ကချင်အရေး ကြားလူက တဆင့် ဆွေးနွေးဖို့ NLD အဆိုပြု

မြန်မာနိုင်ငံမြောက်ပိုင်း ကချင်ပြည်နယ်တွင်းမှာ ကြီးထွားလာနေတဲ့ ပဋိပက္ခတွေ အဆုံးသတ်စေရေး လွှတ်တော်တွင်း ဒုတိယနေ့ အဖြစ်ဆွေးနွေးရာမှာ တိုင်းရင်းသားတွေ အပါအ၀င် အရပ်ဖက် ကိုယ်စားလှယ်တွေ က သီးခြားလွတ်လပ်တဲ့ လူပုဂ္ဂိုလ် ဒါမှမဟုတ် အဖွဲ့အစည်း တခုကနေ ကြားဝင်စေ့စပ်ဖို့ တိုက်တွန်းခဲ့ပေမဲ့ စစ်တပ်ကိုယ်စားလှယ်တွေကတော့ ကချင်လက်နက်ကိုင်တွေရဲ့ တိုက်ခိုက်မှုတွေကို အရင်ရပ်ဖို့ လိုတယ်လို့ ပြောဆိုခဲ့ကြပါတယ်။ ဒီလို ဆွေးနွေးမှုအပေါ်မှာ ကချင်လွတ်လပ်ရေးအဖွဲ့ KIO ဖက်က ဘယ်လို သဘောထားရှိနေပါသလဲ။ ဒီသတင်းကိုတော့ ဗီအိုအေ မြန်မာပိုင်းအစီအစဉ်ရဲ့သတင်းထောက် ကိုမိုးဇော်က တင်ပြမှာဖြစ်ပါတယ်။

ဒီကနေ့ ဆက်လက်ကျင်းပနေတဲ့ ပထမအကြိမ် အမျိုးသား လွှတ်တော် ဆဌမ ပုံမှန် အစည်းအဝေးမှာ မနေ့ကတင်သွင်းခဲ့တဲ့ ပြည်တွင်း ငြိမ်းချမ်းရေးနဲ့ ပတ်သက်ပြီး ထာဝရ ငြိမ်းချမ်းရေး ဖော်ဆောင်နိုင်ဖို့ နှစ်ဦးနှစ်ဘက် ယုံကြည်မှု ရရှိမယ့် ခိုင်မာတဲ့ အခြေခံမူတွေ ချမှတ်ပေးရေးအဆိုကို အမျိုးသား လွှတ်တော်မှာ ဆက်လက်ဆွေးနွေးနေပါတယ်။

ဒီလိုဆွေးနွေးရာမှာ ပါဝင်ဆွေးနွေးတဲ့လွှတ်တော်ကိုယ်စားလှယ်တွေက တွေ့ဆုံဆွေးနွေး အဖြေရှာရေး ဆိုတာကို အလေးထားတင်ပြ ဆွေးနွေးခဲ့ကြသလို သီးခြားလွတ်လပ်တဲ့ လူပုဂ္ဂိုလ် ဒါမှမဟုတ် အဖွဲ့အစည်းတခုကနေ ကြားဝင်စေ့စပ်ဖို့ အဆိုကိုလည်း တင်ပြဆွေးနွေးတာတွေ ရှိခဲ့ပါတယ်။

"အမြင်မတူတဲ့ဘက်နှစ်ဘက် ကိုယ့်အမြင်နဲ့ကိုယ်တော့ မှန်တယ်လို့ ထင်ကြတာပဲ
ဖြစ်ပါတယ်။ တစ်ချို့ ဖြစ်ရပ်တွေဟာ တစ်ခါတစ်လေမှာ သက်ဆိုင်သူတွေနဲ့
တိုက်ရိုက်ဆွေးနွေး ဖြေရှင်းလိုက်လို့ အောင်မြင်သွားတာရှိနိုင်တာပဲ။
ပြင်းထန်တဲ့ အမြင်ကွဲလွဲမှုရှိတဲ့အခါတွေမှာကျတော့ တိုက်ရိုက်တွေ့ဆုံဖို့
အဆင်မပြေတာတွေ ရှိပါတယ်။ အဲဒီအခါ ကြားဝင်ဆောင်ရွက်ပေးကြရတာ လိုအပ်လာတာ
တွေ့ရပါတယ်"

ဒါကတော့ မကွေးတိုင်းဒေသကြီး မဲဆန္ဒနယ် အမှတ်၎က ဦးအောင်ကြည်ညွှန့် ဆွေးနွေး တာဖြစ်ပါတယ်။ဒီလို ကြားဝင်ဆောင်ရွက်မယ့် လူ သို့မဟုတ် အဖွဲ့အစည်းနဲ့ပတ်သက်လို့လည်း သူက အခုလို ဆက်ဆွေးနွေးပါတယ်။

"ဘယ်လိုအောင်မြင်အောင် ကြားဝင်ဆောင်ရွက်ပေးမဲ့ ပုဂ္ဂိုလ် ဒါမှမဟုတ်
အဖွဲ့အစည်းတခုဟာ နံပါတ်တစ်က နှစ်ဘက်က လေးစားရေး အရေးကြီးပါတယ်။
နံပါတ်နှစ်ကတော့ နှစ်ဘက်ရဲ့ဩဇာလွှမ်းမိုးမှုကင်းကြောင်း သံသယဖြစ်ဖွယ်မရှိသူ
ကြားနေသူဖြစ်ရပါမယ်။ နံပါတ်သုံးက နှစ်ဘက်လုံးရဲ့ စိုးရိမ်သောကတွေကို
မျှတစွာ အလေးအနက် ထားပြီးတော့ ကြားနာနိုင်တဲ့သူဖြစ်ဖို့လိုပါတယ်။
နံပါတ်လေးက "အသွား တမန် အပြန် ရှိစေ "ဆိုတဲ့ စေ့စပ်ညိနှိုင်းရေးကို ကျွမ်းကျင်တဲ့သူ ဖြစ်ရမယ်။ နံပါတ်ငါးကတော့ အများလေးစားကြည်ညို အားထားခြင်း ပညာစွမ်းအားရှိတဲ့သူ ဖြစ်ရမှာ
ဖြစ်ရပါမယ်"

အမျိုးသားလွှတ်တော်ရဲ့ တပ်မတော်သားကိုယ်စားလှယ်တဦးဖြစ်တဲ့ ဗိုလ်မှုးဝင်းသိန်းကတော့ ကချင်ပြည်နယ် အရေးနဲ့ ပတ်သက်ပြီး အခုလို ဆွေးနွေးထားပါတယ်။

"အပစ်အခတ် ရပ်စဲမှုဟာ တပ်မတော်တစ်ခုတည်းမှ တစ်ဘက်သတ် အပစ်ရပ်တံ့လို့
မဖြစ်ပါ။ ကေအိုင်အို ကေအိုင်အေ ခေါင်းဆောင်များမှလည်း မည်သည့်နည်းနှင့် မဆို မြန်မာ့တပ်မတော်အား ထိုးစစ်ဆင်တိုက်ခိုက်ခြင်းမပြုရန် အရပ်သားများကို
ဦးတည်သည့် မီးရထားလမ်း ကားလမ်း နှင့် တံတားများအား မိုင်းခွဲခြင်း ရဲစခန်းများအား ဝင်ရောက် တိုက်ခိုက်ခြင်းကဲ့သို့ အဖျက်လုပ်ငန်းများအား ရပ်တံ့ပေးရန်
လွှတ်တော်မှ အဆုံးအဖြတ် မှတ်တမ်းတင်သင့်ပါတယ်ခင်ဗျာ။ ကေအိုင်အေ ကေအိုင်အို
ဘက်မှလည်း တစ်သွေမတိမ်း လိုက်နာ ဆောင်ရွက်နိုင်မှသာလျှင် နယ်မြေဒေသ
ဖွံ့ဖြိုး တိုးတက်ရေးကို အခြားဒေသရှိ တိုင်းရင်းသားများနည်းတူ
ဆောင်ရွက်ပေးနိုင်မှာ ဖြစ်ပါတယ်။ နယ်မြေတည်ငြိမ်အေးချမ်းရန်
ငြိမ်းချမ်းရေး ဖော်ဆောင်ရန် မလွှဲမသွေလိုအပ်လှပါတယ်။
တစ်ဦးနှင့် တစ်ဦးယုံကြည်မှု တည်ဆောက်ရပါမယ်ခင်ဗျာ။ ယုံကြည်မှုရရှိရေးအတွက်
နှစ်ဦးနှစ်ဘက် တွေ့ဆုံဆွေးနွေးမှုများ ဆောင်ရွက်ရပါမယ်။ နှစ်ဦးနှစ်ဘက်
တွေ့ဆုံ ဆွေးနွေးဆောင်ရွက်ဖို့ အပစ်အခတ် ရပ်စဲဖို့ လိုပါတယ်။ ဒါကြောင့် ကေအိုင်အို
ကေအိုင်အေ ဘက်မှလည်း အခြားအဖွဲ့ များ နည်းတူ အပစ်အခတ်ရပ်စဲရေး
သဘောတူ လက်မှတ်ရေးထိုး၍ နိုင်ငံရေး ဆွေးနွေးမှုများတွင် ပါဝင်ဆွေးနွေးသင့်ပါတယ်။"

မနေ့က ဆွေးနွေးပွဲမှာတော့ တိုင်းရင်းသားကိုယ်စားလှယ်အများစုက နိုင်ငံရေးအရ အဖြေရှာကြဖို့ အကြံပြုဆွေးနွေးခဲ့ကြပေမဲ့ အာဏာရပါတီနဲ့ စစ်တပ်ကိုယ်စားလှယ်တွေကတော့ KIO/KIA ကို အင်အားသုံး နှိမ်နင်းဖို့ ဆွေးနွေးတာတွေလည်း ရှိခဲ့ပါတယ်။ အမျိုးသား လွှတ်တော်မှာ တင်ပြဆွေးနွေးနေတဲ့အချက်တွေအပေါ်မှာ KIO ဖက်က ဘယ်လို သဘောထားရှိပါသလဲ။

"အခုဒီလိုမျိုး တိုက်ပွဲတွေပြင်းထန်တဲ့ အချိန်မှာ နှစ်ဘက် ဆွေးနွေးတာပဲ ပြောဦး။ ဒီလိုနှစ်ဘက်တည်းနဲ့တော့ဘယ်လိုမှ ဆွေးနွေးစရာလည်း အကြောင်းတော့မရှိဘူး။ ဒါကြောင့်မို့ ကြားအဖွဲ့အစည်း တစ်ခု Third Party တစ်ခုကတော့ ပါဝင်ဆောင်ရွက်ရမယ်ဆိုတဲ့ အဖြေက အဲ့လိုလမ်းကြောင်းတော့ ရှိလာတယ်ခင်ဗျာ။ ဒီတော့ Third Party ဆိုတာ
ဘယ်လိုဟာမျိုး အဖွဲ့အစည်းဖြစ်ရမလဲ။ ဘယ်လောက်အထိ အာမခံပေးနိုင်တဲ့
ကြားမှာဘယ်လောက်အထိဖြန်ဖြေပေးနိုင်တဲ့ အာမခံချက် တာဝန်ခံပေးနိုင်တဲ့
အဖွဲ့အစည်းဖြစ်ရမလဲ။ ပုဂ္ဂိုလ်ဖြစ်ရမလဲ ဆိုတာတော့ ဆက်ပြီး ဆွေးနွေးစရာတော့ ရှိတယ်ခင်ဗျ။ လောလောဆယ်ဖြစ်နေတဲ့ အခြေအနေအပေါ်မှာ ကျနော်တို့ ဆုံးဖြတ်ချက်ချထားတာကတော့ တွေ့ဆုံမှုကို UNFC ကပဲ ဦးစီး ဦးဆောင်လုပ်ဆောင်သွားကြပါ။ အဲဒီမှာ ကျနော်တို့အဖွဲ့အစည်းက ကိုယ်စားလှယ် ကလည်း ပါဝင်ပြီးမှပဲ လိုအပ်တဲ့ပြဿနာ အရပ်ရပ်ကို နိုင်ငံရေးနည်းလမ်းနဲ့ ဖြေရှင်းသွားမယ်ဆိုတဲ့အမြင်ပါ အဲလိုအမြင်နဲ့ပဲ
ပြဿနာကို လျော့နည်းသွားအောင်ပေါ့နော် အဲလို အဆိုပြုထားတာ ရှိတယ်ခင်ဗျာ"

ဒါကတော့ ကေအိုင်အို ပြောခွင့်ရ ဦးလနန်ပြောသွားတာပါ။ လောလောဆယ်မှာတော့ KIO ဌာနချုပ်အနီးက စစ်ရေးအရအရေးပါတဲ့ ခါယာဘွမ်တောင်ကုန်းကို အစိုးရတပ်တွေက နေ့စဉ်ရက်ဆက်တိုက်ခိုက်နေတယ်။ ဒီကနေ့မှာလည်းမနက် ၆နာရီကထည်းက တိုက်ခိုက်နေတယ်လို့ ပြောပါတယ်။ မြန်မာအစိုးရဖက်ကတော့ KIO/KIA ဖက်တိုက်ခိုက်မှုတွေ လုပ်ခဲ့တာကြောင့် တုန့်ပြန်တဲ့ အနေနဲ့ ဒေသတွင်း ရှင်းလင်းတဲ့ စစ်ဆင်ရေးတွေ လုပ်ခဲ့တာလို့ ပြောဆိုတာတွေလည်း ရှိခဲ့ပါတယ်။

ဒီကနေ့ အမျိုးသားလွှတ်တော်မှာ ကချင်ပြည်နယ်အရေးကို ကိုယ်စားလှယ် ၁၃ ဦးက
ဆွေးနွေးဖို့ စာရင်းပေးသွင်းထားတာဖြစ်ပြီး ပြီးခဲ့တဲ့ သီတင်းပတ် ကတော့ ပြည်သူ့လွှတ်တော်မှာလည်း ကချင်ပြည်နယ်အတွင်းက တိုက်ပွဲတွေ ချက်ချင်းရပ်စဲရေးအတွက် လွှတ်တော်က ဆောင်ရွက်ဖို့ ဆုံးဖြတ်အတည်ပြု တာတွေရှိခဲ့ပါတယ်ခင်ဗျာ။

VOA