အဆိုပါဆေးခန်းတွင် ဆေးခန်းဖွင့်လုပ်ကိုင်ခွင့်လိုင်စင်မရှိခြင်း၊ စည်ပင်လုပ်ငန်း လိုင်စင်မရှိခြင်းနှင့် ဆေးကုသခွင့်မှတ်ပုံတင်မရှိဘဲ တရုတ်နိုင်ငံသား GUOLEI က ဆေးကုသပေးနေခြင်းကို စစ်ဆေးတွေ့ရှိခဲ့သည်။ ထို့ကြောင့် ဆေးခန်းပိုင်ရှင်ဖြစ်သူ ဒေါက်တာအောင်ဇေယျာမင်း (ခ) ဦးစောညွန့်မြိုင်နှင့် တရုတ်နိုင်ငံသား GUOLEI တို့နှစ်ဦးအား အရေးယူပေးရန် တိုင်တန်းခဲ့သည်။
““သူတို့ကို အမှုစစ်က စစ် ဆေးနေတုန်းပဲ။ လောလောဆယ်တော့ ဆေးဥပဒေပုဒ်မနဲ့ပဲ အရေးယူထားတယ်”” ဟု လမ်းမတော်မြို့မ ရဲစခန်းမှ တာဝန်ကျရဲအရာရှိတစ်ဦးက ပြောသည်။ ထို့ကြောင့် လမ်းမတော်မြို့မ ရဲစခန်းက ပုဂ္ဂလိကကျန်းမာရေး လုပ်ငန်းဆိုင်ရာ ဥပဒေပုဒ်မ-၃၂ ဖြင့် အရေးယူဆောင်ရွက်လျက်ရှိသည်။ ယင်းကဲ့သို့ တရုတ်နိုင်ငံသားများက တရားဝင်ဆေးကုသခွင့် လိုင်စင်မရှိဘဲ မြန်မာနိုင်ငံသား ဆရာဝန်များကို အမည်ခံခိုင်းကာ ကျယ်ကျယ်ပြန့်ပြန့်ကြေညာပြီး ငွေကြေးမတန်တဆတောင်းခံနေသည့် အပျောက်ကုဆေးခန်းများအဖြစ် နာမည်ကြီးလျက်ရှိသည်။
အဆိုပါဆေးခန်းများသည် ရန်ကုန်မြို့တွင် လမ်းမတော်၊ လသာ၊ ဗိုလ်တထောင်၊ စမ်းချောင်းနှင့် ကမာရွတ်မြို့နယ်တို့၌ မြန်မာအမည်များဖြင့် ဖွင့်လှစ်ထားကြကြောင်း သတင်းရရှိသည်။ယခုစတင်အရေးယူမှုတွင်လူနာများက လိမ်လည်ကုသပေးနေကြောင်း မီဒီယာများသို့ ပြောကြားသည့် နာမည်ကြီးဆေးခန်းများ မပါဝင်သေးသည်ကိုတွေ့ရသည်။ ယင်းကဲ့သို့ မြန်မာနိုင်ငံသား အမည်ခံ တရုတ်ဆေးခန်းများကို တိုင်းဒေသကြီးအစိုးရအဖွဲ့က စစ်ဆေးအရေးယူသွားမည်ဖြစ်ကြောင်း ၂၀၁၃ နှစ်လယ်က ပြောကြားထားသည်။ ““ရန်ကုန်တိုင်းအတွင်း တရုတ်ဆေးခန်းများနဲ့ တရုတ်ဆေးဆရာများအား ခွင့်ပြုချက်လုံးဝမရှိက ဆေးကုသခွင့်မပေးပါ။ ယနေ့အထိ ခွင့်ပြုထားသော တရုတ်ဆေးခန်းနှင့် တရုတ်ဆရာဝန်များ မရှိသေးပါ”” ဟု ရန်ကုန် တိုင်းဒေသကြီးအစိုးရအဖွဲ့ ကျန်းမာရေးနှင့် လူမှုရေးဝန်ကြီး ဒေါက်တာမြင့်သိန်းက ဒီဇင်ဘာ ၁၂ ရက်တွင် ပြောကြားသည်။
Author: သန်းဌေး
7Day Daily
No comments:
Post a Comment