေး၇ာဇ၀င် မေးမြန်း၊ လူနာဆောင်များသို့ ဆရာနှင့်အတူလိုက်ကြည့်ရှုလေ့လာရင်းဆရာစာသင်သည်ကို နားထောင် ရေးမှတ်။ နေ့လည် ၁၂နာရီမှာ အဆောင်ပြန် နေ့လည်စာကိုစား၊ နေ့လည်၂ နာရီမှာ ဆေးရုံပြန်ဝင်၊ လူနာသစ်များကို ကိုယ်ရေး ရာဇ၀င်မေးမြန်း၊ လူနာမှတ်တမ်းများကိုဆရာထံပို့၊ ရောဂါ ရာဇ၀င်နှင့် ကုသမှုများကို ဆရာနှင့် ဆွေးနွေးမေးမြန်း။ အဖြစ်အပျက်များသည်နေ့စဉ်လိုလိုကြုံတွေ့ရသော အဖြစ်အပျက်များသာ ဖြစ်၏။ လူနာများသာ တစ်ယောက်ပြီးတစ်ယောက်ပြောင်းသွားသော်လည်း ရာဂါရာဇ၀င်များက ဆင်တူရိုးမှားတွေချည်းဖြစ်သည်။



စိတ်ကစဥ့်ကလျားရောဂါ၊စိတ်ကျရောဂါ၊ စိတ်ကြွရောဂါ၊ မိမိကိုယ်ကို သေကြောင်းကြံစည်သည့်ရောဂါ၊ ၀က်ရူးပြန်ရောဂါတို့ဖြစ်သည်။ မိမိကိုယ်ကို သေကြောင်းကြံစည်သူများ ကိစ္စမှာတော့ ရဲနှင့် သက်ဆိုင်သောအမှု(police case) ဖြစ်သဖြင့် ကျွန်မတို့ အလုပ်သင်ဆရာဝန်များ မှတ်ချက်ရေးပြီးတိုင်း ဆရာ့ထံသို့လွှဲပြောင်းပေးအပ်ရလေ့ရှိသည်။ဆရာက ထပ်မံစစ်ဆေးမေးမြန်းပြီးမှ စိတ်ရောဂါရှိမရှိ အတည်ပြု သတ်မှတ်ပေးလေ့ရှိသည်။ ကျွန်မကြုံတွေ့ရသောကျွန်မ မမေ့နိုင်သည့် လရောင်ကြောက်သူတစ်ဦးမှာ မိမိကိုယ်မိမိ သေကြောင်းကြံစည်မှုဖြင့်ကျွန်မတို့ဆေးရုံသို့ စိတ်အခြေအနေ စစ်ဆေးခံရန် ဖျားနာဆောင်တစ်ခုမှ လွှတ်လိုက်သော လူနာတစ်ဦးဖြစ်သည်။လူနာသည် အမျိုးသမီးတစ်ဦးဖြစ်သည်။ ထူးဆန်းသည်မှာ ပိုးသတ်ဆေးသောက် မိမိကိုယ်ကို သေကြောင်းကြံစည်သူတော်တော်များများနှင့် မတူဘဲ အမှန်ကို ၀န်ခံရဲသော သတ္တိရှိသူဖြစ်နေ၏။ ရေနံဆီ၊ ပိုးသတ်ဆေးစသည်တို့ကို သောက်ပြီး ဆေးရုံသို့ရောက်လာသော လူနာ အတော်များများသည် မှားသောက်မိလို့ပါဟူသော ဆင်ခြေကို ပေးတတ်ကြ၏။ ဤအမျိုးသမီးကတော့ တည်ငြိမ်သော မျက်ဝန်းများဖြင့်" သေချင်လို့ သောက်တာပါ " ဟုဖြေခဲ့သည်။
"ဘာဖြစ်လို့ သေချင်တာလဲ " ဟု ကျွန်မကထပ်မေးတော့ အမျိုးသမီးမျက်နှာ အနည်းငယ်တင်းသွားပါသည်။ထိုစဉ်က ကျွန်မ၏ အသက်မှာ ၂၄နှစ်သာရှိသေး၏။ အမျိုးသမီးကတော့ အသက်၃၅နှစ်ရှိနေပြီ။ ကျွန်မကသိပ်ငယ်ရွယ်နေလို့များ သူမက မလေးမစားဆက်ဆံနေတာလားဟု ထင်ရအောင်ကလည်း သူမ၏ ဟန်ပန်က ရိုကျိုးမှုအပြည့်ဖြစ်၏။

ပထမတော့ လူနာချင်းလွှဲပြောင်းရလျှင် ကောင်းမလားဟု တစ်ဖက်ခန်းရှိ သူငယ်ချင်း အမျိုးသားဆရာဝန်ထံလှမ်းအကဲခတ်မိသေး၏။ သို့သော် သူက ယောက်ျားလူနာတစ်ဦးကို မေးမြန်းနေသည်။ တမင်မျှမျှတတဖြစ်အောင်လူနာကို ခွဲဝေပေးထားခြင်းပဲဟု ကျွန်မနားလည်သွားကာ ရင့်ကျက်သော ဟန်အမူအရာဖြစ်အောင် အားတင်းထိန်းချုပ် ဆက်လက်မေးမြန်းရပါသည်။
"ဟုတ်ပါတယ်၊  ဒါကိုတော့ကျွန်မနားလည်ပါတယ် အစ်မရယ်…. ဒါပေမယ့် လူတော်တော်များများက မသေချင်ဘူး၊ သေရမှာကြောက်လို့ နည်းမျိုးစုံနဲ့ ကာကွယ်တားမြစ်နေတယ်၊အစ်မကတော့ တခြားသူတွေနဲ့ မတူဘူး၊ ဒီတော့ တခြားသူတွေရဲ့ ခံစားချက်နဲ့မတူတဲ့ သီးသန့်ခံစားချက်တစ်ခုခုရှိနေသလားဆိုတာကျွန်မသိချင်လို့ပါ၊ ကျွန်မကို ယုံယုံကြည်ကြည်ဖွင့်ပြောပါ "
သူမကမတုန်မလှုပ်။ ချော့မော့ဖျောင်းဖျ မေးမြန်း မရသောအခါ ကျွန်မအနည်းငယ် စိတ်တိုသွား၏။ ကျွန်မနောက်ထပ်ကြည့်ရမည့် လူနာတွေက ရှိသေးသည်။

"အစ်မ ဆေးရုံကဆင်းတဲ့အခါ ကိုယ့်ကိုကိုယ်သေကြောင်းကြံမှုနဲ့ ထောင်ကျရဦးမယ်ဆိုတာ အစ်မမသိသေးဘူးထင်တယ် "
အမျိုးသမီးမျက်နှာမှာ တုန်လှုပ်မှုကို သိသိသာသာ တွေ့ရ၏။ ကျွန်မတိတ်တိတ်ကလေး ကျိတ်ပြုံးလိုက်မိပါသည်။
"အစ်မ ထောင်ကျတာ မကျတာဟာ ကျွန်မတို့ ဆေးရုံက မှတ်ချက်အပေါ်မှာ လုံးဝမူတည်နေတယ်" သူမမျက်လုံးမှာ ကျွန်မကို အားကိုးသလိုဟန် အနည်းအကျဉ်း တွေ့ရ၏။
"လူနာတွေ ဒုက္ခရောက်အောင်ကျွန်မတို့ ဘယ်တော့မှ မလုပ်ပါဘူး၊ ပျော်ပျော်ရွှင်ရွှင်အိမ်ပြန်သွားကြတာကိုကျွန်မတို့ မြင်ချင်တယ်၊ အဲဒီအတွက်ပဲ အစ်မတို့ကို စိတ်အခြေအနေ စစ်ဆေးပေးနေရတာပါ၊ အမှန်အတိုင်းဖွင့်ပြောပါ၊ကျွန်မတို့က လူနာရဲ့လျှို့ဝှက်ချက်တွေကို ကိုယ်သေတဲ့အထိ သိမ်းသွားမယ့် ဆရာဝန်တွေပါ"
သူမသည်အခန်းပတ်ဝန်းကျင်ကို မသင်္ကာသည့် မျက်လုံးများဖြင့် အကဲခတ်လိုက်ပြီးနောက် " ဒီနားမှာကျွန်မယောက်ျား ရှိနေသလား " ဟုမေး၏။

"မရှိဘူး၊ ဒီအခန်းရဲ့ အပြင်မှာ ဆရာမကြီးတစ်ယောက်လာစောင့်ပေးနေတယ်၊ လိုအပ်လို့ မခေါ်မချင်းလူနာရဲ့ အဖေလည်းမ၀င်ရဘူး၊ အမေလည်းမ၀င်ရဘူး၊ အစ်မယောက်ျားလည်း မ၀င်ရပါဘူး "
ထို့နောက်အမျိုးသမီးက သူ၏ အဖြစ်အပျက်ကို ကျွန်မအား အားလုံးဖွင့်ပြောပြပါသည်။
"ကျွန်မယောက်ျားနဲ့ ကျွန်မနဲ့က တစ်မြို့တည်းသားတွေ မဟုတ်ဘူး၊ သူက ကျွန်မတို့မြို့နဲ့မိုင်၁၀၀ လောက်ဝေးတဲ့ မြို့ကြီးတစ်မြို့ကပါ၊ မြို့ကြီးသားစရိုက် အပြည့်ရှိတယ်၊ ၀တ်ပုံစားပုံသေသပ်ကျနတယ်၊မျက်နှာထားကလည်း က္ကနြေ္ဒရရ၊ စကားပြောသိမ်မွေ့တယ်၊ ကြင်နာတတ်တယ်၊ ကျွန်မတို့ အိမ်နဲ့နှစ်အိမ်ကျော်လောက်ကဆီစက်တစ်ခုမှာ မန်နေဂျာပေါ့၊ ပညာတတ်ဘွဲ့ရ တစ်ယောက်ပဲ၊ ကျွန်မတို့အိမ်ကတော့ အလတ်စားဂျုံစက်ရုံကလေးပဲဆိုပါတော့လေ၊ အိမ်မှာတော့ မန်နေဂျာရယ်လို့မရှိပါဘူး၊ အဖေနဲ့ကျွန်မနဲ့ဂျုံစက်ကို တစ်လှည့်စီစောင့်ကြပ် အုပ်ချုပ်ကြတာပဲ၊ ကျွန်မက ဆယ်တန်းအောင်ရုံပဲ၊ ဒါပေမယ့်အဖေက စာရင်းအင်းပညာ ကျွန်မကို သင်ပေးထားလို့ ကျွန်မကောင်းကောင်း စာရင်းကိုင်တတ်ပါတယ်၊ကျွန်မနဲ့ သူနဲ့ မျက်မှန်းတန်းမိသွားကတည်းက တစ်ယောက်ကို တစ်ယောက် ချစ်ခင်သွားကြတယ်လို့ပြောရမလားမသိဘူး၊ ကျွန်မကတော့ တကယ်ကို သူ့ကို မြတ်မြတ်နိုးနိုးစုံမက် ခဲ့တာပါ။

"….ကျွန်မတို့ မြို့က ခပ်သေးသေးဆိုတော့ အဖြစ်အပျက် တစ်ခုဆိုရင် တစ်ရပ်ကွက်လုံး တစ်မြို့လုံးပျံ့နှံ့သိသွားတတ်ကြတယ်၊ ကျွန်မနဲ့ သူနဲ့ ဘာလိုလိုဖြစ်နေတာကို အဖေသိသွားတာပေါ့၊ အဖေက ကျွန်မကို သတိပေးသလိုလိုနဲ့တားမြစ်တယ်၊ တစ်မြို့တည်းသားချင်းမဟုတ်လို့ သူ့အကြောင်းကို ကျွန်မတို့ အမှန်အတိုင်းသိဖို့ခဲယဉ်းတယ်ပေါ့လေ၊ သူမြို့မှာ သူဟာ မယားကြီးတွေ ဘာတွေ ရှိနေနိုင်တယ်၊ ဘာပြသာနာတွေရှိခဲ့မယ်ဆိုတာကျွန်မ မသိနိုင်ဘူး….တဲ့၊ အဖေက တစ်မြို့တည်းသား အတွင်းသိ၊ အစင်းသိ လူငယ်တစ်ယောက်ယောက်ကိုပဲလက်ထပ်စေချင်တယ်၊ ကျွန်မကတော့ သူကို ယုံတယ်၊ သူ့မှာ ဘာအရှုပ်အထွေးမှ မရှိနိုင်ဘူး၊ သူဟာရိုးသားသိမ်မွေ့တယ်ဆိုတာ အလိုလိုသိနေတယ်။

"….ဒီလိုနဲ့ တစ်နေ့မှာတော့ အင်းလေ… တစ်ညမှာပေါ့ ၊ ကျွန်မတို့နှစ်ယောက် တော်တော်ရင်းနှီးတဲ့အခြေအနေကို ရောက်သွားရောဆိုပါတော့၊ နေဦး ….. အဲဒီညအကြောင်းကို ဒေါက်တာသိမှဖြစ်မယ်ထင်တယ်၊ နောက်ပိုင်း သူဆီစက်မှပဲ ညအိပ်လေ့ရှိတယ်လေ၊ ကျွှန်မနဲ့နီးနီးနေချင်လို့တဲ့၊ညတွေမှာ ရပ်ကွက်ထဲက လူတစ်ချို့နဲ့ သူလမ်းလျှောက်ပြီး ဂီတာတီးတတ်တယ်၊ အိုး ….  ဂစ်တာတီးလဲ တော်တော်ကို ကောင်းတဲ့လူပဲ ၊ သူ့ဂစ်တာသံကြားရင်ကျွန်မအခန်းပြတင်းကိုဖွင့်ပြီး နားထောင်နေမိတတ်တယ်၊ လသာဆောင်ဘက်တော့ မထွက်ရဲဘူး၊ ကျွန်မကိုသူတို့မြင်သွားမှာပေါ့၊ အဲဒီညကတော့ လကလဲအရမ်းကိုသာနေတယ်၊ လပြည့်ခါနီးည တစ်ညပဲ ၊ ကျွန်မတို့အိမ်ကခြံဝိုင်းအကျယ်ကြီး ဒေါက်တာရဲ့၊ ခြံဝိုင်းထောင့်အိမ်နဲ့ တော်တော်ဝေးတဲ့ နေရာမှာမြတ်လေးပန်းရုံကြီးရှိတယ် ၊ အိမ်မကြီးကနေလှမ်းကြည့်ရင် မမြင်ရဘူး၊ ကြားမှာ ဂျုံစက်အဆောက်အဦးက ကွယ်နေတယ်လေ။ …..

"….. အဲဒီညက ကျွန်မမြတ်လေးပန်းသွားခူးမိတယ်၊ ပန်းကို အိမ်ကလူတွေ သိပ်ဂရုစိုက်နိုင်တာမဟုတ်ပါဘူး၊ ကျွန်မလဲ ခါတိုင်းတော့ မခူးမိပါဘူး၊ အဲဒီညကတော့ နောက်နေ့မနက် ဘုရားပွဲလှည့်မှာမို့ ပန်းကုံးအကြီးကြီး ရအောင်သီမယ်ဆိုတဲ့ စိတ်နဲ့ ညနှစ်နာရီခွဲလောက်မှာ ပန်းထခူးမိတာ၊ခြံစည်းရိုးအပြင်ဘက်မှာ သူရောက်လာပြီး ကျွန်မနဲ့ စကားခဏပြောနေသေးတာ၊ နောက်တော့ ကျွန်မတားတဲ့ကြားကနေသူခြံထဲကို ဇွတ်ကျော်ဝင်လာတော့တာပါပဲ၊ မြတ်လေးရုံဘေးက ကုန်းမြင့်တလင်းပြင်ကလေးဟာ လရောင်နဲ့ဆိုတော့သိပ်လှနေတာပဲ၊အရောင်တောင်လက်နေတယ်၊ ပြာလဲ့လို့ပေါ့၊ ငှက်တွေလဲ အိပ်ချိန် လူခြေလဲတိတ်ချိန် တစ်လောကလုံးတိတိဆိတ်ပြာလဲ့နေတာပဲ၊ ကျွန်မဘ၀မှာ အဲဒီညကို ဘယ်တော့မှ မမေ့နိုင်တော့ပါဘူး၊ သူ့ကိုချစ်တဲ့စိတ်၊ သူ့ကိုကြောက်တဲ့စိတ်၊ သူကိုပဲရှက်တဲ့စိတ်၊ အို ….  တော်တော် အံသြစရာကောင်းတဲ့ ညပါပဲ၊ နောက်တော့ ရက်ခြားဆိုသလိုကျွန်မပန်းခူးထွက်ရတော့တာပေါ့၊ ချစ်သူ့ မျက်နှာညှိုးမှာကို စိုးရိမ်ရတာလောက် လှိုက်လှဲကြေကွဲတဲ့ခံစားချက်မျိုးရှိမှာတောင် မဟုတ်ဘူးလို့ထင်ခဲ့မိတယ်။

"….  နောက်ဆုံးတော့ ကျွန်မတို့ အကြောင်းကို အမေသိရောဆိုပါတော့၊အမေက ကျွန်မကို ဆူလိုက်တာ၊ သူ မယူဘဲ ပစ်သွားမှာကို စိုးရိမ်နေမိတဲ့ ကျွန်မတို့ မိသားစုဟာသူက မိသားဖသားပီပီ တောင်းရမ်းယူတော့၊ တော်တော်စိတ်အေးသွားရပါတယ်၊ ကျွန်မတို့ နှစ်ယောက်မင်္ဂလာပွဲကို ဘယ်မယားကြီးမှလဲ လာမဖျက်ပါဘူး၊ သူ့မှာလဲ ကျွန်မကလွဲလို့ ဘာအနှောင်အဖွဲ့မှမရှိပါဘူး၊ ကျွန်မတို့ နှစ်ယောက် နေဖို့အခန်းကို သူကိုယ်တိုင် ရွေးပေးတာပါ၊ ကျွန်မတို့အိမ်ကြီးက ပျဉ်ထောင်အိမ်အမြင့်ကြီး ဒေါက်တာရဲ့၊ အခန်းတွေအခန်းတွေမှ အများကြီးပဲ၊တစ်ခန်းတစ်ခန်းကလည်းအကျယ်ကြီးပါပဲ၊ လသာဆောင်နဲ့ကပ်လျက် ဘေးအစွန်ဆုံးအခန်းကို သူရွေးလိုက်တယ်၊ အဲဒီ အခန်းပြတင်းပေါက်နှစ်ခုကလဲအမြင့်ကြီးတွေ၊ နဂိုကတော့ ပြတင်းအမိုးခုံးတစ်ခုပဲ မှန်ပါတာ၊ တံခါးရွက်တွေက သစ်သားတွေ၊အဲဒါကို ကျွန်မယောက်ျားက ပြင်ယူလိုက်တယ်၊ တံခါးရွက်တွေအားလုံးမှန်တပ်လိုက်တယ်၊ လသာတဲ့ညတွေမှာဆို လရောင်က တံခါးရွက်မှန်ချပ်တွေကိုဖြတ်ပြီး အခန်းထဲကို ဖြာကျနေတတ်တယ်၊ အခန်းနံရံ၊စားပွဲ၊ ခုတင်၊ မွေ့ရာ အားလုံးဟာ လရောင်တစ်ဝတ်တစ်ပျက်နဲ့ဆိုတော့ အပြာလဲ့လဲ့ကလေးပေါ့၊သူက ကျွန်မကိုခဏခဏ ပြောလေ့ရှိတယ်၊ ဝေ့မျက်နှာဟာ လရောင်အောက်မှာ သိပ်လှတာပဲတဲ့၊ ဝေ့ခန္ဓာကိုယ် နွဲ့နွဲ့ကလေးကလဲ လရောင်က အလင်းတင်လိုက်တဲ့အခါ ပိုမိုပီပြင်သွားတယ်တဲ့၊ အလင်းအမှောင်ကိုအချိုးညီညီရောပြီး ပြထားတဲ့ ပန်းပုရုပ်လိုပဲတဲ့ ဒေါက်တာရယ် သူပြောတတ်တဲ့ စကားလုံးလေးတွေကသိပ်နားထောင်လို့ ကောင်းတာ၊ ပညာတွေလဲ တော်တော်တတ်ပြီး စာတွေဘာတွေလဲ တော်တော်ဖတ်ခဲ့တဲ့ပုံပဲ၊ကျွန်မမှာတော့ သူ့ကို ချစ်တာ
အပြင် ကျေနပ်တာ ၊ လေးစားတာ ဂုဏ်ယူတာတွေ အမျိုးမျိုးစုပေါင်းပြီးသူ့တစ်ယောက်သာ တစ်ကမ္ဘာလို့ ထင်ခဲ့ပါတယ်။

"….. ကျွန်မမှာ ကံဆိုးချင်တော့ သားသမီးလုံးဝ မရခဲ့ဘူး ဒေါက်တာရယ်၊ အိမ်ထောင်သက် ငါးနှစ်အရမှာအဖေဆုံးသွားတယ်၊ ဂျုံစက်ကို ကျွန်မယောက်ျားပဲ ဦးစီးခဲ့တာပဲ၊ သူက စီးပွားရေးအမြင်လဲရှိပါတယ်၊ လုပ်ငန်းက သူ့လက်ထက်မှာ ပိုပြီးကျယ်ပြန့်လာတယ်၊ သူ့အနေအထိုင် အပြုအမူ၊ အလုပ်သမကောင်မလေးတွေ အပေါ်ဆက်ဆံရေး …. အားလုံးဟာ ပုံမှန်ပဲ၊ ဘာမှ ချို့ယွင်းချက်မရှိဘူး၊ ဒါပေမယ့်ကျွန်မမှာ သံသယတစ်ခု ၀င်လာခဲ့ရတယ်၊ ဘေးစကားဆိုတာကို ကျွန်မနဂိုကတည်းက ယုံခဲ့တာ မဟုတ်တော့သတင်းကြားကြားချင်း စိတ်ဆိုးဒေါသထွက်ဖို့ကို သတိမရဘဲ အံသြတုန်လှုပ်သွားခဲ့တယ်၊ သူနဲ့အလုပ်သမကလေး တစ်ယောက် တိတ်တိတ်ပုန်း ညားနေကြတယ်ဆိုတဲ့သတင်းပေါ့၊ ကျွန်မတို့ရပ်ကွက်အစွန်က ချောင်းစပ်မှာ သဲသောင်ပြင်အပြန့် ကလေးတစ်ခုရှိတယ်၊ ကြက်သွန်ခင်းတွေနဲ့ ချောင်းရေစပ်စပ်ကလေးနဲ့ညတွေမှာ ဆည်းဆာနေရောင်အောက်မှာတော့ တော်တော် သာယာတဲ့နေရာကလေးပါ၊ အဲဒီချောင်းစပ်ကလေးမှာကျွန်မယောက်ျားနဲ့ သူ့ကောင်မလေးနဲ့ ညညမှာ ချိန်းတွေ့ကြတယ်ဆိုတဲ့သတင်းက ကျွန်မနားကိုရောက်လာတယ်၊ သူ့ကိုရန်တွေ့ပြီး စွပ်စွဲမေးမြန်းတော့ သူကရယ်လိုက်တာ၊ ကိုယ်ယောက်ျားကိုယ်ဒီလောက်မှ အကဲမခတ်တတ်ဘူးလား၊ ကိုယ့်ယောက်ျား ဒီလိုလူစားမျိုး ဟုတ်မဟုတ် ဝေ အသိဆုံးဖြစ်မှာပေါ့တဲ့၊ သူပြောတော့ ကျွန်မ သူ့ကိုတောင်အားနာသွားရတယ်၊ တကယ်လဲ သူဟာ အိမ်ကိုညကိုးနာရီအရောက်အမြဲပြန်တဲ့လူ၊ ကျွန်မထက်လဲ အရင်အိပ်ပျော်တဲ့လူ၊ မနာလိုတဲ့လူတွေက တမင်နာမည်ဖျက်တာလို့ကျွန်မယူဆရတော့တာပေါ့လေ၊ ဒါပေမယ့် ကျွန်မသတိရှိပါတယ်၊ ကျွန်မညညတစ်ရေးနိုးရင် သူ့ကိုစမ်းသပ်ကြည့်ရတယ်၊ ကျွန်မဘေးနားမှာ သူရှိနေတဲ့အခါ ကျွန်မဘာသာမလုံမလဲ ပြုံးမိပြီး ပြန်အိပ်ပျော်သွားတာပေါ့။

"…. ဒါပေမယ့် တစ်ညမှာတော့ သံသယက တော်တော်ခိုင်လုံသွားရတယ် ဒေါက်တာရဲ့၊ ကျွန်မတစ်ရေးနိုးလို့သူ့ကို စမ်းကြည့်တော့ သူ့ကို မတွေ့ဘူး၊ အိမ်သာသွားတက်နေတာဖြစ်နေမလား ဆိုပြီး ကျွန်မခဏစောင့်နေတယ်၊သူမလာဘူး၊ နာရီပြန်နှစ်ချက်လောက်ရှိပြီ၊ ဒါနဲ့ ကျွန်မတစ်အိမ်လုံး တစ်ခန်းဝင်တစ်ခန်းထွက်လိုက်ရှာတယ်၊ သူ့ကို မတွေ့ဘူး၊ အောက်ထပ် အခန်းတွေလိုက်ရှာ မီးတွေဖွင့်တော့ အမေနိုးသွားတယ်၊အမေမေးတော့ ကျွန်မ အမှန်တိုင်းပဲ ပြောလိုက်တယ်၊ အမေကပြန်အိပ်ခိုင်းတယ်၊ဘယ့်နဲ့လုပ်ပြီးကျွန်မအိပ်နိုင်ပါ့မလဲ…မဟုတ်ဘူးလား၊ လကလဲ လပြည့်လဆိုတော့ တစ်လောကလုံး လရောင်နဲ့ လင်းနေတာ၊ကျွန်မကြောက်စိတ်လဲ မရှိဘူး၊ ခြံဝန်းတစ်လျှောက် သူ့ကို လိုက်ရှာမိတယ်၊ ဘာဖြစ်လို့မှန်းမသိဘူး၊ သူခြံဝန်းထဲမှာ ရှိမနေနိုင်ဘူးလို့တော့ ထင်သား၊ ဒါနဲ့ ကျွန်မလမ်းဘက်ထွက်ရှာမယ်လုပ်တော့အမေကဆွဲထားတယ်၊ ကျွန်မကခေါင်းမာတယ်လေ၊ ဒီည ဒီအကြောင်းကိုသိရမှာဖြစ်မယ်၊ အမေ မလိုက်ချင်နေကျွန်မသွားရှာမယ် ဆိုတော့မှ အမေက ကျွန်မနဲ့လိုက်လာတယ်၊ ကျွန်မတို့လမ်းတစ်လျှောက်မှာသက်ရှိဆိုလို့ ခွေးတစ်ကောင် ကြောင်တစ်မြီးမှ မတွေ့ရဘူး၊ ဒါပေမဲ့ ကျွန်မမကြောက်ဘူး၊စိုးရိမ်ပူပန်စိတ်နဲ့ နာကြည်းတဲ့ ဒေါသပေါင်းစပ်ပြီး ကျွန်မတစ်ကိုယ်လုံးကို လောင်နေတာလေ၊နောက်တော့ သိပ်မကြာခင်မှာပဲ ချောင်းစပ်ကို ကျွန်မတို့ ရောက်သွားရော၊ လရောင်ဖွေးနေတဲ့သောင်ပြင်အစပ်ဆီကို လှမ်းကြည့်လိုက်တဲ့အခါ ကျွန်မတစ်ကိုယ်လုံးပျော့ခွေသွားတော့တာပါပဲ၊

"…. လရောင်အောက်မှာ လူနှစ်ယောက်မှန်းသိသာတဲ့ အရိပ်သဏ္ဍာန်နှစ်ခု တစ်ခုနဲ့တစ်ခု ပူးကပ်နေတယ်၊တစ်ခုကမြင့်မြင့်၊ တစ်ခုက နိမ့်နိမ့်၊ သူတို့ လှုပ်ရှားမှုတွေကို မသဲမကွဲမြင်နေရပေမယ့်ဘယ်သူတွေလဲဆိုတာ ကျွန်မ မသိဘူး၊ ဒါပေမယ့် ရှေ့လဲမတိုးရဲဘူး၊ ရှေ့တိုးလို့ တစ်ခုခုကိုအတိအကျ လက်ခံသွားရမှာကိုလဲ ကျွန်မကြောက်နေတယ်၊ တစ်ယောက်က၀တ်ထားတဲ့ အရောင်ဟာ စိမ်းမလိုပြာမလိုလို၊ကျွန်မယောက်ျားကလည်း အစိမ်းနုရောင် အင်္ကျီဝတ်ထားတယ်ဆိုတာ ကျွန်မသတိရသွားတယ်၊ ကျွန်မမှာကြည့်ရင်းကြည့်ရင်း တစ်ကိုယ်လုံးအေးစက်ပြီး မျက်ရည်တွေ ကျလာတော့တာပဲ၊ အမေက ကျွန်မအရိပ်အကဲမဟန်မှန်းသိလို့ ဖက်တွဲပြီး အိမ်ပြန်ခေါ်လာတယ်။ "
"…. သမီး ပြန်အိပ်၊ အဲဒီကို အမေတစ်ခေါက်သွားကြည့်ပေးမယ်၊ သမီးဦးကြီးကို နှိုးပြီး အမေသွားကြည့်မယ်တဲ့။"
"…. ဦးကြီးဆိုတာ တကယ်တော့ ကျွန်မတို့နဲ့ ဘာမှ မတော်ပါဘူး၊ ခြံစောင့်သဘောမျိုးပေါ့၊ဂျုံစက်ထဲမှာ စောင့်အိပ်တဲ့ ဂိုဒေါင်စောင့်ဆိုလဲ ဟုတ်တယ်၊ တကယ်လဲ အဲဒီညက အမေနဲ့ ဦးကြီးနဲ့သွားကြတယ်၊ အမေတို့ပြန်လာတော့ အမေ့မျက်နှာကို ကျွန်မချက်ချင်းမကြည့်ရဲဘူး၊ အမေက ပြုံးရယ်ပြီးကျွန်မကိုနှစ်သိမ့်တယ်။ …. မိဝေနှယ် အစိုးရိမ်လွန်ရန်ကော၊ အဲဒီကောင်လေးက ဟိုဘက်ရပ်ကွက်ကမြင်းလှည်းသမားကလေးပါဟယ်၊ ငါတို့မှာ သူတို့မမြင်အောင် ပုန်းလျှိုးကွယ်လျှိုး ပြန်ပြေးခဲ့ရတယ်၊ညည်းယောက်ျား ခြံဝန်းတစ်နေရာမှာ ရှိချင်ရှိမှာပေါ့ ၊ ဒါမှမဟုတ် လသာသာနဲ့ လမ်းထွက်လျှောက်တာဖြစ်မှာပေါ့"

"အမေ့အပြုံးက တစ်မျိုးပဲလို့ ထင်ပေမယ့် ကျွန်မယုံလိုက်တယ်၊ အဲဒီညက သူပြန်မလာမချင်း ဧည့်ခန်းထဲမှာထိုင်စောင့်နေခဲ့တယ်၊ သိပ်မကြာခင်မှာ သူပြန်လာရော၊ သူ့ဟန်အမူအရာက ကျွန်မယောက်ျားနဲ့လဲမတူဘူး လေးလေးကန်ကန်နဲ့၊ ဘေးဘီကိုလည်း မကြည့်ဘူး၊ တံခါးပေါက်တည့်တည့်ကို ၀င်လာတယ်၊ဧည့်ခန်းမှာမီးလင်းနေတာ ကျွန်မထိုင်နေတာ အားလုံးကို သူဂရုမစိုက်ဘူး၊ သူ့မျက်နှာကလဲ မျက်နှာသေနဲ့၊ကျွန်မကို ကျော်ပြီး လှေကားဆီလျှောက်သွားတော့ ကျွန်မငိုချင်လိုက်တာ၊ ဒါနဲ့ သူ့ကိုပြေးဖက်တော့မှသူကဗြုန်းဆို လှည့်ကြည့်တယ် ။

ဒုတိယပိုင်းကို ဒီလင့်မှာဖတ်နိုင်တယ်ခင်ဗျာ..... http://newsandlibrary.blogspot.com/2013/10/blog-post_5027.html

Copy From Ju Facebook Page