ဆံပင်ညှပ်ဆိုင်ထဲသို့ ၀င်လာသောသူကို ဆံသဆရာက "ဆံပင်ညှပ်မလို့လား" ဟုမေးသည်။ ထိုသူက ခေါင်ညိတ်ပြပြီး ဆုံလည်ကုလားထိုင်ပေါ် ထိုင်သည်။ ဆံသဆရာက ယနေ့ထုတ် မြန်မာ့အလင်း သတင်းစာကို ယူပေးသည်။ ထို့နောက် အ၀တ်ဖြူစကို ကိုယ်ပေါ်မှာ လွှမ်းခြုံပေးသည်။
"ဘယ်လိုပုံစံညှပ်မလဲ"
"ခပ်ပါးပါး သပ်သပ်ရပ်ရပ်ဖြစ်အောင်လုပ်ဗျာ၊ နက်ဖြန် အင်တာဗျူးဝင်စရာရှိလို့"
ဆံသဆရာက ခေါင်းတစ်ချက်ဆတ်လိုက်သည်။ ဆံပင်ကို ဘီးဖြင့်ဖွပြီး ကတ်ကြေးဖြင့် စ၍ညှပ်သည်။ ညှပ်နေရင်းက လေထဲမှာ ကတ်ကြေးကို အလွတ်ကစားနေသည့် အသံတစ်ချက်ချက်သည် စည်းချက်ညီညီ ထွက်ပေါ်နေ၏။
ပြီးလျှင် ခွကတ်ကြေးဖြင့် ပါးသွားအောင် ညှပ်ပြန်သည်။ စွန်းထွက်နေသော ဆံပင်များ၊ ကော့လန်ကွေးကောက်နေသော ဆံစများကို ကတ်ကြေးထိပ်ချွန်ဖြင့် သပ်ရပ်ညီညာသွားအောင်တိသည်။
"ဒီအနေတော်ပြီလား" ဟု ဆံသဆရာက မေးသည်။ ရှေ့နောက်နှစ်ဖက်ညှပ်၍ တပ်ဆင်ထားသော မှန်များကြောင့် ရှေ့မှန်ထဲမှာပင် နောက်ဘက်မြင်ကွင်းပါ မြင်နေရ၏။
"ရပါပြီ"
ဆံသဆရာသည် ရေဆွတ်ထားသော ၀က်မှင်ဘီးကလေးဖြင့် ကုပ်သားတစ်လျှောက်၊ နားသယ်စပ်တစ်လျှောက် လိုက်သုတ်ပေးသည်။
သင်ဓုန်းဓါးကို သားရေပြားပေါ်မှာ တရွှီရွှီမြည်အောင် ပွတ်သွေးသည်။ ပြီးတော့ ဒေါက်တိပေးသည်။ ဓါးဖြင့်ရိတ်ထားသော နေရာများကို ပေါင်ဒါတို့သည်။ မျက်နှာသုတ်ပ၀ါအသေးဖြင့် ဆံပင်များကို ပွတ်ခါပေးသည်။ ဆံပင်ကို သပ်ရပ်အောင် ဖြီးသင်ပေးသည်။
ထို့နောက် သူညှပ်ပေးထားသောခေါင်းကို ရှေ့နောက် ၀ဲယာတို့မှရှုထောင့်အမျိုးမျိုးပြောင်းလျက် ကြည့်သည်။ သူ့ပုံစံမှာ သူကိုယ်တိုင်စိတ်ကြိုက် အနုစိတ်ထုလုပ်ထားသော ပန်းပုရုပ်တစ်ခုကို တစ်စိမ့်စိမ့်အရသာခံ၍ ကြည့်နေသလိုမျိုးပင်။
(အချစ်ရေ ... ကိုယ်လည်းမင်းကို အရ်ိပ်တကြည့်ကြည့်နဲ့နေခဲ့ပါတယ်နော်)
* * *
ရွှေဂုန်ရုပ်ရှင်ရုံ၏ ပန်းဆိုးတန်းဘက် ဆင်ဝင်အောက်တွင် ၀က်သားတုတ်ထိုးသည်၊ ကြာဇံသုတ်သည်၊ ဆေးလိပ်သည်တို့ကြားတွင် ခွေးခြေကလေးနှင့် လူတစ်ယောက် ထိုင်နေသည်။ ထိုသူကား နားဖာကလော်ဆရာ ဖြစ်၏။
ခပ်၀၀လူကြီးတစ်ယောက် ရောက်လာပြီး ခွေးခြေမှာ ၀င်ထိုင်သည်။ နားဖာကလော်ဆရာက သံဘူးကလေးထဲမှ ပစ္စည်းကိရိယာများကို ထုတ်သည်။ လူကြီး၏ နားထဲသို့ အုန်းဆီအနည်းငယ်ထည့်ပေးပြီးနောက် လုပ်ငန်းစလေသည်။ လူကြီးက ခေါင်းကလေးကိုစောင်းပြီး မျက်လုံးမှေးထားသည်။
နားဖာကလော်ဆရာသည် ကွန်ပျူတာတစ်ခုကို ပြုပြင်နေသူ တစ်ယောက်၏ မျက်နှာထားဖြင့် နားဖာကလော်ကိရိယာများကို သတိကြီးစွာ ကိုင်တွယ်ဆောင်ရွက်နေလေသည်။
(အချစ်ရေ ... ကိုယ်လည်း မင်းကို အရမ်းဂရုစိုက်ခဲ့ပါတယ်နော်)
* * *
လမ်းသုံးဆယ် မြေကွက်လပ်တစ်ခုတွင် လူတစ်ယောက်သည် ကုလားထိုင်တစ်လုံးပေါ်မှာထိုင်လျက် ခြေထောက်တစ်ဖက်ကို ခုံပုကလေးပေါ် ဟန်ပါပါတင်ထားသည်။ အခြားလူတစ်ယောက်က ထိုသူ၏ ခြေသည်းများကို လှီးပေးနေသည်။
"ဖြည်းဖြည်းလုပ်နော်၊ အသားကို လှီးမိဦးမယ်"
ထိုသူက ပြောသောအခါ ခြေသည်းလှီးဆရာက ...
"စိတ်ချပါ၊ ကျွန်တော် ဒီအလုပ်လုပ်နေတာ ငါးနှစ်ကျော်ပါပြီ။ ကျွန်တော့်လက်က တစ်ဆံခြည်မျှင်တောင် မလွဲပါဘူး" ဟု ပြန်ပြောသည်။ ခုံပုပေါ်တင်ထားသော ခြေထောက်သည် ခြေဆီတွေထွက်ပြီး ဖုန်တွေလည်းပေနေသဖြင့် မည်းညစ်ညစ်ဖြစ်နေ၏။
ခြေဖမိုးပေါ်ရှိ သည်းကြိုးရာတစ်လျှောက်မှာလည်း ချေးကြောင်းရာတွေ ထင်နေသည်။ သို့ရာတွင် ခြေသည်းလှီးဆရာကတော့ ထိုခြေထောက်ကြီးကို မိန်မလှလေးတစ်ယောက်၏ မျက်နှာကို အလှပြင်ပေးနေသကဲ့သို့ တယုတယ ကိုင်တွယ်လှုပ်ရှားနေသည်။
(အချစ်ရေ ... ကိုယ်လည်း မင်းကို သိပ်ကြင်နာခဲ့ပါတယ်နော်)
* * *
မဟာဗန္ဓုလပန်းခြံလမ်းထိပ်တွင် အိန္ဒိယအမျိုးသား ဖိနပ်ချုပ်ဆရာကလေးတစ်ဦး ရှိလေသည်။ သူသည် ခါလီးယားဇာတ်ကားထဲမှ ဇာတ်ဝင်တေးသီချင်းတစ်ပုဒ်ကို ခပ်တိုးတိုးညည်းလျက် မိန်းမစီးဖိနပ် အဖြူကလေးတစ်ဖက်ကို ပြုပြင်နေ၏။
ပထမဦးစွာ ခေါင်မှပြုတ်ထွက်နေသော သည်းကြိုးကို အပေါက်ထဲပြန်ထည့်သည်။ နိုင်လွန်ကြိုးဖြင့်ချုပ်သည်။ အပ်ချက်တစ်ချက်က လွဲချော်ပြီး ခြေနင်းအဖြူပေါ်တွင် အခြစ်ရာကလေး နည်းနည်းထင်သွား၏။ သူသည် "ကျွတ်ကျွတ်" ဆို စုတ်သပ်လိုက်ပြီး ဒဏ်ရာတစ်ခုကဲ့သို့ အသာအယာပွတ်သပ်လိုက်သည်။
ခေါင်ချုပ်ပြီးသောအခါ ဖိနပ်ဦးပိုင်းက ဖတ်လတ်လန်နေသော "ဆိုး" ကို ကော်သုတ်သည်။ ကော်သွေ့သွားအောင် တဖူးဖူးမှုတ်သည်။
ထိုအခိုက်တွင် သီချင်းအညည်း ခဏရပ်၏။ သူ့ခေါင်းကတော့ စည်းလိုက်သလို တလှုပ်လှုပ်ဖြစ်နေတုန်း။ ကော်အနေတော်ဖြစ်သောအခါ ဖိကပ်ပြီး တူနှင့် ခပ်ဖွဖွထုသည်။ ထို့နောက် သံတုံးတစ်ခုဖြင့် ဖိထားလိုက်၏။
အတန်ကြာသောအခါ ဖိနပ်သည်းကြိုးကြားကို လက်ညှိုးနှင့် လက်ခလယ် လျှိုထည့်ပြီး မျက်စိနှင့် ရေပြင်ညီထား၍ ကြည့်သည်။ သူသည် ကျေနပ်စွာ ပြုံးလိုက်၏။ ဖိနပ်ကလေးကို ကိုင်တွယ်ကြည့်ရှုပုံမှာ ဘိုးဘွားလက်ထက်က ရရှိခဲ့သော အမွေပစ္စည်းတစ်ခုအတွက် နှစ်သိမ့်ဂုဏ်ယူနေသလိုမျိုး။
(အချစ်ရေ ... ကိုယ်လည်း မင်းကို အမြတ်တနိုး တန်ဖိုးထားခဲ့ပါတယ်နော်)
* * *
"ဖရဲသီးစိတ် ချိုချိုလေး"
မိန်းကလေးသည် ကြွေရည်သုတ် ဗန်းကလေးကို ခေါင်းပေါ်ရွက်၍ တစာစာအော်ရင်း လျှောက်သွားသည်။ အတော်ဝေးဝေးလျှောက်ပြီးမှသာ တစ်စိတ်နှစ်စိတ် ရောင်းရ၏။
နီရဲသော ဖရဲသီးစိတ်များပေါ်တွင် ရေဆွတ်ထားသော အ၀တ်စကိုအုပ်ထားသဖြင့် အပူဒဏ်ကိုမခံရဘဲ လန်းဆန်းနေသည်။ သူ့မျက်နှာကတော့ နေရောင်ကို တိုက်ရိုက်အထိခံရ၏။
မျက်နှာပေါ်မှာ ချွေးစီးကြောင်းအသွယ်သွယ်။ အိမ်ကထွက်ခါနီးလိမ်းလာခဲ့သော သနပ်ခါးမှာ နားရွက်ကြားမှာ သဲလွန်စလောက်သာ ကျန်တော့သည်။
သူသည် လမ်းဘေးအုတ်ခုံတစ်ခုမှာ ခဏထိုင်နားသည်။ ဗန်းထဲမှာရှိသော အကြွေစများကို ရေတွက်ကြည့်သည်။ ပြီးတော့ ခါးကြားရှိဘော်လီအကျီအိတ်ထဲမှ ငွေစက္ကူအလိပ်လိုက်ကလေးကိုထုတ်သည်။ ငါးကျပ်တန် တစ်ရွက်နှင့် တစ်ကျပ်တန်များ။ ငွေစက္ကူကလေးများသည် ဟောင်းမြည့် နွမ်းနယ်နေသည်။ သို့ရာတွင် ထိုငွေစက္ကူများတွင် ရိုးသားမှုချွေးစက်များ စိမ့်ဝင်နေလေ၏။
(အချစ်ရေ ... ကိုယ်ဟာဆင်းရဲပေမယ့် မင်းကို ရိုးသားသန့်ရှင်းတဲ့ မေတ္တာနဲ့ ချစ်ခဲ့ပါတယ်နော်)
* * *
ခရီးသည်နှင့် ကုန်ပစ္စည်းများ တင်ပြီးနောက် မြင်းလှည်းဆရာသည် လှည်းပေါ်တက်လိုက်သည်။ ဇက်ကြိုးသားရေပြားဖြင့် မြင်း၏ တင်ပါးကို အသာပုတ်လိုက်ပြီး ...
"သမီးရေ ၊ ရုန်းလိုက်စမ်းပါဦးကွယ်"
မြင်းမလေးက တုတ်တုတ်မျှမလှုပ်။
"ဟော ... လုပ်ပြန်ပြီ"
ဇက်ကြိုးကို ခတ်ဆတ်ဆတ် တစ်ချက်ဆွဲသည်။ မြင်းမသည် ခေါင်းကိုသာမော့သည်။ ခြေထောက်တွေက ကြွမလာချေ။
"သြော် ... ဒီမြင်းဟာ ပေကတ်ကတ်နဲ့"
ကြာပွတ်လက်ကိုင်တုတ်အဖျားနှင့် မြင်းတင်ပါးကို တစ်ချက်နှစ်ချက်တို့သည်။ မြင်းက နှစ်လှမ်းသုံးလှမ်း လှမ်းပြီး တောင့်ခနဲရပ်လိုက်ပြန်၏။
မြင်းလှည်းဆရာ ဒေါသဖြစ်လေပြီ။
"တောက် ... ကမြင်းမ ဗွေဆိုးဖောက်လာပြန်ပြီ။ ကောင်းကောင်းပြောလို့မရဘူး။ အသားနာမှ သခင့်စကား နားထောင်မယ်၊ ဟုတ်စ ... ကိုင်း"
မြင်းလှည်းဆရာက ကြာပွတ်ကိုဝင့်၍ ရွှမ်းခနဲ ရိုက်လိုက်သည်။ မြင်းမသည် တစ်ချက် တွန့်ခနဲ ဖြစ်သွားပြီးနောက် ကဆုန်ပေါက် ပြေးလေတော့သည်။
(လွန်လေပြီးသော အချစ်ရေ ၊ မင်း နဲ့ ငါချစ်နေခဲ့စဉ်က ကြာပွတ်ကိုမသုံးခဲ့မိတာ ငါ့ရဲ့မဟာအမှားပေါ့)
မင်းလူ
-----------------------
(ကလျာ ၊ ဧပြီ ၊ ၁၉၈၇)
No comments:
Post a Comment