ရွှေရောင်တောက်ပဆဲ မြန်မာသံစဉ် သီချင်းများနှင့် ‘ရွှေဂန္တ၀င် ဂီတပွဲတော်’

မြန်မာသံစဉ် ဂီတဖျော်ဖြေပွဲ တစ်ခုကို ၂၀၁၂ ခုနှစ် မတ်လ ၁၈ ရက်နေ့ကတော့ မြန်မာသံ နှစ်ခြိုက်သူများ အတွက် Bo Bo Entertainment က ‘ရွှေဂန္ထ၀င် ဂီတပွဲတော်’အဖြစ် ကန်တော်ကြီး မျှော်စင်ကျွန်းမှာ ကျင်းပခဲ့ပါတယ်။ ရွှေဂန္ထ၀င်ဂီတပွဲမှာ အလင်္ကာဝတ်ရည် မြန်မာမှုတေးဂီတအဖွဲ့နဲ့ အတူ ရွှေတံဆိပ်ဆုရှင် သီရီမောင်မောင် ဆိုင်းအဖွဲ့သားတွေကလည်း ၀ိုင်းဝန်း တီးခတ်ပေးခဲ့ကြပါတယ်။ အစီအစဉ် တင်ဆက်သူတွေအဖြစ် ကုသိုလ်နဲ့ အရိုင်းတို့က ပါဝင်ခဲ့ပါတယ်။ ဖျော်ဖြေပွဲကို လာရောက်သူ အများစုက အသက်ကြီးပိုင်းတွေ ဖြစ်ပေမယ့် လူလတ်ပိုင်းနဲ့ လူငယ်ပိုင်းတွေလည်း တော်တော်များများ လာကြည့်တာ တွေ့ရသလို လူအုပ်ကြားထဲက နိုင်ငံခြားသား နှစ်ယောက် သုံးယောက်လောက်ကိုလည်း တွေ့လိုက်ရပါသေးတယ်။ ပွဲစတင်စဉ်မှာ သီရီမောင်မောင် ဆိုင်းအဖွဲ့ရဲ့ ပဏာမ ဧည့်ခံတီးလုံးများ ကို နားဆင်ကြရပြီးနောက် ‘တစ်ခိုင်လုံးရွှေ’ တေးသွားများနဲ့အတူ အလင်္ကာဝတ်ရည်အကအဖွဲ့ရဲ့ မြန်မာမှုအက များကို ဆက်လက် တင်ဆက်ခဲ့ပါတယ်။ ဂီတဖျော်ဖြေမှုရဲ့အဖွင့်မှာ ရွှေပြည်အေး ရေးစပ်ခဲ့တဲ့ ‘ရတနာပုံ’ သီချင်းကို ကေတုဝင်းထွဋ်ရဲ့ သီဆိုမှုနဲ့ စတင်ခဲ့တယ်။  အဲဒီနောက် ‘အချိန် ရမှနားထောင်ပါ’ သီချင်းကိုသီဆိုခဲ့ပြီး ‘ တူးပို့ တူးပို့’ သင်္ကြန်သီချင်းကို မိုးယုစံရဲ့အကနဲ့ တင်ဆက်ခဲ့ပါတယ်။ ရွှေယမင်းဦးရဲ့ဖျော်ဖြေမှုမှာ ‘တိမ်ညို’ နဲ့ ‘ဇေယျာကမ်းအလှပန်းချီ’ သီချင်းတို့ သီဆိုခဲ့ပြီး ‘ငယ်ကျွမ်းဆွေ’လို့ ပရိသတ်များ သိထားကြတဲ့ ‘ပြန်လည် ဆုံတွေ့ရာဝယ်’သီချင်းကို မောင်သိန်းဝင်းနဲ့အတူ တွဲဖက် သီဆိုခဲ့ပါတယ်။ အဲဒီနောက်မှာတော့ မောင်သိန်းဝင်းလို့ ရုပ်ရှင်လောကမှာ ပရိသတ်သိစေခဲ့တဲ့ ‘ မျက်လုံးချင်းစကားပြောနေပြီ’ သီချင်းကို သီဆိုခဲ့ပြီး ၁၉၇၄ ခုနှစ် က ဒါရိုက်တာ ဦးဝင်းဖေ ရိုက်ကူးတဲ့ ‘မပြိုသည့်မိုး’ ရုပ်ရှင်ဇာတ်ကားရဲ့ အဓိက ဇာတ်ဝင်တေးဖြစ်တဲ့ စန္ဒရားလှထွဋ် ရေးသားတဲ့ ‘မပြိုသည့်မိုး’ သီချင်းကို သီဆိုခဲ့ပါတယ်။ မောင်သိန်းဝင်းရဲ့ သီဆိုမှုအပြီး မှာ ယဉ်ဝေယံထွန်းက ‘ပန်းကြွေရာ ခြေရာကောက်’ကို သီဆိုခဲ့ကာ ဘိုကလေးတင့်အောင် ရေးစပ်ပြီး ဂီတလုလင်ဒေါက်တာကိုကိုရဲ့ တေးသွားတွေ ဖန်တီးထားတဲ့ ‘စကားဝါမြေ’ သီချင်းကို အလင်္ကာဝတ်ရည်အကအဖွဲ့နဲ့ အတူတင်ဆက်ခဲ့ပါတယ်။ ‘စကားဝါမြေ’ သီချင်း တင်ဆက်အပြီးမှာ ရာဇာဝင်းတင့်က ‘ဘာပဲလုပ်ရလုပ်ရ’ နဲ့ ’နွဲ့ဆိုး’သီချင်းနှစ်ပုဒ် သီဆိုခဲ့ပြီး ‘ညီမလေး’ သီချင်းကိုတော့ ခင်ညွန့်ရီနဲ့ အတူသီဆိုခဲ့ပါတယ်။ ခင်ညွန့်ရီရဲ့ဆက်လက် ဖျော်ဖြေမှုမှာ စင်မြင့်ဖျော်ဖြေပွဲတွေမှာ မကြားရတာ ကြာပြီဖြစ်တဲ့ ‘ဇာတိမာန်’ သီချင်းကို အားမာန်အပြည့်နဲ့ သီဆို ဖျော်ဖြေခဲ့ရာ ပရိသတ်များရဲ့သံပြိုင် လက်ခုပ်သံနဲ့အတူ အရွယ်စုံ ပရိသတ်များကလည်း ဆုများတက်ရောက် ချီးမြှင့်ခဲ့ကြပါတယ်။ ‘ဇာတိမာန်’ သီချင်း ဖျော်ဖြေမှု အပြီးမှာတော့ ဆရာဇော်ဂျီ ရဲ့ကဗျာကို စန္ဒရားချစ်ဆွေက သီချင်း အဖြစ် ဖန်တီးခဲ့တဲ့ အများက  ‘ပန်းပန်လျက်ပါ’လို့ သိထားကြတဲ့ ‘ဗေဒါလမ်း’ သီချင်းကို မိုးပြည့်ပြည့်မောင်ရဲ့ အကနဲ့အတူ တွဲဖက်ဖျော်ဖြေခဲ့ပါတယ်။ အဲဒီနောက် မိုးသက်နိုင်က သီချင်းသုံးပုဒ်နဲ့ ဖျော်ဖြေခဲ့ပြီး ချိုပြုံး ရဲ့ဖျော်ဖြေမှု အလှည့်မှာတော့ ‘မောင့်မူပိုင်ရှင်’နဲ့ ‘ချိုပြုံးလည်းလွမ်းနေရတယ်’သီချင်းတို့ကို သီဆိုခဲ့ပါတယ်။ သီချင်းနှစ်ပုဒ်ဆိုအပြီးမှာ ‘‘ကျွန်မ သီချင်းစဆိုစဉ်က အသက် ၁၃ နှစ်ပဲ ရှိသေးတာကြောင့် အချစ်သီချင်းတွေ ဆိုခွင့်မရခဲ့ပါဘူး။ မောင်ချစ်၊ နှမချစ်သီချင်းတွေနဲ့ သဘာဝအလှ ဘွဲ့သီချင်းတွေသာ ဆိုခဲ့ရပါတယ်’’ လို့ ပြောပြီး ငယ်စဉ်က ဆိုခဲ့တဲ့ပင်လယ် ရေလုပ်သားများဘ၀ကို ရေးစပ်ထား တဲ့ ချစ်စရာသီချင်းကို သီဆိုခဲ့ပါတယ်။ ချိုပြုံးရဲ့နောက်ဆုံး ဖျော်ဖြေမှု ကို အလင်္ကာဝတ်ရည် မောင်မောင်အေးနဲ့အတူ ‘ ပန်းပိတောက်ကိုချစ်တယ်’ သီချင်းနဲ့ ဖျော်ဖြေခဲ့ပါတယ်။ မောင်မောင်အေးရဲ့ဆက်လက် ဖျော်ဖြေမှုမှာ ၁၉၃၀ ပြည့်နှစ်လောက်က ရွှေတိုင်ညွန့်ရေးခဲ့တဲ့ ‘ သုံးရောင်ခြယ်’ သီချင်းကို အကအဖွဲ့နဲ့အတူ တင်ဆက်ခဲ့ပြီး ‘ ချစ်သူနဲ့ပိတောက်’ သင်္ကြန်သီချင်းကို နန်းမြတ်ဖြိုးသင်းရဲ့အကနဲ့ ဖျော်ဖြေခဲ့ပါတယ်။ မောင်မောင်အေးရဲ့ ဖျော်ဖြေမှုအပြီးမှာ အစီအစဉ်တင်ဆက်သူ နှစ်ဦးဖြစ်တဲ့ ကုသိုလ်နဲ့အရိုင်းတို့ နှစ် ယောက်ရဲ့ သင်္ကြန်သံချပ်တင်ဆက်မှုက ပရိသတ်ကိုပွဲကျစေခဲ့ပါတယ်။ အဲဒီနောက် ပန်းအိဖြူက သီချင်းသုံးပုဒ်ကို တစ်ကိုယ်တော် ဖျော်ဖြေခဲ့ပြီး ‘ဆွေပြမျိုးပြ’ သီချင်းကို ဖိုးသောကြာ နဲ့ တွဲဖက်သီဆိုခဲ့ပါတယ်။ ဖိုးသောကြာရဲ့အလှည့်မှာတော့ ‘မြန်မာ့ရှုခင်း မြန်မာ့စိတ်ရင်း’ သီချင်းနဲ့ မြို့မငြိမ်း က သုမောင်အတွက် ရေးစပ်ပေးခဲ့တဲ့ ‘ဒစ္စကိုတောသားကြီး’ သီချင်းတို့ကို ဖျော်ဖြေခဲ့ပြီး ‘သင်္ကြန်မိုး’ သီချင်းကို နန်းမြတ်ဖြိုးသင်းရဲ့အကနဲ့ တင်ဆက်ခဲ့ပါတယ်။ အဲဒီနောက် ပရိသတ် တောင်းဆိုတဲ့ ‘နဂါးနီ’သီချင်းကို ဖျော်ဖြေခဲ့ပါတယ်။ ဖိုးသောကြာ သီဆိုမှု အပြီးမှာ Sky Net ရဲ့ ကံစမ်းမဲ အစီအစဉ်ရွေးချယ်ခဲ့ပါတယ်။ ကံစမ်းမဲရွေးချယ်မှု အပြီးမှာ ထားက ‘မေတ္တာနုနုစေလိုသူ’ နဲ့ ‘မေတ္တာတရားဦးရှေ့မှာထား’ သီချင်းတို့ ကို ဖျော်ဖြေခဲ့ပါတယ်။ ထို့နောက် ရန်ပိုင်စိုးက ‘ခေတ်သစ်သူဌေးဝါဒ’ သီချင်းနှင့် ရွှေတိုင်ညွန့်ရဲ့ဖခင် လူရွှင်တော်ကြီး ဦးကြင်ခဲ ရေးစပ်ခဲ့တဲ့ ကရင်တိုင်းရင်းသားတို့ရဲ့ တောင်ယာလုပ်ငန်း အလှကို ဖွဲ့သီထားတဲ့ ‘တို့ယာတော’ သီချင်းကို ကရင်အကများနဲ့ တင်ဆက်ခဲ့ပါတယ်။ ယင်းနောက် ‘နွေမ’ သီချင်းကို မိုးယုစံရဲ့သင်္ကြန်အကနဲ့ ဖျော်ဖြေခဲ့ပါတယ်။ အဲဒီနောက်မှာတော့ အိအိချွန် က ‘ ဦးလေးကြီး’၊ ‘လုံးဝဥဿုန်’ သီချင်းနှစ်ပုဒ်ကို သီဆိုပြီး ‘ နှစ်သစ်ချစ်ဦး’သီချင်းကိုတော့ မိုးပြည့်ပြည့် မောင်ရဲ့အကနဲ့ အတူ ဖျော်ဖြေခဲ့ပါတယ်။ အိအိချွန်ရဲ့ ဖျော်ဖြေမှုအပြီးမှာ ပရိသတ်လက်ခုပ်သံများနဲ့အတူ စင်ပေါ်ရောက်ရှိသူက ဟသာင်္တထွန်း ရင်ပါ။ ‘အမေနဲ့ရွာကိုလွမ်းတယ်’၊ ‘မွေးမေကျေးဇူး ဆပ်ဖူးချင်တယ်’၊ ‘စက္ကန့်လေးတွေ စိန်စီထားမယ်’ နဲ့ ‘ငယ်သူငယ်ချင်း စာဥ’ သီချင်းတို့ကို သီဆိုခဲ့တဲ့ ဟသာင်္တထွန်းရင်က ‘‘အခုချိန် မှာ အသံလွှင့်ဌာနတွေ ရှိလာပေမယ့် မြန်မာသံဂီတကို ဘယ်အချိန်မှာ လွှင့်လဲမသိဘူး’’ ဆိုတဲ့စကားအတွက် မြန်မာသံ ပရိသတ်များက လက်ခုပ်တီးကာ ထောက်ခံခဲ့ကြပါတယ်။ ‘ငယ်သူ ငယ်ချင်းစာဥ’ သီဆိုမှုအပြီးမှာ ပိုးအိစံရဲ့ ‘အရိန္ဒမာအသိဆုံးပါ’သီချင်းကို တင်ဆက်ခဲ့ပါတယ်။ အဲဒီနောက် ဗညားဟန်က ‘‘ မြန်မာပြည်ထဲမှာ မြန်မာသံသီချင်းတွေ ဆိုနေတဲ့ မြန်မာ အဆိုတော် တစ်ယောက်အနေနဲ့ အားငယ်ရပါတယ်’’လို့ သူ့ရဲ့ခံစားချက်ကို ဖွင့်ဟခဲ့ပြီး သီချင်း ၅ ပုဒ် သီဆိုခဲ့ပါတယ်။ ဗညားဟန်ရဲ့သီဆိုမှု အပြီးမှာ ပိုးအိစံက ပြန်လည်သီဆိုခဲ့ ရာ ‘ မမပုသိမ်သူ’ သီချင်းကို ပုသိမ်ထီးအက၊ ‘အကဲလေး’သီချင်းကို Little Uranium အဖွဲ့နဲ့တင် ဆက်ခဲ့ပါတယ်။ ပိုးအိစံကိုလာအားပေးတဲ့ ဖခင်ဖြစ်သူ အဆိုတော် သန်းထွန်းလေးကလည်း ပရိသတ်တောင်း ဆိုမှုကြောင့် ‘ ကျွန်တော့်မွေးဌာနီ’ သီချင်းကို သီဆိုခဲ့ပါသေးတယ်။ နောက်ဆုံး အစီအစဉ်ကို အနုပညာရှင်များရဲ့ ‘နှစ်သစ်ဆုတောင်း’ သီချင်းသီဆိုမှုနဲ့ အဆုံးသတ်ခဲ့ပါတယ်။ EMG