မြန်မာနိုင်ငံသို့ ဗြိတိန် ကုန်သွယ်ရေးနှင့် ရင်းနှီးမြှုပ်နှံမှုအသင်း၏ ကုန်သွယ်ရေးမစ်ရှင် ၁၅နှစ်အတွင်း ပထမဦးဆုံးအကြိမ် သုံးရက်ကြာ လာရောက်မည်ဖြစ်ပြီး ဗြိတိန်ထိပ်တန်းလုပ်ငန်း ၃၀ကျော် လိုက်ပါလာမည်

မြန်မာနိုင်ငံသို့ ဗြိတိန် ကုန်သွယ်ရေးနှင့် ရင်းနှီးမြှုပ်နှံမှုအသင်း၏ ကုန်သွယ်ရေးမစ်ရှင်သည် ၁၅နှစ်အတွင်း ပထမဦးဆုံးအဖြစ် ဇူလိုင်လ ၉ရက်နေ့မှ ၁၁ရက်နေ့အထိ သုံးရက်ကြာ လာရောက်မည်ဖြစ်ပြီး ဗြိတိန်ထိပ်တန်း လုပ်ငန်း ၃၀ ကျော် လိုက်ပါလာမည်ဖြစ်ကြောင်း အဆိုပါ ကုန်သွယ်ရေး မစ်ရှင်အဖွဲ့နှင့် တွေ့ဆုံမည့် စီးပွားရေးလုပ်ငန်းရှင်များ၊ စီးပွားရေး ပညာရှင်များထံမှ သတင်းရရှိပါသည်။ အဆိုပါ ကုန်သွယ်ရေးမစ်ရှင်အဖွဲ့ကို ဗြိတိန် ရာသီဥတုပြောင်းလဲမှု တိုက်ဖျက်ရေးနှင့် စွမ်းအင်ဌာန၀န်ကြီး၊ ဗြိတိန်ကုန်သွယ်ရေးနှင့် ရင်းနှီးမြှုပ်နှံမှုအသင်း၏ ကိုယ်စားလှယ်အဖွဲ့ ဥက္ကဋ္ဌ Lord Marland နှင့် ဗြိတိန်ကုန်သွယ်ရေးနှင့် ရင်းနှီးမြှုပ်နှံမှုအသင်း၏ အမှုဆောင်အရာရှိချုပ် Nick Baird တို့ ဦးဆောင်လာရောက်မည်ဖြစ်ပြီး ဗြိတိန်ထိပ်တန်း စီးပွားရေးလုပ်ငန်း ၃၂ ခုမှ လုပ်ငန်းရှင်များနှင့် ကိုယ်စားလှယ်များ လိုက်ပါလာမည် ဖြစ်ပါသည်။ မြန်မာပြည်သူလူထုအတွက် အကျိုးအမြတ် ရနိုင်သောကုန်သွယ်မှုနှင့် ရင်းနှီးမြှုပ်နှံမှုများ ဖြစ်စေရန်နှင့် မြန်မာနိုင်ငံ၏ ‘ဒီမိုကရေစီ ပြုပြင်ပြောင်းလဲမှု ကာလအတွင်း လူမှုစီးပွား ဖွံ့ဖြိုးမှုဆိုင်ရာနှင့် သဘာဝပတ်ဝန်းကျင် ဆိုင်ရာတို့အပေါ် တာဝန်ယူမှုရှိသည့် စီးပွားရေးပတ်ဝန်းကျင် ဖြစ်ပေါ်စေရန် အထောက်အကူ ပြုသွားမည်ဟု ဗြိတိန်ကုန်သွယ်ရေးနှင့် ရင်းနှီးမြှုပ်နှံမှုဝန်ကြီး Lord Green က ပြောကြားခဲ့ပါသည်။ ဗြိတိန်ကုန်သွယ်ရေး မစ်ရှင်အဖွဲ့သည် ရန်ကုန်မြို့ Sedona ဟိုတယ်တွင် ဇူလိုင်လ ၉ရက်နေ့၌ ကုန်သွယ်ရေး တွေ့ဆုံဆွေးနွေးပွဲ ကျင်းပသွားမည်ဖြစ်ပြီး စီးပွားရေး လုပ်ငန်းရှင်များနှင့် စီးပွားရေးပညာရှင်များ တက်ရောက်ကြမည် ဖြစ်ကြောင်းနှင့် ဗြိတိန်သံရုံးတွင် ကုန်သွယ်ရေးမစ်ရှင်ရုံးကို ဖွင့်လှစ်သွားမည်ဖြစ်ကြောင်း သိရပါသည်။ ပါမောက္ခဒေါ်လှမြင့်က "မြန်မာနိုင်ငံအပေါ် ချမှတ်ထားတဲ့ စီးပွားရေးပိတ်ဆို့မှုကို ဆိုင်းငံ့ပြီးတဲ့နောက်ပိုင်း ဗြိတိန်ကနေလာတဲ့ ပထမဦးဆုံး စီးပွားရေးအဖွဲ့ ဖြစ်ပါတယ်။ သူတို့မှာ ကဏ္ဍအလိုက် ကုမ္ပဏီတွေပါလာတယ်။ မြန်မာစီးပွားရေး လုပ်ငန်းရှင်တွေအတွက် အခွင့်အလမ်းကောင်း တစ်ခုဖြစ်မှာပါ"ဟု ပြောကြားပါသည်။ ယခုလာရောက်မည့် ကုန်သွယ်ရေးမစ်ရှင်အဖွဲ့တွင် ရေနံနှင့်သဘာဝဓာတ်ငွေ့ လုပ်ငန်းများ၊ ဘဏ်လုပ်ငန်းနှင့် ဘဏ္ဍာရေး ဝန်ဆောင်မှုလုပ်ငန်းများ၊ ဥပဒေရေးရာနှင့် အုပ်ချုပ်ရေးလုပ်ငန်းများ၊ ပညာရေးလုပ်ငန်းများ၊ အခြေခံအဆောက်အဦဆိုင်ရာ လုပ်ငန်းများ ပါဝင်လာကြပြီး ကဏ္ဍအလိုက် ဆွေးနွေးမှုများ ပြုလုပ်ကြမည် ဖြစ်ပါသည်။ မြန်မာနိုင်ငံဘက်မှ ပါမောက္ခ ဦးမော်သန်း (ပါမောက္ခချုပ်-ငြိမ်း၊ စီးပွားရေးတက္ကသိုလ်)၊ ပါမောက္ခ ဒေါ်ရီရီမြင့် (ပါမောက္ခဌာနမှူး-ငြိမ်း၊ စီးပွားရေးတက္ကသိုလ်)၊ ပါမောက္ခ ဒေါ်လှမြင့် (ပါမောက္ခဌာနမှူး-ငြိမ်း၊ စီးပွားရေးတက္ကသိုလ်)၊ Dennis Openshaw (အကြီးတန်းအကြံပေး သမ၀ါယမဘဏ်)၊ Jay Cohen (Kelvin Chia Yangon International Law firm)၊ ဦးသန်းမောင်၊ ဦးသူရစိုးပိုင်(All Myanmar Investment Partner)၊ ဦးကျော်ကျော်လှိုင်(ဥက္ကဋ္ဌ- Smart Group of Companies)၊ ဦးသောင်းတင် (ဥက္ကဋ္ဌ- KMD Group of Companies) စသူတို့က ဦးဆောင်ဆွေးနွေးကြမည် ဖြစ်ပါသည်။ ဗြိတိန်ကုန်သွယ်ရေး မစ်ရှင်အဖွဲ့သည် မြန်မာနိုင်ငံမှ ထိုင်းနိုင်ငံသို့ ဇူလိုင်လ ၁၁ရက်နေ့တွင် ပြန်လည်ထွက်ခွာမည် ဖြစ်ကြောင်းနှင့် ဇူလိုင်လ ၁၂ ရက်နေ့တွင် မစ်ရှင်အဖွဲ့ခေါင်းဆောင် Lord Marland က "Impressions of Burma" ခေါင်းစဉ်ဖြင့် ထိုင်းနိုင်ငံ ဘန်ကောက်မြို့ Holiday Inn Silom Ballroom တွင် ဟောပြောဆွေးနွေးမည်ဖြစ်ကြောင်း ထိုင်းအခြေစိုက် သတင်းများအရ သိရပါသည်။ EMG