ရန်ကုန်မြို့ ကျောတစ်ခင်းစာနှင့် သန့်ရှင်းရေး ၀န်ထမ်းများ

အနီရောင်အောက်ခံမှာ အဖြူရောင်စာလုံးနှင့် 'မသက်ဆိုင်သူများ မ၀င်ရ' ဆိုသည့် နှစ်ပေပတ်လည်
ရှိ ဆိုင်ဘုတ်လေး ခြံစည်းရိုးအ၀င်ရဲ့ ညာဘက်ထောင့်လေးမှာ ထောင်ထားသည်။

ခြံဝင်းအစမှ မျက်စိတစ်ဆုံး မီးရထားထိုင်ခုံများသဖွယ် မျက်နှာချင်းဆိုင် တည်ဆောက်ထားသော
အိမ်တန်းလျားများစွာကြား လမ်းလျှောက်တတ်စ ကလေးငယ်မှ သက်ကြီးရွယ်အို အရွယ်ထိ
သွားလာ လှုပ်ရှားနေကြသည်။

ဓနိမိုး၊ ထရံကာ၊ ၀ါးခြမ်းကွဲ ကြမ်းခင်းထားသည့် အပေါက်ငယ်တစ်ခုပါ ရှစ်ပေပတ်လည်ရှိ အခန်း
၁၂ ခန်းဖြင့် အိမ်တန်းလျားတစ်ခုချင်းစီကို မျက်နှာချင်းဆိုင် ၁၀ ပေခန့်အကွာ တည်ဆောက်ထား
သည်။

အဆိုပါ ခြံဝင်းအတွင်းတွင် အိမ်တန်းလျားပေါင်း ၁၇ ခုထိရှိသည်။ အပေါက်ငယ် တစ်ခုသာပါရှိပြီး
တံခါးမရှိသော အခန်းကျဉ်းလေးတွင် အနည်းဆုံး လူနှစ်ဦးမှ ရှစ်ဦးထိ စုပေါင်းပြီး ဖြစ်သလိုနေထိုင်
ကြရသည်။


ရန်ကုန်မြို့သူ၊ မြို့သားတွေရဲ့ စွန့်ပစ်အမှိုက်များကို နေ့၊ ည အလှည့်ကျတာဝန်ယူပြီး သိမ်းယူနေသော
မြို့တော်စည်ပင်သာယာရေး ကော်မတီ၊ သဘာဝပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာနမှ
နေ့စားသန့်ရှင်းရေးဝန်ထမ်း ၂၀၀ ကျော်ရဲ့ မိသားစုများ အဆိုပါတန်းလျားတွင် နေထိုင်ကြသည်။

သူတို့ကို 'ဘာရှာလိုင်းခန်း' နေထိုင်သူများဟူ၍လည်း စည်ပင်သာယာက သတ်မှတ်ထားသည်။

နေ့စား သန့်ရှင်းရေးဝန်ထမ်း အများစုမှာ အလုပ်အကိုင်အခွင့်အလမ်း နည်းပါးသော အခြားမြို့နှင့်
ကျေးရွာများမှ လာရောက်ကြခြင်း ဖြစ်ပြီး ရန်ကုန်မြို့ရောက်မှ နေထိုင်စရာအခက် အခဲကြောင့်
မိသားစုဝင်တစ်ဦး ၀န်ထမ်းလုပ်ရုံဖြင့် နေထိုင်စရာနေရာပေးသော နေ့စားသန့်ရှင်းရေး ၀န်ထမ်း
အဖြစ် လုပ်ကိုင်ကြခြင်းဖြစ်ကြောင်း ၎င်းတို့က ဆိုသည်။

သူတို့သည် အိမ်ခန်းငှားရမ်းနေထိုင်ရန် မဖြစ်နိုင်သည့်အတွက် နေထိုင်စရာ ကျောတစ်ခင်းစာပေးပြီး
တစ်နေ့လျှင် ကျပ် ၂,၇၀၀ မျှသာရသော သာမန် လူတန်းစားများ မလုပ်ချင်သည့် အမှိုက်သိမ်း၊
အမှိုက်ကောက်၊ သန့်ရှင်းရေးဝန်ထမ်းအလုပ်ကိုသာ ဖက်တွယ်လုပ်ကိုင်ကြတာ ဖြစ်သည်။

"ယောက်ျားက နှလုံးရောဂါ၊ အဆုတ်ရောဂါ ဖြစ်နေလို့ အလုပ်ထွက်ခိုင်းပြီး အမှိုက်ကောက်
သန့်ရှင်းရေး ၀န်ထမ်းဝင်လုပ်ရတယ်။ ကျန်းမာရေးကိုတော့ ထည့်မတွက်နိုင်တော့ပါဘူး။ ဒီလိုမှ
မလုပ်ရင်လည်း နေစရာမရှိဖြစ်တော့မယ်။ ရှစ်တန်းကျောင်းသားနဲ့ သုံးတန်းကျောင်းသား
နှစ်ယောက်ကလည်း ရှိသေးတယ်။ စားစရာမရှိတာ အရေးမကြီးဘူး။ နေစရာ မရှိတာခက်တယ်"
ဟု ပေါင်မြို့နယ်မှ ရန်ကုန်မြို့သို့ ရောက်လာပြီး ယုဇနပလာဇာနောက်ကျော အားကစားကွင်းအနီး
ဘာရှာလိုင်းခန်းတွင် နေထိုင်သူအသက် ၄၄ နှစ်အရွယ် ဒေါ်သီသီဝင်းက ညပိုင်းအမှိုက်သိမ်း
တာဝန်များကို ဆောင်ရွက်ရင်းပြောသည်။

မြို့တော် သန့်ရှင်းသာယာလှပရေးနှင့် ပြည်သူ လူထုကျန်းမာရေး မထိခိုက်စေရန် အညစ်အကြေး
အမှိုက်များကို နေ့၊ ည သိမ်းယူပေးနေသည့် သန့်ရှင်းရေးဝန်ထမ်းများ နေထိုင်သော 'ဘာရှာ
လိုင်းခန်း' အတွင်းတွင် အမှိုက်စွန့်ပစ်ချိန် နံနက် ၆ နာရီမှ ၁၀ နာရီ၊ ညနေ ၆ နာရီမှ ည ၁၀ နာရီထိ
သတ်မှတ်ထားသည့်တိုင် ရေပြည့်လျှံနေသည့် ကန်ပမာ အမှိုက်များမှာ အမှိုက်ကန်အောက်ခြေတွင်
ပြန့်ကျဲလွင့်စဉ်လို့ နေသည်။

"အမှိုက်ကန်ကိုတော့ နှစ်ရက်၊ သုံးရက်တစ်ခါ ကားနဲ့ လာသိမ်းတယ်" ဟု 'ဘာရှာလိုင်းမှူး' က
ပြောသည်။

သို့သော်လည်း 'ဘာရှာလိုင်းခန်း' အတွင်း နေထိုင်သူများကတော့ "တစ်ပတ်၊ နှစ်ပတ်၊ တစ်ခါ
တလေ တစ်လနေမှ တစ်ခါပဲသိမ်းတယ်" ဟု ပြောကြားကြသည်။

ပုံမှန်မသိမ်းသည့်တိုင် နေထိုင်သူများ၏ ကျန်းမာရေးစစ်ဆေးမှုများအား နှစ်ပတ်တစ်ကြိမ်၊ တစ်လ
တစ်ကြိမ် အလှည့်ကျပုံမှန် စစ်ဆေးဆောင်ရွက်ပေးမှုများကိုလည်း တာဝန်ရှိသူများက ဆောင်ရွက်
ပေးသလို NGO အဖွဲ့ အစည်းများကလည်း ခြင်ဆေးဖျန်းပေးခြင်းနှင့် အခြားကျန်းမာရေးအတွက်
လိုအပ်ချက်များ ပညာပေးဆောင်ရွက်မှုများလည်းရှိကြောင်း သန့်ရှင်းရေးဝန်ထမ်းများက ဆိုသည်။

မင်္ဂလာတောင်ညွန့်မြို့နယ်ရှိ ယုဇနပလာဇာ ရှေ့တွင် အမှိုက်တွန်းလှည်း ၁၂ စီးခန့်ပေါ်မှ အမှိုက်များ
ကို 'သန့်ရှင်းရေး' စာတန်းပါ ရောင်ပြန်ကပ် လိမ္မော်ရောင် အင်္ကျီဝတ်ထားသော သူများက အမှိုက်
ကန်ကြီးအတွင်းသို့ လွှဲပြောင်းနေကြသည်။

အချို့က ပါးစပ်ပိတ် အကာအကွယ်ပါပြီး အချို့က လက်အိတ်အကာအကွယ်ပါသည်။ အချို့မှာ
ဘာမှမပါ။

အမှိုက်လှည်းများ ဘေးတွင် ဖြတ်သန်းသွားလာသူ အားလုံးနီးပါးကတော့ နှာခေါင်းနှင့် ပါးစပ်များကို
ပိတ်ပြီး သွားလာလှုပ်ရှားနေသည်။

တွန်းလှည်းပေါ်ရှိ ပုတ်သိုး၊ ဟောင်းနွမ်းနေသော အမှိုက်များ၏ အနံ့အသက်မှာ အနီးပတ်ဝန်းကျင်
တစ်ခုလုံး ဖုံးလွှမ်းနေသည်။

အမှိုက်များကို အမှိုက်ကန်သို့ လွှဲပြောင်းနေသူများထဲတွင် သားတစ်ယောက်ရဲ့ ပူပူနွေးနွေး ဖခင်
ဖြစ်သူ လုပ်သက်တစ်နှစ် သက်တမ်းရှိ ကိုကင်း က "အမှိုက်ကောက်တယ်ဆိုတာလည်း နိုင်ငံ့
တာဝန်ကို တစ်နေရာကနေ ထမ်းဆောင်နေတာပါပဲ။ စားသောက်ဖို့အတွက် အဆင်ပြေသလို
မိသားစုရလာပြီဆိုတော့ နေထိုင်စရာအတွက်လည်း ပူစရာမလိုဘူးလေ။ ဒီအလုပ်ကိုတော့
အမြဲတမ်းလုပ်ဖို့ စိတ်ကူးမထားပါဘူး"ဟု အမှိုက်သိမ်းလမ်းကြောင်း၌ တွန်းလှည်းတွန်းရင်း
ပြောသည်။

နေ့စားသန့်ရှင်းရေး ၀န်ထမ်းတစ်ဦး အနေဖြင့် လုပ်အားခ တစ်နေ့ ကျပ် ၂,၇၀၀ ကို ငါးရက်ပေါင်း
တစ်ကြိမ် ထုတ်ယူကြရသည်။

'ဘာရှာ လိုင်းခန်း' အတွင်းတွင် နေ့စဉ်ချက်ပြုတ်စားသောက်နိုင်ရန်အတွက် စားဖိုဆောင်အတွင်း
တွင် ၁၆ လုံးခန့်ရှိ မီးဖိုတန်းလေးတန်းကတော့ ချက်ပြုတ်သူမဲ့ နေရှာသည်။

လိုင်းခန်းတစ်ခုလုံး သုံးစွဲသည့် ရေကန်နှင့် အိမ်သာမှာတော့ ရှေ့နောက်ကပ်လျက်ပေါ့။ အနီးမှာ
တော့ လူတစ်စု လက်တောက်ခုံ ကစားနေကြသည်။ ၀င်းထဲမှာတော့ လူလတ်ပိုင်းတချို့ ပိုက်ဆံ
လေးတွေကို လိပ်ပြီး ဒိုးပြားနှင့် ပစ်နေကြသည်။

"လုပ်အားခထုတ်တဲ့နေ့ဆိုရင်တော့ ချက်ပြုတ် စားသောက်တယ်။ အခြားရက်တွေဆိုရင်တော့
အပြင်မှာ စားဖြစ်တာများတယ်"ဟု ညပိုင်းအချိန် ဗိုလ်ချုပ်လမ်းပေါ်တွင် အမှိုက်များကို သိမ်းရင်း
ဒေါ်ဝတုတ်က ပြောပြသည်။

ရန်ကုန်မြို့တော် စည်ပင်သာယာရေးကော်မတီ၊ သဘာဝပတ်ဝန်းကျင် ထိန်းသိမ်းရေးနှင့် သန့်ရှင်းမှု
ဌာနအတွက် တရားဝင်ခန့်အပ် ၀န်ထမ်းအရေ အတွက်မှာ ၂,၆၀၀ ကျော် သတ်မှတ်ထားသည့်တိုင်
ခန့်အပ် ၀န်ထမ်းများမှာ ၉၀၀ ကျော်သာ ခန့်အပ်ထားနိုင်သေးသည်။

ထို့ကြောင့် လုပ်ငန်း လိုအပ်ချက်များအတွက် လမ်းပေါ် သန့်ရှင်းရေး နေ့စား ၀န်ထမ်း ၃,၀၀၀ ကျော်
ကိုလည်း နေစရာနေရာ ပေးကာ ခန့်အပ်ထားကြောင်း ဌာနမှသိရသည်။

နေ့စားသန့်ရှင်းရေး ၀န်ထမ်းများ နေထိုင်ရန်အတွက် ရန်ကုန်မြို့တွင်းရှိမြို့နယ် ၂၈ မြို့နယ်တွင်
'ဘာရှာလိုင်းခန်း' များတည်ဆောက်ပေးထားပြီး သောက်သုံးရေရရှိရန်နှင့် လျှပ်စစ်မီးသုံးစွဲနိုင်ရန်
အတွက်ကိုလည်း ဆောင်ရွက်ပေးထားကြောင်း သဘာဝပတ်ဝန်းကျင် ထိန်းသိမ်းရေးနှင့်
သန့်ရှင်းရေးဌာန၊ ဌာနမှူး ဦးသန်းလွင်ဦး က ပြောသည်။

'ဘာရှာလိုင်းခန်း'၂၈ ခုတွင် ၁၂ ခန်းပါလိုင်းပေါင်း ၁၄၅ လိုင်း၊ အခန်းပေါင်း ၁,၇၄၀ ခန်းထိ နေရာ
ပေးထားရကြောင်း ၎င်းက ပြောသည်။

'ဘာရှာလိုင်းခန်း' ပျက်စီးမှုများအား ပြန်လည်တည်ဆောက်ရာတွင် ယခုထက် ပိုမိုကောင်းမွန်စေရန်
အဆောက်အအုံ၏ တိုင်အောက်ခြေများတွင် အုတ်တိုင်များအစားထိုးကာ ပြောင်းလဲသွားပြီး
သွပ်မိုးဖြင့် အဆင့်မြင့်ပြောင်းလဲသွားမည်ဖြစ်ကြောင်း ဌာနမှူးကဆိုသည်။

ပဲခူးတိုင်းဒေသကြီး၊ က၀မြို့နယ်မှ ရန်ကုန်မြို့ ကို ရောက်လာတဲ့ ဒေါ်ကြည်ကြည်ခိုင်၊ အသက်
၃၇ နှစ်က " သားတွေ မြို့တက်မယ်ဆိုတော့ သားတွေနဲ့ မခွဲနိုင်လို့၊ ရန်ကုန်လိုက်လာတာ။
ဒီရောက်တော့ နေစရာလည်း မရှိဆိုတော့ နေစရာပေးတဲ့ နေ့စားသန့်ရှင်းရေး အလုပ်ကို ၀င်လုပ်
ရတာပေ့ါ" ဟု သန့်ရှင်းရေး ယူနီဖောင်းကိုဝတ်ပြီး ကျန်းမာရေးအတွက်ဌာနက ထုတ်ပေးထားသော
လက်အိတ်အား ၀တ်ရင်းပြောကာ သူ၏ အမှိုက်သိမ်းလမ်းကြောင်းသို့ ထွက်ခွာသွားသည်။

 စည်သူလွင် (မြန်မာတိုင်းမ်)